ປີ 2018 ເສດຖະກິດແຂວງຄຳມ່ວນ ຂະຫຍາຍຕົວ 6,56% ດຶງດູດການລົງທຶນໄດ້ 5 ພັນຕື້ກວ່າກີບ

ໃນລະຫວ່າງວັນທີ 04 – 06 ກຸມພາ 2019 ຢູ່ທີ່ຫ້ອງປະຊຸມເຮືອນພັກເລກ 01 ຂອງແຂວງ ໄດ້ຈັດກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 13 ສະໄໝທີ IX ຂຶ້ນຢ່າງເປັນທາງການ ໂດຍພາຍໃຕ້ການເປັນປະທານຂອງ ທ່ານ ໂອໄດ    ສຸດາພອນ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆຄໍາມ່ວນ; ເຂົ້າຮ່ວມມີບັນດາສະຫາຍໃນຄະນະບໍລິຫານງານພັກແຂວງ, ຫົວໜ້າພະແນກການ, ຕາງໜ້າບໍລິສັດ, ລັດວິສາຫະກິດ ຕະຫຼອດເຖິງພາກສ່ວນກ່ຽວຂ້ອງ.

ທ່ານ ໂອໄດ ສຸດາພອນ ໄດ້ກ່າວໄຂກອງປະຊຸມຢ່າງເປັນທາງການ. ຈາກນັ້ນ, ທ່ານ ວົງເພັດ ຈິດປັນຍາ ກໍາມະການພັກແຂວງ, ຫົວໜ້າຫ້ອງວ່າການແຂວງ ໄດ້ລາຍງານການຕີລາຄາກ່ຽວກັບການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 12 ສະໄໝທີ IX ພ້ອມທັງເປັນການວິເຄາະ – ວິໄຈໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງຂອງແຕ່ລະຂົງເຂດວຽກງານໃນໄລຍະຜ່ານມາ.

ນອກຈາກນັ້ນ, ຍັງໄດ້ຮັບຟັງບົດລາຍງານວຽກງານພົ້ນເດັ່ນໃນແຕ່ລະຂົງເຂດວຽກງານ ໃນໝົດປີ 2018 ທີ່ຜ່ານມາ ແລະ ທິດທາງແຜນການປີ 2019 ສະເໜີໂດຍ ທ່ານ ດາວໄຫຼ ແກ້ວດວງດີ ຫົວໜ້າພະແນກແຜນການ ແລະ ການລົງທຶນແຂວງ ເຊິ່ງທ່ານໄດ້ກ່າວວ່າ: ໃນປີ 2018 ເສດຖະກິດຂອງແຂວງຄໍາມ່ວນ ຂະຫຍາຍຕົວຢູ່ໃນລະດັບ 6,56%, ລວມຍອດມູນຄ່າຜະລິດຕະພັນພາຍໃນ ຫຼື GDP ບັນລຸ 7.437 ຕື້ກວ່າກີບ. ໃນນັ້ນ, ຂະແໜງກະສິກໍາ – ປ່າໄມ້ ບັນລຸ 1.210 ຕື້ກີບ ກວມ 16,27% ຂອງ GDP, ຂະແໜງອຸດສາຫະກໍາ ບັນລຸ 3.636,70 ຕື້ກີບ ກວມ 48,90% ຂອງ GDP, ຂະແໜງບໍລິການ ບັນລຸ 2.340,90 ຕື້ກີບ ກວມ 31,47% ຂອງ GDP, ພາສີອາກອນຜະລິດຕະພັນຂາເຂົ້າສຸດທິ ບັນລຸໄດ້ 249,99 ຕື້ກີບ ກວມ 3,36% ຂອງ GDP.

ສະເລ່ຍລາຍຮັບຕໍ່ຫົວຄົນ 17,8 ລ້ານ ກວ່າກີບຕໍ່ຄົນຕໍ່ປີ ຫຼື ເທົ່າກັບ 2.121 ໂດລາສະຫະລັດຕໍ່ຄົນຕໍ່ປີ ທຽບໃສ່ປີຜ່ານມາເພີ່ມຂຶ້ນ 23 ໂດລາສະຫະລັດ, ພົນລະເມືອງຂອງແຂວງຄໍາມ່ວນ ເທົ່າກັບ 415.899 ຄົນ.

ໃນປີ 2018 ຜ່ານມາ ສາມາດດຶງດູດນັກລົງທຶນທັງພາຍໃນ ແລະ ຕ່າງປະເທດເຂົ້າມາລົງທຶນທັງໝົດໄດ້ 63 ໂຄງການ ມີທຶນ 5.864,84 ຕື້ກີບ, ທຶນຈົດທະບຽນ 2.310 ຕື້ກວ່າກີບ ເທົ່າກັບ 90,41% ຂອງແຜນການປີ. ໃນນັ້ນ, ກິດຈະການສໍາປະທານ 25 ໂຄງການ, ທຶນທັງໝົດ 5.717 ຕື້ກວ່າກີບ, ມີທຶນຈົດທະບຽນ 2.166 ຕື້ກວ່າກີບ.

ການລົງທຶນພາຍໃນມີ 21 ໂຄງການ ມີທຶນຫຼາຍກວ່າ 240 ຕື້ກີບ, ການລົງທຶນຂອງຕ່າງປະເທດມີ 04 ໂຄງການ ມີທຶນທັງໝົດ 5.476 ຕື້ກວ່າກີບ. ມາຮອດປັດຈຸບັນມີໂຄງການລົງທຶນຢູ່ແຂວງທັງໝົດ 576 ໂຄງການ, ກິດຈະການສໍາປະທານ 169 ໂຄງການ, ໄດ້ຍົກເລີກບັນດາໂຄງການທີ່ບໍ່ປະຕິບັດຕາມສັນຍາສໍາປະທານ ຕາມກົດໝາຍວ່າດ້ວຍການສົ່ງເສີມການລົງທຶນ ແລະ ລະບຽບການອື່ນໆທີ່ກ່ຽວຂ້ອງ ຈໍານວນ 53 ໂຄງການ.

 

ແຫຼ່ງຂ່າວ: ເສດຖິກິດ-ການຄ້າ

 

Leave a Reply

Your email address will not be published. Required fields are marked *