ແຂວງໄຊຍະບູລີ ກໍານົດຈຸດສຸມພັດທະນາທີ່ເປັນບຸລິມະສິດ

ໃນຕອນບ່າຍຂອງວັນທີ 8 ກຸມພາ 2019 ນີ້ ທີ່ສະໂມສອນຫ້ອງວ່າການ ແຂວງໄຊຍະບູລີ ໄດ້ຈັດກອງປະຊຸມປຶກສາຫາລື ກ່ຽວກັບ ການກໍານົດຈຸດສຸມພັດທະນາທີ່ເປັນບຸລິມະສິດ ໄລຍະ 2019 – 2020 ຂຶ້ນ ໂດຍການເປັນປະທານຂອງ ທ່ານ ຍັນຍົງ ສີປະເສີດ ຮອງເຈົ້າແຂວງໆໄຊຍະບູລີ, ເຂົ້າຮ່ວມມີຫົວໜ້າ – ຮອງຫົວໜ້າພະແນກການ ແລະ ເຈົ້າເມືອງ 11 ເມືອງ ເຂົ້າຮ່ວມເກືອບ 50 ຄົນ.

ໃນກອງປະຊຸມ ທ່ານ ບຸນຫຼາຍ ຄໍາພູມີ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ ໄດ້ຂຶ້ນຜ່ານແຈ້ງການແນະນໍາຂອງ ທ່ານລັດຖະມົນຕີກະຊວງກະສິກໍາ ແລະ ປ່າໄມ້ ສະບັບເລກທີ 0092/ກປ ລົງວັນທີ 4 ກຸມພາ 2019 ວ່າດ້ວຍການກໍານົດຈຸດສຸມພັດ ທະນາທີ່ເປັນບຸລິມະສິດ ໄລຍະປີ 2019 – 2020 ໃນທົ່ວປະເທດ ເພື່ອຮັບປະກັນໃນການຈັດຕັ້ງປະຕິບັດແຜນພັດທະນາຊົນນະບົດ ແລະ ລຶບລ້າງຄວາມທຸກຍາກ 5 ປີ ( 2016 – 2020 ) ໄດ້ດໍາເນີນໄປຢ່າງມີຈຸດປະສົງ ແລະ ລະດັບຄາດໝາຍນັ້ນ ກະຊວງກະສິກໍາ ແລະ ປ່າໄມ້ ໄດ້ສົມທົບກັບອົງການປົກຄອງທ້ອງຖິ່ນໃນທົ່ວປະເທດ ຄົ້ນຄວ້າກໍານົດ 3 ປະເພດຈຸດສຸມພັດທະນາ ເຊິ່ງທົ່ວປະເທດມີ 449 ຈຸດສຸມ. ໃນນີ້, ຈຸດສຸມພັດທະນາຊົນນະບົດ ແລະ ລຶບລ້າງຄວາມທຸກຍາກ ມີ 91 ຈຸດສຸມ, ການຈັດສັນພູມລໍາເນົາ ແລະ ອາຊີບ ມີ 145 ຈຸດສຸມ ແລະ ຈຸດສຸມສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດ ມີ 213 ບ້ານ.

ຈາກນັ້ນ, ຜູ້ແທນກອງປະຊຸມກໍໄດ້ຜັດປ່ຽນກັນປະກອບຄໍາຄິດ – ຄໍາເຫັນ, ປຶກສາຫາລື ແລະ ໄດ້ຕົກລົງກໍານົດຈຸດສຸມພັດທະນາທີ່ ເປັນບຸລິມະສິດຂອງແຂວງໄຊຍະບູລີ ໄລຍະປີ 2019 – 2020 ເຊັ່ນ: ຈຸດສຸມສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດ ມີ 3 ຈຸດສຸມ ຄື: ບ້ານໂພນສະອາດ ເມືອງພຽງ, ບ້ານໃຫຍ່ ເມືອງບໍ່ແຕນ ແລະ ບ້ານບົວບານ ເມືອງປາກລາຍ; ຈຸດສຸມລຶບລ້າງບ້ານທຸກ ຍາກ ມີ 6 ບ້ານ. ໃນນັ້ນ, ປີ 2019 ຈະລຶບລ້າງ 3 ບ້ານ ຄື: ບ້ານສາມັກຄີໄຊ ເມືອງຊຽງຮ່ອນ, ບ້ານກ້ອງທ່ຽງ ແລະ ບ້ານສະຖານ ເມືອງໄຊສະຖານ; ປີ 2020 ຈະລຶບລ້າງ 3 ບ້ານ ຄື: ບ້ານສະລາ, ບ້ານກໍ່ ແລະ ບ້ານສະມະ ເມືອງໄຊສະຖານ; ຈຸດສຸມສ້າງບ້ານພັດທະ ນາ ມີ 24 ບ້ານ ແລະ ຈຸດສຸມຈັດສັນພູມລໍາເນົາ ແລະ ອາຊີບ ມີ 12 ຈຸດ.

( ໂດຍ: ອຸ່ນເຮືອນ ໂພທິລັກ )

Leave a Reply

Your email address will not be published. Required fields are marked *