ສື່ມວນຊົນລາວ – ຕົວແທນສະໂມສອນລາວລີກ ໄດ້ຮັບການຝຶກອົບຮົມຖ່າຍທອດສົດບານເຕະຜ່ານ ycujoo

ສື່ມວນຊົນຈາກພາກສ່ວນຕ່າງໃນ ສປປ ລາວ ແລະ ຕົວແທນຈາກສະໂມສອນໃນ ເປບຊີ ລາວ ພຣີເມຍລີກ ໄດ້ຮັບການຍົກລະດັບການຖ່າຍທອດສົດບານເຕະຜ່ານ Mycujoo ທີ່ຮັບໜ້າທີ່ຖ່າຍທອດສົດການແຂ່ງຂັນ ເປບຊີ ລາວ ພຣີເມຍລີກ 2019 ທຸກໆນັດ ເພື່ອກຽມພ້ອມຖ່າຍທອດສົດການແຂ່ງຂັນ ທີ່ຈະເປີດສາກຂຶ້ນຢາກເປັນທາງການໃນຕົ້ນເດືອນມີນາ 2019. ເປບຊີ ລາວ ພຣີເມຍລີກ 2019 ຈະຖ່າຍທອດສົດຜ່ານ Mycujoo ເວັບໄຊທທີ່ຮັບໜ້າທີ່ຖ່າຍທອດສົດພຽງຜູ້ດຽວໃນລະດູການນີ້ ໂດຍຈະບໍ່ມີການຖ່າຍທອດສົດຜ່ານໂທລະພາບອື່ນໆຄືດັ່ງປີທີ່ຜ່ານ. ດັ່ງນັ້ນ, ເມື່ອວັນທີ 8 ກຸມພາທີ່ຜ່ານມາ ສະຫະພັນບານເຕະແຫ່ງຊາດລາວ ( ສຕລ ) ຈຶ່ງໄດ້ຈັດຝຶກອົບຮົມຂຶ້ນທີ່ຫ້ອງປະຊຸມຂອງ ສຕລ ເຊິ່ງມີ ທ່ານ Stuart Laman Director of Content and partnership Asia ມາຖ່າຍທອດຄວາມຮູ້ໃຫ້ກັບສື່ມວນຊົນຈາກຫຼາຍພາກສ່ວນ ບໍ່ວ່າຈະເປັນໂທລະພາບ, ໜັງສືພິມ, ເວັບໄຊ ແລະ ຕົວແທນຈາກສະໂມສອນຕ່າງໆ ເຂົ້າຮ່ວມ 20 ກວ່າຄົນ. ໃນພິທີດັ່ງກ່າວ ທ່ານ ນາງ ກັນຍາ ແກ້ວມະນີ ເລຂາທິການສະຫະພັນບານເຕະແຫ່ງຊາດລາວ ກ່າວວ່າ: ເປບຊີ ລາວ ພຣີເມຍລີກ 2019 ຫຍັບໃກ້ເຂົ້າມາເລື້ອຍໆ. ດັ່ງນັ້ນ, ສຕລ ກໍານົດໃຊ້ Mycujoo ຖ່າຍທອດສົດການແຂ່ງຂັນທຸກໆນັ້ນຜ່ານເວັບໄຊຂອງສະຫະພັນບານເຕະອາຊີ ເຊິ່ງ Mycujoo ເປັນທີ່ນິຍົມກັນຫຼາຍໃນທົ່ວໂລກໃນການຖ່າຍທອດສົດການແຂ່ງຂັນ ໂດຍມີຫຼາຍກວ່າ 20 ລ້ານຄົນໄດ້ຮັບຊົມ ເພາະສະດວກໃນການຖ່າຍທອດສົດ ແລະ ມີປະສິດທິພາບ ໂດຍສະເພາະວົງການບານເຕະລາວ ໄດ້ນໍາມາໃຊ້ຖ່າຍທອດສົດບານເຕະ ສາຍ ກ ປະຈໍາປີ 2018 ເຫັນວ່າມີຄວາມສະດວກວ່ອງໄວ, ແນ່ນອນການມາຝຶກອົບຮົມຄັ້ງນີ້ ສື່ມວນຊົນລາວ ແລະ ຕົວແທນຈາກສະໂມສອນຕ່າງຈະສາມາດນໍາເອົາໄປຖ່າຍທອດຜ່ານການແຂ່ງຂັນໄດ້. ຂະນະດຽວກັນ ທ່ານ Stuart Laman ວິທະຍາກອນໃນການຝຶກອົບຮົມຄັ້ງນີ້ ກ່າວວ່າ: Mycujoo ສ້າງຕັ້ງຂຶ້ນໂດຍ 2 ອ້າຍນ້ອງຊາວປ໊ອກຕຸຍການ ທີ່ຮັກມັກໃນກີລາບານເຕະມີແນວຄິດຢາກໃຫ້ທຸກຄົນໄດ້ເບິ່ງເຕະບານນໍາກັນໄດ້ໃນທົ່ວໂລກ ເຊິ່ງພິເສດຂອງ Mycujoo ແມ່ນຖ່າຍທອດສົດງ່າຍ, ຈ່າຍຕໍ່າ, ບໍ່ລະເມີດລິຂະສິດ, ບໍລິການຟຣີ ແລະ ສາມາດເບິ່ງໄດ້ທຸກທີ່ທຸກເວລາຂໍພຽງມີອິນເຕີເນັດ ເຊື່ອແນ່ວ່າການມາຝຶກອົບຮົມໃນ ສປປ ລາວ ຄັ້ງນີ້ຈະຊ່ວຍໃຫ້ຊາວລາວໄດ້ເບິ່ງບານເຕະຫຼາຍຂຶ້ນ ແລະ ຊາວຕ່າງປະເທດກໍສາມາດເຂົ້າເຖິງບານເຕະລາວໄດ້ຫຼາຍຂຶ້ນເຊັ່ນກັນ.

 

 

ຂໍ້ມູນມາຈາກ : ເສດຖະກິດການຄ້າ

Leave a Reply

Your email address will not be published. Required fields are marked *