14 ຊາດ ຮ່ວມຊີງໄຊດອກປີກໄກ່ນາໆຊາດ ທ້າຍເດືອນນີ້

ການແຂ່ງຂັນກີລາດອກປີກໄກ່ ຊີງແຊັມນາໆຊາດ ຫຼື ລາຍການ ແບັດມິນຕັນ ເບຍລາວ ອິນເຕີເນຊັນນອລ ຊີຣີ 2019 ( Badminton Beerlao International Series ) ການແຂ່ງຂັນເກັບຄະແນນສະສົມຄະແນນລະດັບໂລກ “ ເວີຣ໌ແລັງກິງ ” ລະຫວ່າງວັນທີ 19 – 24 ກຸມພາ 2019 ທີ່ ສປປ ລາວ ຮັບກຽດເປັນເຈົ້າພາບ ໂດຍມີນັກກີລາລະດັບໂລກເຂົ້າຮ່ວມຈາກ 14 ປະເທດ, ພິເສດ ບໍລິສັດ ເບຍລາວ ຈໍາກັດ ຍັງສືບຕໍ່ຊຸກຍູ້ 108 ລ້ານກີບໃນປີນີ້. ພິທີຖະແຫຼງຂ່າວ ແລະ ມອບ – ຮັບການອຸປະຖຳເງິນ 108 ລ້ານກີບ ຂອງ ບໍລິສັດ ເບຍລາວ ຈຳກັດ ສະໜັບສະໜູນການແຂ່ງຂັນກີລາດອກປີກໄກ່ຊີງແຊັມນາໆຊາດ ຈັດຂຶ້ນເມື່ອວັນທີ 8 ກຸມພາຜ່ານມາ ທີ່ຫ້ອງການຄະນະກຳມະການໂອແລັມປິກແຫ່ງຊາດລາວ ໂດຍໃຫ້ກຽດເຂົ້າຮ່ວມ ແລະ ກ່າວມອບຂອງ ທ່ານ ຈັນສະໝອນ ຜອງຈັນທາ ຜູ້ຈັດການຝ່າຍການຕະຫຼາດ ບໍລິສັດ ເບຍລາວ ຈຳກັດ ແລະ ກ່າວຮັບແມ່ນ ທ່ານ ສົມສະແຫວງ ແສງສີລາວົງ ຮັກສາການປະທານ ແລະ ເລຂາທິການ ສະຫະພັນດອກປີກໄກ່ແຫ່ງຊາດລາວ, ເຂົ້າຮ່ວມເປັນສັກຂີພິຍານຂອງ ທ່ານ ກະເສມ ອິນທະລາ ຮອງປະທານຄະນະກຳມະການໂອແລັມປິກແຫ່ງຊາດລາວ, ຕາງໜ້າສະຖານທູດມາເລເຊຍ ປະຈຳ ສປປ ລາວ ພ້ອມດ້ວຍຄະນະບໍລິຫານງານສະຫະພັນດອກປີກໄກ່ແຫ່ງຊາດ, ຄູຝຶກ ແລະ ນັກກີລາ ຕະຫຼອດຮອດສື່ມວນຊົນທຸກຂະແໜງການ. ທ່ານ ສົມສະແຫວງ ແສງສີລາວົງ ກ່າວວ່າ: ໃນລະຫວ່າງວັນທີ 19 – 24 ກຸມພານີ້ ທີ່ສະໂມສອນດອກປີກໄກ່ເສດຖາ ເມືອງສີສັດຕະນາກ ນະຄອນຫຼວງວຽງຈັນ ສະຫະພັນດອກປີກໄກ່ແຫ່ງຊາດລາວ ໄດ້ຕາງໜ້າ ສປປ ລາວ ໄດ້ຮັບກຽດເປັນເຈົ້າພາບຈັດການແຂ່ງຂັນກີລາດອກປີກໄກ່ ລາຍການ ແບັດມິນຕັນ ເບຍລາວ ອິນເຕີເນຊັນນອລ ຊີຣີ 2019 ເພື່ອເປັນການສະສົມຄະແນນລະດັບໂລກ ຫຼື ເວີຣ໌ແລັງກິງ ໂດຍໄດ້ຮັບການສະໜັບສະໜູນຈາກຫຼາຍພາກສ່ວນ ໂດຍສະເພາະ ບໍລິສັດ ເບຍລາວ ຈຳກັດ ຈຳນວນ 108 ລ້ານກີບ. ລາຍການນີ້ ສປປ ລາວ ເຄີຍຮັບກຽດເປັນເຈົ້າພາບຈັດແຂ່ງຂັນມາແລ້ວ 4 ຄັ້ງ ກໍຄືຈັດຂຶ້ນເມື່ອປີ 2008, 2009, 2010 ແລະ ປີ 2017 ເຊິ່ງລາຍການດັ່ງກ່າວເປັນລາຍການຮອງລະດັບການແຂ່ງຂັນລະດັບໂລກ ທີ່ມີນັກກີລາ 190 ກວ່າຄົນ ລະດັບແຖວໜ້າຂອງໂລກຈາກ 14 ປະເທດ ເຂົ້າຮ່ວມ ປະກອບມີ: ສປປ ລາວ ເຈົ້າພາບ, ໄທ, ສສ ຫວຽດນາມ, ມາເລເຊຍ, ສິງກະໂປ, ອົດສະຕຣາລີ, ຍີ່ປຸ່ນ, ອິນເດຍ, ສະຫະລັດອາເມຣິກາ, ອັງກິດ, ການາດາ, ຊູແອັດ, ດານມາກ ແລະ ອິນໂດເນເຊຍ ເຊິ່ງມີການຊີງໄຊທັງໝົດ 5 ລາຍການ ຄື: ປະເພດດ່ຽວຍິງ, ດ່ຽວຊາຍ, ຄູ່ຍິງ, ຄູ່ຊາຍ ແລະ ທີມຄູ່ປະສົມ. ຂະນະດຽວກັນ ທ່ານ ບຸນຍະແສງ ນະຊຽງຄຳ ຮອງເລຂາທິການສະຫະພັນດອກປີກໄກ່ແຫ່ງຊາດລາວ ໃຫ້ຮູ້ວ່າ: ການແຂ່ງຂັນຄັ້ງນີ້ມີຄວາມພ້ອມ 100% ໃນໄລຍະກະກຽມກໍມີຜູ້ຊ່ຽວຊານສະຫະພັນດອກປີກໄກ່ສາກົນ ໄດ້ລົງມາຕິດຕາມ ແລະ ກວດສອບສະໜາມແຂ່ງຂັນແມ່ນໃຫ້ຜ່ານ ສາມາດຈັດການແຂ່ງຂັນໄດ້ຕາມແຜນທີ່ວາງໄວ້. ພວກເຮົາຕັ້ງເປົ້າໄວ້ທີ່ປະເພດຄູ່ຊາຍ ແລະ ຄູ່ປະສົມ ຈະສາມາດຜ່ານເຂົ້າເຖິງຮອບ 8 ຄົນສຸດທ້າຍ ໂດຍຈະມີການຊີງເງິນລາງວັນລວມ 87 ລ້ານກີບ ຫຼື ປະມານ 10 ພັນໂດລາສະຫະລັດ. ສຳລັບລາງວັນທີ 1 ແຕ່ລະລາຍການຈະໄດ້ເງິນ 7 ລ້ານກີບ, ທີ 2 ຈະໄດ້ເງິນລາງວັນລາຍການລະ 3,5 ລ້ານກີບ, ສ່ວນນັກກີລາທີ່ເຂົ້າຮອບຮອງຊະນະເລີດ ຈະໄດ້ເງິນລາງວັນລາຍການລະ 1,8 ລ້ານກີບ ແລະ ຜ່ານເຂົ້າຮອບ 8 ທີມ ຈະໄດ້ເງິນລາງວັນລາຍການລະ 1 ລ້ານກີບ. ການແຂ່ງຂັນກີລາດອກປີກໄກ່ ຊີງແຊັມນາໆຊາດ ຄັ້ງນີ້ມີ 5 ລາຍການ ປະກອບດ້ວຍ: ດ່ຽວຍິງ, ດ່ຽວຊາຍ, ຄູ່ຍິງ, ຄູ່ຊາຍ ແລະ ຄູ່ປະສົມ .

 

 

ຂໍ້ມູນມາຈາກ : ເສດຖະກິດການຄ້າ

Leave a Reply

Your email address will not be published. Required fields are marked *

Facebook