ຈັບນັກສຶກສາ ຄ້າຢາບ້າ ພ້ອມຂອງກາງ ເກືອບ 3 ແສນເມັດ

ກົມຕຳຫຼວດສະກັດກັ້ນ ແລະ ຕ້ານຢາເສບຕິດ ໄດ້ນໍາກໍາລັງເຂົ້າຈັບຕົວນັກສຶກສາ 2 ຄົນ ພ້ອມໝູ່ໃນວັນທີ 2 ມັງກອນ 2019 ໃນຂະນະທີ່ກໍາລັງນັດຊື້-ຂາຍຢາ ເສບຕິດ ຢູ່ບ້ານຫ້ວຍເຕີຍ ເມືອງໄຊທານີ ນະຄອນຫຼວງວຽງຈັນ ພ້ອມຂອງກາງຢາເສບຕິດຫຼາຍລາຍການ ໃນນີ້ມີຢາບ້າເກືອບ 300.000 ເມັດ.

ຜູ້ຖືກຫາທັງ 3 ຄົນຊື່ ທ້າວ ຕູ້ ອາຍຸ 20 ປີ, ທ້າວ ຈື່ ອາຍຸ 22 ປີ, ທັງ 2 ເປັນນັກສຶກສາ ເຊົ່າເຮືອນຢູ່ບ້ານຄຳຮຸ່ງ  ເມືອງໄຊທານີ ແລະ ທ້າວ ອາລີ ວ່າງ  ອາຍຸ 17 ປີ ຢູ່ບ້ານນາສ້ຽວ ເມືອງໄຊທານີ ນະຄອນຫຼວງວຽງຈັນ.

ຂອງກາງທີ່ຢຶດໄດ້ມີຢາບ້າ ຈໍານວນ  146 ມັດ ກັບ 9 ຖົງນ້ອຍ ເທົ່າກັບ 298.000 ເມັດ ມີນໍ້າໜັກ 34 ກິໂລກຼາມ, ແປ້ງຝຸ່ນສີຂາວ 1 ແພັກ, ນໍ້າໜັກ 479 ກຼາມ, ປືນສັ້ນ 1 ກະບອກ ພ້ອມລູກປືນ 6 ລູກ ແລະ ລົດຈັກ 1 ຄັນ. ຜ່ານການສືບສວນ-ສອບສວນ ພວກກ່ຽວຮັບສາລະພາບວ່າ:ຢາເສບຕິດຈໍານວນດັ່ງກ່າວ ແມ່ນຂອງພວກກ່ຽວແທ້, ໂດຍນັດຊື້-ຂາຍກັບໃຫ້ຜູ້ສັ່ງຊື້ເຂດບ້ານຫ້ວຍເຕີຍ ພໍໄປຮອດຈຸນັດພົບຖືກເຈົ້າໜ້າທີ່ຈັບຕົວກ່ອນ. ຄະດີດັ່ງກ່າວ, ຢູ່ຂັ້ນຕອນການສືບສວນ-ສອບສວນຂະຫຍາຍຜົນຫາກຸ່ມແກ້ງ, ພັກພວກ, ເຄືອຂ່າຍ, ໄປດຳເນີນຄະດີຕາມລະບຽບກົດໝາຍ.

ເຈົ້າໜ້າທີ່ຈຶ່ງຮຽກຮ້ອງມາຍັງ ປະຊາຊົນບັນດາເຜົ່າທຸກຊັ້ນຄົນ ຈົ່ງພ້ອມກັນຊ່ວຍເປັນຫູເປັນຕາຊ່ວຍເຈົ້າໜ້າທີ່, ຖ້າພົບເຫັນບຸກຄົນ ຫຼື ກຸ່ມຄົນບໍ່ດີທີ່ເຄື່ອນໄຫວພົວພັນກັບຢາເສບຕິດທຸກປະເພດ ໃຫ້ລາຍງານຕໍ່ເຈົ້າໜ້າທີ່-ທີ່ກ່ຽວຂ້ອງ ເພື່ອເຂົ້າແກ້ໄຂໂດຍໄວ ເພື່ອເຮັດໃຫ້ຢາເສບຕິດໝົດໄປຈາກສັງຄົມເຮົາ.

 

ຂອບໃຈຂໍ້ມູນຈາກ: ນສພ ຄວາມສະຫງົບ

Leave a Reply

Your email address will not be published. Required fields are marked *

Facebook