ທຳລາຍສວນຝິ່ນ 24 ເຮັກຕາ ຢູ່ເມືອງວຽງພູຄາ

ໃນທ້າຍເດືອນມັງກອນ 2019 ຜ່ານມາ ທາງກອງບັນຊາການ ປກສ ເມືອງວຽງພູຄາ ໄດ້ລົງສົມທົບກັບພະແນກກວດກາ ແລະ ຄວບຄຸມສິ່ງເສບຕິດ ( ກຄສ ) ປກສ ແຂວງ, ອົງການຈັດຕັ້ງທຸກພາກສ່ວນ, ອຳນາດການປົກຄອງບ້ານ ລົງຈັດຕັ້ງ ແລະ ທຳລາຍສວນຝິ່ນທີ່ປະຊາຊົນລັກລອບປູກ 24 ເຮັກຕາ ຢູ່ຂອບເຂດເມືອງວຽງພູຄາ.

ໂດຍການນຳພາຂອງ ທ່ານ ພັນໂທ ແອ່ ພິມມະວົງ ຄະນະພັກ ຮອງຫົວໜ້າກອງບັນຊາການ ປກສ ເມືອງວຽງພູຄາ, ທ່ານ ພັນຕີ ດາວທອງ ມະນີເພັດ ຮອງຫົວໜ້າພະແນກ ກຄສ ປກສ ແຂວງ, ມີຄະນະກອງບັນຊາການ ປກຊ – ປກສ ເມືອງ, ອົງການຈັດຕັ້ງຂອງບ້ານເຂົ້າຮ່ວມ.

ສຳລັບການລົງປະຕິບັດໜ້າທີ່ທຳລາຍສວນຝິ່ນຄັ້ງນີ້ ລວມມີ 3 ບ້ານ ຄື: ບ້ານຫ້ວຍຫົກ, ບ້ານທົ່ງລາດ ແລະ ບ້ານນ້ຳວາງ. ໃນນີ້, ໄດ້ແບ່ງອອກເປັນ 4 ທີມງານ ຄື: ເຂດບ້ານນ້ຳວາງ ມີຈຳນວນ 2 ເຂດ ແບ່ງອອກເປັນ 2 ທີມງານ, ເຂດບ້ານທົ່ງລາດ ແລະ ບ້ານຫ້ວຍຫົກ ແບ່ງອອກເປັນ 2 ທີມງານ.

ຜ່ານການລົງຈັດຕັ້ງປະຕິບັດທຳລາຍສວນຝິ່ນໃນຄັ້ງນີ້ ສາມາດທຳລາຍ ແລະ ສັງລວມເນື້ອທີ່ໄດ້ບ້ານນ້ຳວາງ ມີສວນຝິ່ນຈຳນວນ 30 ຈຸດ ມີເນື້ອທີ່ 20,6 ເຮັກຕາ ບ້ານທົ່ງລາດ ມີສວນຝິ່ນຈຳນວນ 1 ຈຸດ ມີເນື້ອທີ່ 1,2 ເຮັກຕາ ຄອບຄົວປູກຝິ່ນ 4 ຄອບຄົວ, ບ້ານຫ້ວຍຫົກ ມີສວນຝິ່ນ ຈຳນວນ 10 ຈຸດ ມີເນື້ອທີ່ສວນຝິ່ນ 2,6 ເຮັກຕາ, ຄອບຄົວປູກຝິ່ນ 11 ຄອບຄົວ ເຊິ່ງຝິ່ນດັ່ງກ່າວແມ່ນໄດ້ທຳລາຍຖິ້ມທັງໝົດ ເຊິ່ງລວມເນື້ອທີ່ສວນຝິ່ນທີ່ທຳລາຍຖິ້ມທັງໝົດ 3 ບ້ານ, ມີ 15 ຄອບຄົວ, ມີສວນຝິ່ນຈຳນວນ 41 ຈຸດ ແລະ ມີເນື້ອທີ່ 24,4 ເຮັກຕາ.

ເນື້ອທີ່ສວນຝິ່ນດັ່ງກ່າວແມ່ນໄດ້ທຳລາຍຖິ້ມ 100% ຕໍ່ກັບຄອບຄົວຜູ້ປູກຝິ່ນທາງຄະນະຮັບຜິດຊອບແມ່ນຈະໄດ້ສຶກສາອົບຮົມກ່າວເຕືອນຕໍ່ຜູ້ລະເມີດ ແລະ ສ້າງບົດບັນທຶກໄວ້ເປັນຫຼັກຖານ.

ພ້ອມກັນນີ້, ຍັງຈະໄດ້ສືບຕໍ່ລົງກວດກາ ແລະ ທຳລາຍສວນຝິ່ນຢູ່ 3 ບ້ານ ຄື: ບ້ານທ່າຫຼວງ, ບ້ານນ້ຳຕະແຫຼ່ງ ແລະ ບ້ານນ້ຳໂລະ ຕື່ມອີກ.

 

ແຫຼ່ງຂ່າວ: ເສດຖະກິດ-ການຄ້າ

 

Leave a Reply

Your email address will not be published. Required fields are marked *

Facebook