ສະຫລົດ!!! ຜິດຖຽງກັນຫຼາຍຄັ້ງ ຈົນນຳໄປສູ່ການຄາດຕະກຳ

ໃນວັນທີ 16 ມັງກອນ 2019, ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ກອງຄະດີອາຍາ ປກສ ເມືອງໄຊທານີ ນະຄອນຫຼວງວຽງຈັນ ໄດ້ຮັບການລາຍການຈາກອໍານາດການປົກຄອງບ້ານ ທ່າສົມມໍ ວ່າມີເຫດການຜິດຖຽງກັນ ແລ້ວ ທໍາຮ້າຍຮ່າງກາຍກັນຈົນເຮັດໃຫ້ມີຜູ້ເສຍຊີວິດ 1 ຄົນ, ຈຶ່ງໄດ້ລົງໄປສົມທົບກັບອໍານາດການປົກຄອງບ້ານ ທ່າສົມມໍ ລົງສັນລະສູດສະຖານທີ່ເກີດເຫດພົບເຫັນທ້າວ ເດດ ນອນຫງາຍເສຍຊີວິດຢູ່ຂ້າງຄັນໄດເຮືອນ ບໍລິເວນຫົວມີຮອງຮອຍບາດແຜຄ້າຍຖືກຂອງແຂງຕີ ແລະ ຜູ້ທີ່ລົງມືກໍ່ເຫດຊື່ທ້າວ ສົມສະນິດ ອາຍຸ 29 ປີ ( ນ້ອງຊາຍ ຜູ້ຕາຍ ) ແລະ ທ້າວ ແດງນ້ອຍ ອາຍຸ 20 ປີ ( ຫຼານຊາຍຜູ້ຕາຍ ) ເຈົ້າໜ້າທີ່ ຈຶ່ງໄດ້ນໍາຕົວທັງສອງຄົນມາດໍາເນີນຄະດີ ໃນຂໍ້ຫາທໍາຮ້າຍຮ່າງກາຍຈົນເຮັດໃຫ້ຜູ້ອື່ນເສຍຊີວິດ ພ້ອມຂອງກາງໄມ້ຄ້ອນທີ່ນໍາໃຊ້ກໍ່ເຫດໃນຄັ້ງນີ້.

ຜ່ານການສືບສວນ-ສອບສວນ ທ້າວ ສົມສະນິດ ໄດ້ໃຫ້ການຮັບສາລະພາບຕໍ່ເຈົ້າໜ້າທີ່ວ່າ: ໃນມື້ເກີດເຫດວັນທີ 16 ມັງກອນ 2019 ເວລາປະມານ 11:00 ໂມງ ແມ່ນໄດ້ນອນພັກຜ່ອນຢູ່ບ່ອນນອນ ທ້າວ ເດດ ( ຜູ້ເປັນອ້າຍ ) ໄດ້ຍ່າງມາຖາມຫາມີດ ຕົນເອງຈຶ່ງບອກວ່າບໍ່ເຫັນ, ແຕ່ທ້າວ ເດດ ຍັງຖາມຢ່າງຕໍ່ເນື່ອງຫຼາຍໆຄັ້ງ ຕົນເອງກໍເກີດຄວາມລໍາຄານ ຈຶ່ງເວົ້າວ່າຊິເອົາມີດໄປປາດຄໍຫອຍຫວະ ແລະ ທ້າວ ເດດ ກໍບໍ່ພໍໃຈ ແລະ ຍ່າງໄປຈັບເອົາໄມ້ກ້ານຟອຍເພື່ອຈະມາຕີ ແຕ່ຕົນເອງໄດ້ຍາດເອົາໄມ້ກ້ານຟອຍໄວ້ ແລ້ວຍູ້ທ້າວ ເດດ ຕົກຄັນໃດເຮືອນ ແລ້ວຍ່າງໄປຈັບເອົາໄມ້ດ້າມສຽມຊັນຢູ່ຫ້ອງນອນ ຍາວປະມານ 120 ຊັງຕີແມັດ ມາຕີໃສ່ບໍລິເວນຫົວຂອງທ້າວ ເດດ ຈໍານວນຫຼາຍບາດຈົນໄມ້ດ້າມສຽມຫັກເປັນສາມທ່ອນ. ຈາກນັ້ນ ທ້າວ ແດງນ້ອຍ ກໍແລ່ນມາຍາດເອົາໄມ້ຄ້ອນຍາວປະມານ 80 ເຊັນທີ່ຢູ່ມືຂອງທ້າວ ເດດ ຕີໃສ່ບໍລິເວນຫົວຂອງທ້າວ ເດດ ອີກຈໍານວນຫຼາຍບາດ ຈົນທ້າວເດດ ລົ້ມພຸບລົງໃສ່ພື້ນດິນ ແລ້ວກໍພາກັນແຍກຍ້າຍໄປກັນຄົນລະທາງ.

ທ້າວ ແດງນ້ອຍ ຫຼື ຊ້າງ ໃຫ້ການຕໍ່ເຈົ້າໜ້າທີ່ວ່າ: ໃນມື້ເກີດເຫດ ຕົນເອງໄດ້ຍິນສຽງ ທ້າວ ເດດ ( ຜູ້ຕາຍ ) ແລະ ທ້າວ ສົມສະນິດ ຜິດຖຽງກັນ ຕົນເອງຈິ່ງແລ່ນໄປເບິ່ງ ເຫັນທ້າວ ສົມສະນິດ ໃຊ້ໄມ້ຄ້ອນ; ເຊິ່ງເປັນດ້າມສຽມຕີເຂົ້າບໍລິເວນຫົວຂອງທ້າວ ເດດ, ຕົນເອງຈຶ່ງເຂົ້າໄປຫ້າມ ແຕ່ທ້າວ ເດດ ໄດ້ຟຶດເຮັດໃຫ້ໄມ້ຄ້ອນທີ່ທ້າວ ເດດ ຈັບຢູ່ພາດຖືກບໍລິເວນຄີ້ວຊ້າຍຂອງຕົນເອງ, ຈຶ່ງເຮັດໃຫ້ຕົນເອງເກີດຄວາມໃຈຮ້າຍ ແລ້ວໄດ້ຍາດເອົາໄມ້ຄ້ອນຢູ່ມືທ້າວ ເດດ ມາຕີໃສ່ບໍລິເວນຫົວຂອງທ້າວ ເດດ ຈໍານວນຫຼາຍບາດ ຈົນໄມ້ຄ້ອນຫັກເປັນສາມທ່ອນ ຈາກນັ້ນ ກໍແຍກທາງກັນໄປຄົນລະທາງເຮັດຄືບໍ່ມີຫຍັງເກີດຂຶ້ນ .

ເຈົ້າໜ້າທີ່ ປກສ ເມືອງໄຊທານີ ໃຫ້ຮູ້ອີກວ່າ: ຜ່ານມາທ້າວ ສົມສະນິດ ແລະ ທ້າວ ເດດ ຜູ້ເປັນອ້າຍເຄີຍມີການຜິດຖຽງຕີກັນເປັນປະຈໍາ ຖືໄດ້ວ່າເປັນອາຈີນ, ຕີກັນແຕ່ລະຄັ້ງແມ່ນເຖິງຂັ້ນເລືອດຕົກຍາງອອກ. ແລະ ທ້າວ ສົມສະນິດ ແມ່ນເຄີຍຖືກຈັບຕົວມາດໍາເນີນຄະດີຢູ່ ປກສ ເມືອງໄຊທານີ ສອງຄັ້ງໃນຂໍ້ຫາມົ້ວສຸມເສບຢາເສບຕິດ ແຕ່ບໍ່ໄດ້ຖືກສານຕັດສິນ; ຄັ້ງສຸດທ້າຍ ຖືກປ່ອຍຕົວອອກໃນຊ້ວງໄລຍະເດືອນ ຕຸລາ 2018.

ແຫຼ່ງຂ່າວ: ປກສ ນວ

 

Leave a Reply

Your email address will not be published. Required fields are marked *