ກໍາປູເຈຍ ປະຕິເສດບໍ່ໄດ້ອອກພາສປອດໃຫ້ “ຍິ່ງລັກ” ເຊື່ອເປັນຂອງປອມ

ສໍານັກຂ່າວພະນົມເປນ ໂພສ ລາຍງານໃນວັນພະຫັດທີ່ 10 ມັງກອນ 2019 ວ່າ ເຈົ້າໜ້າທີ່ລັດຖະບານກໍາປູເຈຍ ອອກປະຕິເສດລາຍງານຂອງສື່ຮົງກົງ ທີ່ລະບຸວ່າ ທ່ານນາງ ຍິ່ງລັກ ຊິນນະວັດ ອະດີດນາຍົກລັດຖະມົນຕີຂອງປະເທດໄທ ໃຊ້ໜັງສືເດີນທາງກໍາປູເຈຍໃນການຕັ້ງບໍລິສັດໃນຮົງກົງ ແລະ ອາດຈະໃຊ້ພາສປອດນີ້ໃນການຫຼົບໜີອອກນອກປະເທດໄທເມື່ອປີ 2017

ເມື່ອວັນພຸດ ສໍານັກຂ່າວ ເຊົາທ ໄຊນ່າ ມໍນິ່ງ ໂພສ ຂອງຮົງກົງເຜີຍແພ່ພາບເອກະສານຂໍຈັດຕັ້ງບໍລິສັດ ພີ.ທີ ຄໍຣເປີເຣຊັ່ນ ຄອມພານີ ໃນຮົງກົງ ເຊິ່ງລະບຸວ່າ ທ່ານນາງ ຍິ່ງລັກ ໃຊ້ພາສປອດກໍາປູເຈຍໃນການຂໍຈັດຕັ້ງເມື່ອວັນທີ່ 24 ສິງຫາ 2018 ຫຼື ເກືອບ 1 ປີຫຼັງຈາກທ່ານຫຼົບໜີຈາກປະເທດໄທ ເພາະຖືກດໍາເນີນຄະດີຖານປ່ອຍປະລະເລີຍໃຫ້ເກີດການທຸຈະລິດໃນໂຄງການຈໍານໍາເຂົ້າ ເຊິ່ງອາດເຮັດໃຫ້ຖືກຈໍາຄຸກ 5 ປີ

ຢ່າງໃດກໍ່ຕາມ ພົນເອກ ເໝົາ ຈັນດາຣາ ເຊິ່ງດໍາລົງຕໍາແໜ່ງ ຜູ້ອໍານວຍການກົມຂໍ້ມູນປະຊາກອນຂອງກະຊວງການຄ້າກໍາປູເຈຍ ໃນຊ່ວງທີ່ ທ່ານນາງ ຍິ່ງລັກ ໜີອອກປະເທດ ຢືນຢັນກັບພະນົມເປນ ໂພສ ໃນວັນພະຫັດວ່າ ລັດຖະບານກໍາປູເຈຍບໍ່ເຄີຍອອກໜັງສືເດີນທາງໃຫ້ແກ່ ທ່ານນາງ ຍິ່ງລັກ “ເຮົາບໍ່ຮູ້ວ່າມັນເປັນຂອງປອມຫຼືບໍ່ ແຕ່ເຮົາບໍ່ເຄີຍອອກພາສປອດໃຫ້ຊາວຕ່າງປະເທດ”

ນາຍພົນ ເໝົາ ລະບຸອີກວ່າ ການອອກພາສປອດໃຫ້ຊາວຕ່າງປະເທດນັ້ນຜິດກົດໝາຍຂອງກໍາປູເຈຍ ພວກເຂົາສາມາດອອກໜັງສືເດີນທາງໃຫ້ຊາວຕ່າງປະເທດທີ່ຜ່ານການໂອນສັນຊາດໂດຍພະລາຊະດີກາເຊິ່ງລົງພະນາມໂດຍ ສົມເດັດພຣະຮົມນາດ ນະໂຣດົມ ສີຫະມຸນີ ເທົ່ານັ້ນ “ໃຜແນ່ໃນໂລກນີ້ທີ່ບໍ່ຮູ້ວ່າ ທ່ານນາງ ຍິ່ງລັກເປັນຄົນໄທ ແລະ ອະດີດນາຍົກລັດຖະມົນຕີຂອງໄທ? ແລ້ວທ່ານຈະໃຊ້ພາສປອດກໍາປູເຈຍລົງທະບຽນຈັດຕັ້ງບໍລິສັດໃນຖານະຊາວກໍາປູເຈຍໄດ້ຢ່າງໃດ?”

ດ້ານ ທ່ານ ຂຽວ ໂສພາກ ໂຄສົກກະຊວງການຄ້າກໍາປູເຈຍ ກ່າວວ່າ ໜັງສືເດີນທາງດັ່ງກ່າວອາດເປັນຂອງປອມ ຂະນະທີ່ທ່ານ ປາຍ ສີປານ ໂຄສົກຄະນະລັດຖະມົນຕີກໍາປູເຈຍກ່າວວ່າ ກະຊວງການຄ້າໄດ້ສືບຄົ້ນລາຍການໜັງສືເດີນທາງທີ່ເຄີຍອອກໃຫ້ແກ່ປະຊາຊົນແລ້ວ ແຕ່ບໍ່ພົບຊື່ຂອງ ທ່ານນາງ ຍິ່ງລັກ ເລີຍ

ສ່ວນຜູ້ອໍານວຍການສະຖາບັນຄວາມສໍາພັນລະຫວ່າງປະເທດຂອງຣາດວິທະຍາໄລກໍາປູເຈຍ ລະບຸວ່າ ລາຍງານເລື່ອງ ທ່ານນາງ ຍິ່ງລັກ ມີໜັງສືເດີນທາງຂອງກໍາປູເຈຍນັ້ນ ອາດເປັນເລື່ອງບໍ່ມີມູນ ຫຼື ໜັງສືເດີນທາງດັ່ງກ່າວເປັນຂອງປອມ “ຄວາມເປັນໄປໄດ້ທີ່ 1 ເປັນເລື່ອງຍາກທີ່ຈະເຊື່ອຖືລາຍງານຂອງສື່ຕ່າງປະເທດ ເພາະບາງຄັ້ງພວກເຂົາກໍ່ລາຍງານຂ່າວໂດຍບໍ່ມີມູນ ເຊັ່ນກໍລະນີ ເອເຊຍ ທາມສ ທີ່ລາຍງານວ່າ ຈີນຕັ້ງຖານທັບເຮືອທີ່ແຂວງເກາະກົງ ຂອງກໍາປູເຈຍ ແຕ່ແທ້ຈິງແລ້ວເຮົາບໍ່ມີຖານແບບນັ້ນ”

“ຄວາມເປັນໄປໄດ້ທີ່ 2 ຄື ທ່ານນາງ ຍິ່ງລັກອາດຈະໃຊ້ໜັງສືເດີນທາງກໍາປູເຈຍມາຈາກນອກຂະບວນການຢ່າງເປັນທາງການ ມັນອາດມາຈາກການສົມຄົບຄິດກັບເຈົ້າໜ້າທີ່ທຸຈະລິດ ທີ່ອອກໜັງສືເດີນທາງໃຫ້ ທ່ານນາງ ຍິ່ງລັກ ຢ່າງລັບໆເພື່ອຜົນປະໂຫຍດຂອງຕົນເອງ” ທ່ານກ່າວ

 

 

ຂໍ້ມູນມາຈາກ : ເລົ່າສູ່ກັນຟັງ

 

Leave a Reply

Your email address will not be published. Required fields are marked *

Facebook