ຮົງກົງຢືນຢັນ ທ່ານນາງຍິ່ງລັກ ອະດີດນາຍົກຂອງໄທ ໃຊ້ໜັງສືຜ່ານແດນກຳປູເຈຍ ໃນການຫຼົບໜີອອກຈາກປະເທດ.

ສຳນັກຂ່າວຕ່າງປະເທດລາຍງານ 10 ມັງກອນ 2019 ວ່າ: ຫຼັກຖານໃນຮົງກົງສະແດງໃຫ້ເຫັນຢ່າງຊັດເຈນວ່າ ທ່ານ ນາງ ຍິ່ງລັກ ຊິນນະວັດ ອະດີດນາຍົກລັດຖະມົນຕີຂອງໄທ ໃຊ້ໜັງສືຜ່ານແດນກຳປູເຈຍ ຂຶ້ນທະບຽນໃນຮົງກົງ ຖືເປັນການໃຫ້ນ້ຳໜັກຈາກລາຍງານຂ່າວກ່ອນໜ້າທີ່ວ່າ ທ່ານ ນາງ ໃຊ້ປະເທດກຳປູເຈຍເປັນເສັ້ນທາງໃນການຫຼົບໜີອອກຈາກປະເທດໄທ.

ນອກຈາກການໃຊ້ໜັງສືຜ່ານແດນກຳປູເຈຍ ສຳລັບຂຶ້ນທະບຽນບໍລິສັດແລ້ວ ເມື່ອບໍ່ດົນມານີ້ທ່ານ ນາງ ຍິ່ງລັກ ໄດ້ຮັບການແຕ່ງຕັ້ງໃຫ້ເປັນປະທານບໍລິສັດບໍລິຫານທ່າເຮືອ ໃນມົນທົນກວາງຕຸ້ງ ທາງພາກຕາເວັນອອກສຽງໃຕ້ຂອງຈີນ ຈາກເອກະສານບໍລິສັດທີ່ພົບເຫັນໂດຍສຳນັກຂ່າວ AFP ຂະນະອ້າຍຂອງທ່ານ ນາງ ຍິ່ງລັກ ໄດ້ຂະຫຍາຍທຸລະກິດເຂົ້າສູ່ພາກໃຕ້ຂອງຈີນ.

ທ່ານ ນາງ ຍິ່ງລັກ ແລະ ທ່ານ ທັກສິນ ຊິນນະວັດ ມະຫາເສດຖີຜູ້ເປັນອ້າຍ ຕ່າງກໍ່ເປັນອະດີດນາຍົກລັດຖະມົນຕີຂອງໄທທີ່ມາຈາກການເລືອກຕັ້ງ ແລະ ຖືກກອງທັບກໍ່ການລັດຖະປະຫານຢຶດອຳນາດທັງຄູ່ ໂດຍທ່ານ ທັກສິນ ຖືກໂຄ່ນລົ້ມອຳນາດໃນປີ 2006, ສ່ວນທ່ານ ນາງ ຍິ່ງລັກ ໃນປີ 2014 ເຖິງແມ່ນວ່າໃນປັດຈຸບັນບຸກຄົນທັງສອງຈະລີ້ໄພທາງການເມືອງໃນຕ່າງແດນ ແຕ່ກໍ່ຍັງໄດ້ຮັບການສະໜັບສະໜູນຢ່າງແໜ້ນໜາຈາກປະຊາຊົນຊາວໄທໃນທ້ອງຖິ່ນຊົນນະບົດ ແລະ ກຸ່ມຜູ້ທຸກຍາກ.

ຂໍ້ມູນຈາກເອກະສານຂຶ້ນທະບຽນບໍລິສັດໃນຮົງກົງ ທີ່ສາທາລະນະຊົນທົ່ວໄປສາມາດຄົ້ນຫາໄດ້ ສະແດງໃຫ້ເຫັນວ່າ ທ່ານ ນາງ ຍິ່ງລັກ ຖືໜັງສືຜ່ານແດນກຳປູເຈຍ ແລະ ໃຊ້ຂຶ້ນທະບຽນບໍລິສັດທີ່ທ່ານ ນາງ ດຳລົງຕຳແໜ່ງເປັນຜູ້ອຳນວຍການຊື່ບໍລິສັດ P.T. Corporation Company ລົງວັນທີ 24 ສິງຫາ 2018, ສ່ວນບັນທຶກເປັນທາງການອີກລາຍການໜຶ່ງຂອງຈີນແຜ່ນດິນໃຫຍ່ສະແດງໃຫ້ເຫັນວ່າ ທ່ານ ນາງ ຍິ່ງລັກ ໄດ້ຮັບການແຕ່ງຕັ້ງໃຫ້ເປັນປະທານບໍລິສັດທ່າເຮືອ Shantou International comtainer Terminal (SICT) ໃນມົນທົນກວາງຕຸ້ງ ເມື່ອວັນທີ 21 ທັນວາ 2018.

ຮຸ້ນ 70% ໃນບໍລິສັດ SICT ເປັນຂອງບໍລິສັດເຄືອຂ່າຍທຸລະກິດຂອງທ່ານ ລີ ກາ ຊິງ ມະຫາເສດຖີອັນດັບ 1 ຂອງຮົງກົງ ແຕ່ໂຄສົກຂອງບໍລິສັດແມ່ CK Hutchison ເປີດເຜີຍຕໍ່ສຳນັກຂ່າວ AFP ວ່າ ຮຸ້ນ 70% ຂອງບໍລິສັດເຄືອຂ່າຍດັ່ງກ່າວ ຫາກໍ່ຖືກຂາຍຕໍ່ໃຫ້ນັກທຸລະກິດຊາວສິງກະໂປເມື່ອບໍ່ດົນມານີ້, ສ່ວນຂໍ້ມູນທະບຽນອະສັງຫາລິມະຊັບໃນຮົງກົງສະແດງໃຫ້ເຫັນວ່າ ສະຖານທີ່ຕັ້ງບໍລິສັດ P.T. Corporation Company ຂອງທ່ານ ນາງ ຍິ່ງລັກ ຢູ່ທີ່ຄະລຶຫາດແຫ່ງໜຶ່ງໃນເຂດພີກຂອງຮົງກົງ ໂດຍເຈົ້າຂອງຄະລຶຫາດຄືທ່ານ ນາງ ເສິນ ຮວຍຕັນ ມະຫາເສດຖີນັກທຸລະກິດຊາວສິງກະໂປ-ຈີນ ແລະ ທ່ານ ນາງ ເສິນ ຍັງມີລາຍຊື່ເປັນຜູ້ອຳນວຍການຂອງບໍລິສັດ SICT ອີກດ້ວຍ

 

 

ຂໍ້ມູນມາຈາກ : ເລົ່າສູ່ກັນຟັງ

Leave a Reply

Your email address will not be published. Required fields are marked *