ອິນເດຍຕ້ານເຈົ້າພາບບໍ່ຢູ່! ແຕ່ໂອກາດເຂົ້າຮອບຍັງມີ! ເຕະບານເອຊຽນຄັບ 2019 ນັດທີ 2

ການແຂ່ງຂັນເຕະບານຊາຍ ຊິງແຊ້ມອາຊີ ຫລື ເອຊຽນຄັບ 2019 ທີ່ສະຫະລັດອາຣັບເອມີເຣສ ໃນມື້ວານນີ້ (10 ມັງກອນ 2019) ກຸ່ມ A ນັດທີ 2 ເຈົ້າພາບ ສະຫະລັດອາຣັບເອມີເຣສ (UAE) ອະດີດຮອງແຊ້ມປີ 1996 ພົບກັບ ທິມຊາດອິນເດຍ ອະດີດຮອງແຊ້ມປີ 1964 ນັດທີ 1 ເຈົ້າພາບສະເໝີກັບ ບາເຣນ 1-1 ຂະນະທີ່ ອິນເດຍ ຊະນະ ໄທ 4-1, ນັດນີ້ ເຈົ້າພາບຄອບຄອງບານເດີນເກມບຸກດ້ວຍຄວາມອົດທົນ ເພື່ອຕໍ່ສູ້ກັບເກມຮັບຂອງອິນເດຍ ຂະນະທີ່ ອິນເດຍ ໃຊ້ຈັງຫວະຕອບໂຕ້ໄດ້ດີ ແລະ ມີຈັງຫວະຍິງແບບຈໍ່ໆ ແຕ່ບໍ່ຄົມເໝືອນນັດພົບທິມຊາດໄທ.

ຄວາມພະຍາຍາມຂອງເຈົ້າພາບ ມາປົດລ໊ອກໄດ້ປະຕູຂຶ້ນນຳໃນທ້າຍເຄິ່ງເວລາທີ 1 ຈາກ ຄາວຟານ ມູບາຣັກ (Khalfan Mubarak) ນາທີ 41′ ຈົບເຄິ່ງເວລາທີ 1 ເຈົ້າພາບນຳອິນເດຍ 1-0.

ມາເຄິ່ງຫລັງ ອິນເດຍ ພະຍາຍາມເດີນເກມບຸກ ເພື່ອຫວັງເອົາປະຕູຄືນ ແລະ ສູ້ກັບເຈົ້າພາບໄດ້ຢ່າງຕື່ນເຕັ້ນ ແລະ ໜ້າປະທັບໃຈ ເຖິງວ່າມາເສຍປະຕູທີ 2 ໃນທ້າຍເກມ ຈາກຈັງຫວະສວນກັບຂອງເຈົ້າພາບ ໃນນາທີ 88′ ຈາກ ອາລີ ມາຄຸດ (Ali Mabkhout) ຈົບເກມເຈົ້າພາບ ສະຫະລັດອາຣັບເອມີເຣສ ຊະນະ ອິນເດຍ 2-0 ເກັບ 3 ຄະແນນ ເພີ່ມເປັນ 4 ຄະແນນຈາກ 2 ນັດ ເປັນທິມນຳຂອງກຸ່ມ A ໂອກາດເຂົ້າຮອບ 16 ທິມສົດໃສ, ທີ 2 ອິນເດຍ ມີ 3 ຄະແນນເທົ່າກັບໄທ ແຕ່ປະຕູໄດ້ເສຍອິນເດຍດີກວ່າ +1 ໄທ -2 ສ່ວນບາເຣນມີ 1 ຄະແນນ ຍັງມີໂອກາດເຂົ້າຮອບ.

ນັດສຸດທ້າຍຂອງກຸ່ມ A ເຈົ້າພາບ ສະຫະລັດອາຣັບເອມີເຣສ ພົບ ໄທ ແລະ ອິນເດຍ ພົບ ບາເຣນ ຈະແຂ່ງຂັນໃນວັນທີ 14 ມັງກອນນີ້ ເວລາພ້ອມກັນ 23:00 ສະເພາະ ເຈົ້າພາບ ພົບ ໄທ ຖ້າທິມໃດຊະນະເຂົ້າຮອບທັນທີ! ແຕ່ເຈົ້າພາບຂໍພຽສະເໝີເຂົ້າຮອບ, ຫລື ເສຍບໍ່ຂາດ ເຈົ້າພາບຍັງມີໂອກາດເປັນທີ 3 ດີດສຸດ 1 ໃນ 4 ທິມຈາກ 6 ກຸ່ມ, ໄທ ກໍ່ເຊັ່ນດຽວກັນ ຖ້າສະເໝີ ມີ 4 ຄະແນນຍັງມີໂອກາດເປັນທີສາມ 1 ໃນ 4 ທິມເຂົ້າຮອບຕໍ່ໄປ ແຕ່ຕ້ອງໄປລຸ້ນກັບທີ 3 ຂອງກຸ່ມອື່ນນຳ, ຖ້າວ່າມີ 3 ຄະແນນຍັງລຸ້ນເຂົ້າຮອບລຳບາກ.

ສ່ວນຄູ່ ອິນເດຍ ກັບ ບາເຣນ ອິນເດຍໄດ້ 1 ຄະແນນຍັງມີໂອກາດເຂົ້າຮອບສູງ ເພາະມີປະຕູໄດ້ເສຍ +1 ຫລື ຊະນະ ເຂົ້າຮອບເລີຍ, ສຳລັບ ບາເຣນ ຕ້ອງຊະນະຢ່າງດຽວຈຶ່ງມີໂອກາດເຂົ້າຮອບ.

 

 

ຂໍ້ມູນມາຈາກ : ສະປອດອັບເດດ

 

Leave a Reply

Your email address will not be published. Required fields are marked *