ຈີນ ສະໜັບສະໜູນການປະຊຸມຊັມມິດຮອບ 2 ລະຫວ່າງ “ທຣັມ-ຄິມ”

ສໍານັກຂ່າວຕ່າງປະເທດລາຍງານຈາກນະຄອນປັກກິ່ງ ປະເທດຈີນ ເມື່ອວັນທີ່ 10 ມັງກອນ 2019 ວ່າສໍານັກຂ່າວຊິນຫົວຂອງລັດ ຖະບານປັກກິ່ງ ແລະ ສໍານັກຂ່າວກາງເກົາຫຼີ (ເຄຊີເອັນເອ) ຂອງລັດຖະບານເກົາຫລີເໜືອລາຍງານໃນເວລາໄລເລ່ຍກັນ ເມື່ອວັນພະຫັດ ວ່າ ທ່ານ ຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອ ສໍາເລັດພາລະກິດຢ້ຽມຢາມຈີນທີ່ເລີ່ມຂື້ນໃນວັນຈັນທີ່ຜ່ານ ມາ ເຊິ່ງໃນລະຫວ່າງພົບຫາລືກັບປະທານາທິບໍດີສີ ຈິ້ນຜິງ ຜູ້ນໍາຈີນກ່າວໃນຊ່ວງໜຶ່ງວ່າລັດຖະບານຈີນສະໜັບສະໜູນການ ປະຊຸມຄັ້ງທີ່ 2 ລະຫວ່າງຜູ້ນໍາຂອງເກົາຫຼີເໜືອ ກັບປະທານາທິບໍດີໂດນັລ ທຣັມ ຜູ້ນໍາສະຫະລັດ ແຕ່ການພົບຫາລືໃນຄັ້ງນີ້ “ຄວນມີຂໍ້ບັນລຸຢ່າງເປັນຮູບປະທໍາ” ໃນປະເດັນການປົດນິວເຄຼຍເທິງຄາບສະໝຸດເກົາຫຼີ

ຂະນະດຽວກັນ ທ່ານ ສີກ່າວວ່າສະຫະລັດ ແລະ ເກົາຫຼີເໜືອ “ຄວນພົບກັນເຄິ່ງທາງ” ດ້ານທ່ານຄິມກ່າວກັບຜູ້ນໍາຈີນວ່າເກົາຫຼີ ເໜືອຈະຍຶດໝັ້ນຕາມແນວທາງປະຕິບັດເພື່ອໃຫ້ຄາບສະໝຸດເກົາຫຼີເປັນພື້ນທີ່ປອດນິວເຄຼຍ ແລະ ການແກ້ໄຂຄວາມຂັດແຍ່ງ ທາງການເມືອງເທິງຄາບສະໝຸດເກົາຫຼີດ້ວຍການເຈລະຈາຢ່າງສັນຕິ ເພື່ອນໍາມາເຊິ່ງຜົນຮັບຢ່າງເປັນຮູບປະທໍາ ຕາມຄວາມ ຄາດຫວັງຂອງປະຊາຄົມໂລກ ໂດຍຄໍາກ່າວຂອງທ່ານຄິມເພີ່ມຄວາມເປັນໄປໄດ້ວ່າການພົບຫາລືຄັ້ງທີ່ 2 ກັບຜູ້ນໍາສະຫະລັດ “ຈະເກີດຂື້ນ” ຫຼັງການປະຊຸມຄັ້ງທໍາອິດຈັດຂື້ນທີ່ສິງກະໂປ ເມື່ອເດືອນມິຖຸນາ ປີຜ່ານມາ ແມ່ນວ່າຍັງບໍ່ເປັນທີ່ຊັດເຈນວ່າການ ປະຊຸມຄັ້ງໃໝ່ຈະເກີດຂື້ນເມື່ອໃດ ແຕ່ມີລາຍງານວ່າ ນະຄອນຫລວງບາງກອກ ນະຄອນຫລວງຮ່າໂນ້ຍ ແລະ ເກາະຮາວາຍ ລວມຢູ່ໃນສະຖານທີ່ເຊິ່ງ “ມີຄວາມເປັນໄປໄດ້ຫຼາຍທີ່ສຸດ” ວ່າຈະມີການຂໍໃຊ້ເປັນສະຖານທີ່ຈັດການປະຊຸມຄັ້ງທີ່ 2 ນີ້

ການຢ້ຽມຢາມຈີນຂອງທ່ານ ຄິມ ຖືເປັນຄັ້ງທໍາອິດຂອງປີນີ້ ແລະ ເປັນຄັ້ງທີ່ 4 ນັບຕັ້ງແຕ່ປີຜ່ານມາ ຢ່າງໃດກໍ່ຕາມ ເປັນທີ່ໜ້າສັງ ເກດວ່າການຢ້ຽມຢາມໃນຄັ້ງນີ້ທັງຈີນ ແລະ ເກົາຫຼີເໜືອເກັບຂໍ້ມູນເປັນຄວາມລັບ “ຫຼາຍກວ່າປົກກະຕິ” ໂດຍມີການທະຍອຍເປີດ ເຜີຍລາຍງານຫຼັງທ່ານ ຄິມ ແລະ ຄະນະເດີນທາງອອກຈາກນະຄອນຫລວງປັກກິ່ງດ້ວຍຂະບວນລົດໄຟແລ້ວເທົ່ານັ້ນ ເຊິ່ງນອກ ເໜືອຈາກການພົບຫາລືກັບທ່ານ ສີ ແລ້ວທ່ານ ຄິມຍັງມີໂອກາດເດີນທາງໄປຢ້ຽມຊົມການດໍາເນີນງານຂອງໂຮງງານຜະລິດຢາ ຂອງບໍລິສັດເຢີ໋ນຖັງ ເຊິ່ງໃຊ້ເວລາເດີນທາງດ້ວຍລົດຍົນຈາກນະຄອນປັກກິ່ງປະມານເຄິ່ງຊົ່ວໂມງ.

 

Leave a Reply

Your email address will not be published. Required fields are marked *

Facebook