ເອກະສານຊີ້ “ຫົວເວີ່ຍ” ເຮັດທຸລະກໍາອໍາພາງຜ່ານ 2 ບໍລິສັດໃນ “ອີຣັກ-ຊີເຣຍ”

ຂໍ້ກ່າວຫາກ່ຽວກັບການເຮັດທຸລະກໍາອໍາພາງຂອງບໍລິສັດ ຫົວເວີ່ຍ ເທັກໂນໂລຢີ ຂອງຈີນ ເຊິ່ງນໍາມາສູ່ການຈັບກຸມໂຕນາງ ເມິ່ງ ຫວ່ານໂຈວ ປະທານຝ່າຍການເງິນ (ຊີເອຟໂອ) ຂອງບໍລິສັດ ໂດຍທາງການແຄນາດາຕາມຄໍາຮ້ອງຂອງສະຫະລັດ ເພື່ອໃຫ້ມີການສົ່ງໂຕໃນ ຖານະຜູ້ຮ້າຍຂ້າມແດນ ເນື່ອງຈາກມີການເຮັດທຸລະກໍາອໍາພາງກັບອີຣ່ານ ເຊິ່ງຖືເປັນການລະເມີດມາດຕະການຂວໍ້າບາດ ຂອງສະຫະລັດ ໂດຍນາງເມິ່ງໄດ້ຮັບການປະກັນໂຕເພື່ອລໍຖ້າຕໍ່ສູ້ຄະດີຕາມຄໍາຮ້ອງຂໍສົ່ງຜູ້ຮ້າຍຂ້າມແດນ ເບິ່ງຄືຈະບໍ່ຢຸດຕິລົງງ່າຍໆ

ລ່າສຸດສໍານັກຂ່າວຣອຍເຕີລາຍງານວ່າ ທາງການສະຫະລັດສົງໄສວ່າບໍລິສັດຫົວເວີ່ຍ ໜ້າຈະເຮັດທຸລະກໍາອໍາພາງຜ່ານ 2 ບໍລິສັດໃນ ອີຣ່ານ ໂດຍບໍລິສັດທໍາອິດຄືບໍລິສັດສະກາຍຄອມ ເທກ ເຊິ່ງປະກອບທຸລະກິດຂາຍອຸປະກອນໂທລະຄົມໃນນະຄອນເຕຫະຣານ ຂະນະທີ່ອີກບໍລິສັດໜຶ່ງຄືບໍລິສັດຄານິຄູລາ ໂຮລດິ້ງ ເຊິ່ງເປັນບໍລິສັດລອຍທີ່ຕັ້ງຂື້ນໂດຍຈົດທະບຽນໃນປະເທດມໍຣິເຊຍສ

ທາງການສະຫະລັດກ່າວຫາ ນາງ ເມິ່ງ ວ່າໄດ້ຫຼອກລວງທະນາຄານລະຫວ່າງປະເທດໃຫ້ເຮັດທຸລະກໍາກັບອີຣ່ານດ້ວຍການອ້າງວ່າ ບໍລິສັດທັງ 2 ແຫ່ງນັ້ນເປັນອິດສະຫຼະຈາກຫົວເວີ່ຍ ທັງທີ່ໃນຄວາມເປັນຈິງແລ້ວ ຫົວເວີ່ຍຍັງຄົງຄວບຄຸມບໍລິສັດທັງສອງແຫ່ງຢູ່ ຂະນະທີ່ຫົວເວີ່ຍຢືນຢັນວ່າ ບໍລິສັດທັງສອງເປັນບໍລິສັດທີ່ມີອິດສະຫຼະ ແລະ ບໍ່ໄດ້ມີຄວາມກ່ຽວຂ້ອງໃດໆ ກັບຫົວເວີ່ຍຕາມທີ່ມີການກ່າວຫາ

ຢ່າງໃດກໍ່ດີຣອຍເຕີລາຍງານວ່າ ເມື່ອໄດ້ມີການກວດສອບເອກະສານຂອງບໍລິສັດທັງສອງແຫ່ງທີ່ໃຊ້ໃນອີຣ່ານ ແລະ ຊີເຣຍເຮັດ ໃຫ້ພົບຄວາມເຊື່ອມໂຍງລະຫວ່າງຫົວເວີ່ຍກັບບໍລິສັດທັງສອງຫລາຍກວ່າທີ່ຄິດໃນຕອນທໍາອິດ ໂດຍຜູ້ບໍລິຫານລະດັບສູງຂອງ ຫົວເວີ່ຍຖືກຕັ້ງເປັນຜູ້ຈັດການຂອງສະກາຍຄອມໃນອີຣ່ານ ນອກຈາກນີ້ຍັງພົບວ່າມີບຸກຄົນສັນຊາດຈີນຢ່າງໜ້ອຍ 3 ຄົນທີ່ມີສິດໃນການລົງນາມໃນບັນຊີທະນາຄານເຊິ່ງເປັນຂອງຫົວເວີ່ຍ ແລະ ສະກາຍຄອມໃນອີຣ່ານ ຂະນະທີ່ຫົວເວີ່ຍຍັງເຮັດ ທຸລະກິດໃນຊີເຣຍຜ່ານບໍລິສັດຄານິຄູລາດ້ວຍ

ທັງນີ້ ນາງ ເມິ່ງບໍ່ໄດ້ຕອບຄໍາຖາມໃດໆ ເມື່ອສໍານັກຂ່າວຣອຍເຕີໄດ້ຕິດຕໍ່ໄປເພື່ອສອບຖາມຂໍ້ແທ້ຈິງໃນກໍລະນີດັ່ງກ່າວ

 

Leave a Reply

Your email address will not be published. Required fields are marked *