ສະພາປະຊາຊົນ ແຂວງຫລວງພະບາງ ດຳເນີນກອງປະຊຸມປະຊຸມ ສະໄໝສາມັນ ເທື່ອທີ 6 ຢ່າງເປັນທາງການ

ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ແຂວງຫລວງພະບາງ ຊຸດທີ່ 1 ໄດ້ໄຂຂຶ້ນຢ່າງເປັນທາງການ ໃນຕອນເຊົ້າ ວັນທີ 9 ມັງກອນ 2019, ໂດຍເປັນປະທານ ຂອງ ທ່ານ ສາຍສະໝອນ ຄົມທະວົງ ຮອງເລຂາພັກແຂວງ ປະທານສະພາປະຊາຊົນ ແຂວງ ພ້ອມດ້ວຍຄະນະ. ໃຫ້ກຽດເຂົ້າຮ່ວມກອງປະຊຸມ ມີ ທ່ານ ນາງ ປານີ ຢ່າທໍ່ຕູ້ ກຳມະການກົມການ ເມືອງສູນກາງພັກ ປະທານສະພາແຫ່ງຊາດ ສະມາຊິກສະພາແຫ່ງຊາດ ເຂດເລືອກຕັ້ງທີ 6 ແຂວງຫລວງພະບາງ, ທ່ານ ຄຳຂັນ ຈັນທະວີສຸກ ກຳມະການສູນກາງພັກ ເລຂາພັກແຂວງ ເຈົ້າແຂວງຫລວງພະບາງ, ພ້ອມດ້ວຍສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຕະຫລອດຮອດຜູ້ຕາງໜ້າພະແນກການ, ອົງການທຽບເທົ່າຂອງແຂວງ.

ທ່ານ ສາຍສະໝອນ ຄົມທະວົງ ກ່າວໄຂກອງປະຊຸມ ມີບາງຕອນສຳຄັນວ່າ: ກອງປະຊຸມຄັ້ງນີ້, ຈະໄດ້ຮັບຟັງການລາຍງານໂດຍ ສັງເຂບ ຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ, ແຜນງົບປະມານປະຈຳປີ 2018 ແລະ ທິດທາງແຜນການ 2019 ຂອງ ແຂວງຫລວງພະບາງ; ຮັບຟັງການລາຍງານ ກ່ຽວກັບການຈັດຕັ້ງປະຕິບັດ ວຽກງານລືບລ້າງ ຄວາມທຸກຍາກ ໃຫ້ປະຊາຊົນ ຕາມທິດ 3 ສ້າງ ແລະ ຕາມມະຕິຂອງກອງປະຊຸມ ສະພາປະຊາຊົນແຂວງ ປະຈຳປີ 2018 ແລະ ທິດທາງແຜນການ 2019; ຮັບຟັງການລາຍງານ ກ່ຽວກັບວຽກງານຄຸ້ມຄອງ ບໍລິ ຫານທີ່ດິນຂອງລັດ ແລະ ພິສູດອອກໃບຕາດິນ ຢູ່ແຂວງ ໃນປີ 2018 ແລະ ທິດທາງແຜນການ 2019; ຮັບຟັງການລາຍງານ ກ່ຽວກັບອັດຕາການປະລະການຮຽນ ຂອງນັກຮຽນຊັ້ນ ມັດທະຍົມຕອນຕົ້ນ ແລະ ຕອນປາຍໃນປີ 2018 ແລະ ທິດທາງແຜນການ 2019; ຮັບຟັງການລາຍງານ ກ່ຽວກັບການຈັດຕັ້ງປະ ຕິບັດ ກິດຈະກຳການທ່ອງທ່ຽວໃນປີ 2018 ແລະ ທິດທາງແຜນການ 2019.

ພິຈາລະ ນາ ແລະ ຮັບຮອງເອົາການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ, ແຜນງົບປະມານປະຈຳປີ 2018 ແລະ ທິດທາງແຜນການ 2019 ຂອງແຂວງ; ພິຈາລະນາ ແລະ ຮັບຮອງເອົາການ ຈັດຕັ້ງປະຕິບັດ ເຄື່ອນໄຫວວຽກງານ ປີ 2018 ແລະ ທິດທາງແຜນການ 2019 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ. ພິຈາລະນາ ແລະ ຮັບຮອງເອົາບົດ ລາຍງານ ຂອງອົງການ ກວດສອບປະຈຳພາກ ກ່ຽວກັບການຈັດຕັ້ງ ປະຕິບັດແຜນການເຄື່ອນໄຫວວຽກງານ ປີ 2018 ແລະ ທິດທາງແຜນການເຄື່ອນໄຫວວຽກງານ 2019; ພິຈາລະນາ ແລະ ຮັບຮອງເອົາ ການຈັດຕັ້ງປະຕິບັດ ເຄື່ອນໄຫວວຽກງານປີ 2018 ແລະ ທິດທາງແຜນ 2019 ຂອງສະພາປະຊາຊົນແຂວງ. ພ້ອມນີ້, ຈະໄດ້ພິຈາລະນາ ແລະ ຮັບຮອງເອົານິຕິກຳຂອງແຂວງ ຈຳນວນ 2 ສະບັບ ຄື: ຂໍ້ຕົກລົງຂອງ ທ່ານເຈົ້າແຂວງ ວ່າດ້ວຍການແຕ່ງກາຍ ຂອງສາວບໍລິການຢູ່ຮ້ານອາຫານ ພາຍໃນນະຄອນ ຫລວງພະບາງ ແລະ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຕິດຕັ້ງປ້າຍໂຄສະນາຕ່າງໆ ຢູ່ໃນນະຄອນ ຫລວງພະບາງ.

ຈາກນັ້ນ, ທ່ານ ຄໍາຂັນ ຈັນທະວີສຸກ ໄດ້ຂຶ້ນລາຍງານໂດຍຫຍໍ້ ໃນຂົງເຂດວຽກງານຈຸດສຸມ ກ່ຽວກັບການພັດທະນາ ເສດຖະກິດ-ສັງ ຄົມ ປະຈຳປີ2018 ແລະ ທິດທາງຈຸດສຸມປີ 2019. ໃນໄລຍະ 1 ປີຜ່ານມາ ເຖິງຈະພົບກັບບັນຫາຫຍຸ້ງຍາກ ທາງດ້ານເສດຖະກິດ, ການເງີນ-ງົບປະມານ ແລະ ບັນຫາໜີ້ສີນ ໂຄງການລົງທືນຂອງລັດ ຊຳລະບໍ່ໄດ້ຕາມສັນຍາ ທີ່ສະສົມມາຫລາຍປີສົມຄວນ ແລະ ບັນຫາປະກົດການ ຫຍໍ້ທໍ້ໃນສັງຄົມ ໄດ້ກາຍເປັນສີ່ງທ້າທາຍ ຕໍ່ການປະຕິບັດໜ້າທີ່ ຂອງອົງການປົກຄອງແຕ່ລະຂັ້ນ, ແຕ່ອົງການປົກຄອງແຂວງ ໄດ້ສຸມໃສ່ຄົ້ນຄ້ວາ ແລະ ກຳນົດທິດທາງມາດຕະການ ເພື່ອແກ້ໄຂຄວາມ ຫຍຸ້ງຍາກດ້ານຕ່າງໆ, ໂດຍສະເພາະ ແມ່ນການປະຕິບັດຕາມ 8 ມາດຕະການ ຊຸກຍູ້ເສດຖະກິດ ຂອງລັດຖະບານ, ເຮັດໃຫ້ເສດຖະກິດຂອງແຂວງ ສືບຕໍ່ຂະຫຍາຍຕົວ ໃນລະດັບ 7,8% ຕໍ່ປີ, ເຖິງວ່າບໍ່ໄດ້ຕາມແຜນການທີ່ວາງໄວ້ 8,4% ຕໍ່ປີ ແຕ່ກໍ່ເປັນອັດຕາເຕີບໂຕສູງສົມຄວນ.

 

Leave a Reply

Your email address will not be published. Required fields are marked *