ມອບສານແຕ່ງຕັ້ງທູດລາວ ປະຈຳຕ່າງປະເທດ

ວັນ​ທີ 3 ມັງ­ກອນ 2019 ທີ່​ທຳ​ນຽບ​ປະ­ທານ​ປະ­ເທດ ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ໄດ້​ມອບ​ສານ​ແຕ່ງ­ຕັ້ງ​ໃຫ້​ເອກ​ອັກ​ຄະ​ລັດ​ຖະ​ທູດ​ລາວ 3 ທ່ານ​ໄປ​ປະ­ຈຳ­ການ​ຢູ່​ປະ­ເທດ​ເພື່ອນ​ມິດ​ຄື: ທ່ານ ບຸນ​ທຽງ ບຸບ­ຜາ ຫົວ­ໜ້າ​ສະ​ຖາ​ບັນ​ການ​ຕ່າງ­ປະ­ເທດ ກະ­ຊວງ​ການ​ຕ່າງ­ປະ­ເທດ ເປັນ​ເອກ​ອັກ​ຄະ​ລັດ​ຖະ​ທູດ​ລາວ​ປະ­ຈຳ​ສາ­ທາ­ລະ­ນະ​ລັດ ເກົາ­ຫຼີ ທ່ານ ຄຳ​ພັນ ອັ່ນ​ລາ​ວັນ ຫົວ­ໜ້າ​ຫ້ອງ­ການ ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ເປັນ​ເອກ​ອັກ​ຄະ​ລັດ​ຖະ​ທູດ​ລາວ ປະ­ຈຳ​ສະ­ຫະ­ລັດ​ອາ​ເມ​ຣິ​ກາ ແລະ ທ່ານ ເຮືອງ​ແສງ ຄຳ​ດາ­ລາ​ວົງ ຮອງ​ຫົວ­ໜ້າ​ຫ້ອງ­ການ ເລ­ຂາ​ໜ່ວຍ​ພັກ​ຫ້ອງ­ການ ກະ­ຊວງ​ການ​ຕ່າງ­ປະ­ເທດ ເປັນ​ເອກ​ອັກ​ຄະ​ລັດ​ຖະ​ທູດ​ລາວ ປະ­ຈຳ​ສາ­ທາ­ລະ­ນະ​ລັດ ສະ­ຫະ­ພາບ​ມຽນ​ມາ.

ໂອ­ກາດ​ນີ້ ທ່ານ ບຸນ​ຍັງ ວໍ­ລະ​ຈິດ ໄດ້​ກ່າວ​ສະ­ແດງ​ຄວາມ​ຍິນ​ດີ​ຊົມ­ເຊີຍ​ຕໍ່​ການ​ຮັບ​ພາ­ລະ​ໜ້າ­ທີ່​ອັນ​ໃໝ່​ຄັ້ງ​ນີ້ ອັນ​ເປັນ​ການ​ປະ­ກອບ­ສ່ວນ​ເສີມ​ສ້າງ​ສາຍ​ພົວ­ພັນ​ມິດ­ຕະ­ພາບ​ກັບ​ບັນ­ດາ​ປະ­ເທດ​ເພື່ອນ​ມິດ ພ້ອມ​ທັງ​ເນັ້ນ​ໃຫ້​ທ່ານ​ທູດ​ທັງ​ສາມ ຈົ່ງ​ເອົາ­ໃຈ­ໃສ່​ເຜີຍ­ແຜ່​ໂຄ­ສະ­ນາ​ປະ­ຊາ­ສຳ­ພັນ​ບັນ­ດາ​ລະ­ບຽບ​ກົດ­ໝາຍ ຮີດ­ຄອງ​ປະ­ເພ­ນີ​ວັດ­ທະ­ນະ­ທຳ​ຂອງ​ຊາດ​ລາວ ໃຫ້​ກັບ​ບັນ­ດາ​ປະ­ເທດ​ເພື່ອນ​ມິດ ໄດ້​ຮັບ​ຮູ້​ເຂົ້າ­ໃຈ​ເຊື່ອມ​ຊຶມ ໂດຍ​ສະ­ເພາະ ແນວ­ທາງ​ນະ­ໂຍ­ບາຍ​ຂອງ​ພັກ-ລັດ­ຖະ­ບານ​ຕໍ່​ກັບ​ການ​ຕ່າງ­ປະ­ເທດ ພ້ອມ​ທັງ​ອວຍ­ພອນ​ໄຊ​ໃຫ້​ທູດ​ທັງ 3 ທ່ານ​ຈົ່ງ​ປະ­ສົບ​ຜົນ­ສຳ­ເລັດ ໃນ​ການ​ປະ­ຕິ­ບັດ​ໜ້າ­ທີ່​ການ​ທູດ​ຂອງ​ຕົນ​ຄັ້ງ​ນີ້​ຕື່ມ​ອີກ.

 

Leave a Reply

Your email address will not be published. Required fields are marked *