ສຸດໃຈທ່ອງທ່ຽວ ກຽມຫຼາຍກິດຈະກຳຮອງຮັບປີທ່ອງທ່ຽວ ລາວ – ຈີນ

ແຫຼ່ງທ່ອງທ່ຽວຕ້ອງມີຄວາມແປກໃໝ່ ແລະ ມີຫຼາຍກິດຈະກຳ ເພື່ອດຶງດູງເອົານັກທ່ອງທ່ຽວທັງພາຍໃນ ແລະ ຕ່າງປະເທດ ເປັນທີ່ ຮູ້ຈັກກັນດີການທ່ອງທ່ຽວເປັນຂະແໜງການທີ່ມີທ່າແຮງບໍ່ບົກແຫ້ງໃນການສ້າງລາຍຮັບທີ່ໝັ້ນຄົງໃຫ້ກັບປະເທດຊາດ, ສ້າງລາຍຮັບໃຫ້ປະຊາຊົນ ແລະ ຜູ້ປະກອບການທ່ອງທ່ຽວ ສາມາດປະກອບສ່ວນເຂົ້າໃນການພັດທະນາປະເທດຊາດ ເຊິ່ງສອດຄ່ອງກັບນະໂຍບາຍຂອງລັດຖະບານແຫ່ງ ສປປ ລາວ ທີ່ໄດ້ປະກາດເອົາປີ 2018 ເປັນປີທ່ອງທ່ຽວລາວ ແລະ ປີ 2019 ມີແຜນທີ່ຈະປະກາດເປັນປີທ່ອງທ່ຽວ ລາວ – ຈີນ ຂຶ້ນອີກ ເພື່ອດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມານັບ ມື້ເພີ່ມຫຼາຍຂຶ້ນ.

ເພື່ອຮອງຮັບນັກທ່ອງທ່ຽວດັ່ງກ່າວບັນດາຫົວໜ່ວຍທຸລະກິດທີ່ປິ່ນອ້ອມຂະແໜງການທ່ອງທ່ຽວຕ່າງກໍໄດ້ປັບປຸງ ແລະ ຍົກລະດັບ ການບໍລິການຂອງຕົນເອງ ເຊິ່ງເຫັນໄດ້ຢ່າງເປັນຮູບປະທຳ ຄື: ບໍລິສັດ ສຸດໃຈທ່ອງທ່ຽວ ທີ່ໄດ້ຍົກລະດັບການບໍລິການຂອງຕົນເອງ ຂຶ້ນຕື່ມ ເປັນຕົ້ນລະບົບຈອງໂປຣແກຣມນຳທ່ຽວຜ່ານທາງອອນລາຍ, ເພີ່ມຄວາມແປກໃໝ່ ແລະ ຫຼາຍກິດຈະກຳໃນແຫຼ່ງ ທ່ອງທ່ຽວທຳມະຊາດສຸດໃຈ.

ສຳລັບຄໍລຳສຳພາດພິເສດໃນມື້ນີ້ ທາງທີມງານໄດ້ມີໂອກາດສຳພາດຜູ້ອຳນວຍການ ບໍລິສັດ ສຸດໃຈທ່ອງທ່ຽວ ກ່ຽວກັບການພັດທະນາແຫຼ່ງທ່ອງທ່ຽວໃຫ້ມີຄວາມແປກໃໝ່, ມີຫຼາຍກິດຈະກຳຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ເປັນຕົ້ນ ການຂີ່ຊ້າງ, ຂີ່ສະລິງ, ຕຶກເບັດ ແລະ ອື່ນໆ ສາມາດດຶງດູດເອົານັກທ່ອງທ່ຽວຈາກອາຊີ ໄດ້ເປັນຢ່າງດີ ໂດຍສະເພາະແມ່ນນັກທ່ອງທ່ຽວຈາກ ສປ ຈີນ ແລະ ສ.ເກົາຫຼີ.

ອີງຕາມການເປີດເຜີຍຂອງ ທ່ານ ເຄນ ວົງທອງຈິດ ຜູ້ອຳນວຍການ ບໍລິສັດ ສຸດໃຈທ່ອງທ່ຽວ ຈຳກັດຜູ້ດຽວ ໃຫ້ຮູ້ວ່າ: ບໍລິສັດ ສຸດໃຈ ເປັນບໍລິສັດທ່ອງທ່ຽວທີ່ໄດ້ແຮງຈູງໃຈຈາກນັກທ່ອງທ່ຽວ ໄດ້ມີແນວຄິດທີ່ວ່າ: ຢາກເປີດກິດຈະກຳຂຶ້ນມາ ຄື: ສ້າງແຫຼ່ງທ່ອງ ທ່ຽວທາງທຳມະຊາດ ເນື່ອງຈາກວ່າ ບໍລິສັດຂອງພວກເຮົາແມ່ນມີລູກຄ້າເຂົ້າມາໃຊ້ບໍລິການເປັນຈຳນວນຫຼາຍ ແລະ ໄດ້ຈັດໂປຣ ແກຣມທົວຕັ້ງແຕ່ເໜືອຮອດໃຕ້, ອີກຢ່າງໜຶ່ງແຫຼ່ງທ່ອງທ່ຽວທາງທຳມະຊາດໃນນະຄອນຫຼວງວຽງຈັນ ຍັງມີຫຼາຍ ແລະ ຍັງບໍ່ສາມາດຮອງຮັບຄວາມຮຽກຮ້ອງຕ້ອງການຂອງລູກຄ້າ ກໍຄືນັກທ່ອງທ່ຽວໄດ້ ບວກກັບເມືອງສີໂຄດຕະບອງ ທີ່ມີທ່າແຮງ ແລະ ມີຊື່ສຽງໃນການທ່ອງທ່ຽວທາງທຳຊາດ ເປັນຕົ້ນ ຕາດມູນ, ວັງນ້ຳເຜິ້ງ ແລະ ອື່ນໆ ເຊິ່ງທ່າແຮງດັ່ງກ່າວບໍລິການໄດ້ແມ່ນລະດູຝົນ ແລະ ຍັງບໍ່ຕໍ່ເນື່ອງ. ດັ່ງນັ້ນ, ຈຶ່ງໄດ້ສ້າງແຫຼ່ງທ່ອງທ່ຽວທຳມະຊາດສຸດໃຈ ຂຶ້ນທີ່ບ້ານຈຳປາ ເມືອງສີໂຄດຕະບອງ ຫວັງເປັນສ່ວນໜຶ່ງ ໃນການບໍລິການລູກຄ້າ ແລະ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ໂດຍໄດ້ເນັ້ນໃຫ້ມີຫຼາຍກິດຈະກຳຮອງຮັບນັກທ່ອງທ່ຽວ ເປັນຕົ້ນ: ຂີ່ຊ້າງ, ຂີ່ສະລິງ, ຕຶກເບັດ, ຕູບນັ່ງກິນເຂົ້າ, ມີບ່ອນພັກຜ່ອນທີ່ງຽບສະຫງົບດີ, ຫຼິ້ນນ້ຳ ແລະ ອື່ນໆ.

ທ່ານ ເຄນ ວົງທອງຈິດ ກ່າວຕື່ມວ່າ: ຜ່ານການເປີດໄລຍະ 2 – 3 ປີຜ່ານມາ ເຫັນວ່າໄດ້ຮັບການຕອບຮັບທີ່ໜ້າພໍໃຈຈາກລູກ ຄ້າພາຍໃນ ແລະ ຕ່າງປະເທດ ເຊິ່ງໄດ້ສ້າງກຳລັງແຮງເພື່ອໃຫ້ບໍລິສັດໄດ້ພັດທະນາ ແລະ ສ້າງກິດຈະກຳຫຼາກຫຼາຍຂຶ້ນ ເພື່ອຮອງຮັບນັກທ່ອງທ່ຽວທີ່ຈະມາເພີ່ມໃນຕໍ່ໜ້າ. ສຳລັບກິດຈະກຳຂີ່ສະລິງ ແມ່ນໄດ້ເປີດທົດລອງມາແຕ່ທ້າຍປີ 2018 ເປັນຕົ້ນມາ ແລະ ຈະໄດ້ເປີດເປັນທາງການໃນຕົ້ນປີ 2019 ນີ້ ໂດຍກຳນົດຂີ່ສະລິງມີ 13 ຈຸດ, ຂົວໄຕ່ 2 ຈຸດ ຍາວ 2 ກິໂລແມັດ ເຊິ່ງຈະເປັນຈຸດເດັ່ນທີ່ດຶງດູດເອົານັກທ່ອງທ່ຽວເຂົ້າມາເພີ່ມຫຼາຍຂຶ້ນ.

ທ່ານຜູ້ອຳນວຍການ ບໍລິສັດ ສຸດໃຈທ່ອງທ່ຽວ ກ່າວວ່າ: ພາບລວມໃນການດຳເນີນທຸລະກິດປີ 2018 ເຖິງຈະເປັນປີທ່ອງທ່ຽວລາວ ແຕ່ຕົວເລກການມາໃຊ້ບໍລິການແມ່ນຫຼຸດລົງເລັກໜ້ອຍ ຖ້າທຽບໃສ່ປີ 2017. ແຕ່ເຖິງຢ່າງໃດກໍຕາມ, ສຳລັບຕົວເລກທີ່ລູກຄ້າ ມາໃຊ້ບໍລິການໃນປີ 2018 ສປ ຈີນ ກວມເອົາ 50%, ສ.ເກົາຫຼີ 40% ( ຫຼຸດລົງທຽບໃສ່ປີຜ່ານມາ ), ແຂກພາຍໃນ 5% ແລະ ແຂກຕ່າງປະເທດ 5%. ສ່ວນປີ 2019 ບໍລິສັດຕັ້ງເປົ້າທີ່ຈະສາມາດດຶງດູດເອົານັກທ່ອງທ່ຽວຈີນ ໃຫ້ເພີ່ມຂຶ້ນອີກ 30% ແລະ ເກົາຫຼີ ຂຶ້ນເຊັ່ນກັນ ເພື່ອຕ້ອນຮັບ ແລະ ຮອງຮັບການເປີດປີທ່ອງທ່ຽວ ລາວ – ຈີນ ແລະ ບັນດານັກທ່ອງທ່ຽວຕ່າງໆໃນປີ 2019 ນີ້ທາງບໍລິສັດໄດ້ກະກຽມ ແລະ ມີຄວາມພ້ອມຫຼາຍດ້ານ ເປັນຕົ້ນຍານພາຫະນະ, ພະນັກງານບໍລິການນຳທ່ຽວ ແລະ ອື່ນໆ ໂດຍໃນປີ 2018 ພັດທະນາລະບົບການຈອງຜ່ານລະບົບທາງອອນລາຍ ສາມາດອຳນວຍຄວາມສະດວກໃຫ້ກັບລູກຄ້າໄດ້ເຂົ້າເຖິງການບໍ ລິການຂອງ ບໍລິສັດ ສຸດໃຈ ນັບມື້ເພີ່ມຂຶ້ນ, ກວ້າງຂວາງ ແລະ ຮອງຮັບແຂກນັກທ່ອງທ່ຽວທັງພາຍໃນ ແລະ ຕ່າງປະເທດ ຈອງຜ່ານລະບົບ ແລະ ຊຳລະຜ່ານທະນາຄານ ເຊິ່ງພາຍຫຼັງທີ່ໄດ້ພັດທະນາກໍມີລູກຄ້າ    ສ.ເກົາຫຼີ ກວມເອົາ 70% ທີ່ຈອງຜ່ານ ລະບົບດັ່ງກ່າວ ( http://www.soutchaitravel.com ).

ສຳລັບຄວາມຫຍຸ້ງຍາກໃນໄລຍະຜ່ານມາ ອັນທຳອິດແມ່ນຂອດບໍລິການຂອງພາກສ່ວນທີ່ກ່ຽວຂ້ອງ ກ່ຽວກັບການແລ່ນເອກະສານ ນຳທ່ຽວຍັງບໍ່ທັນສະໄໝ ( ຍັງບໍ່ເອກະພາບກັນ ) ຍັງໃຊ້ເວລາເປັນມື້ ເຖິງຈະປັບໃຫ້ຫຼຸດຂັ້ນຕອນລົງຫຼາຍແລ້ວ ເມື່ອທຽບກັບ 2 – 3 ປີຜ່ານມາ. ສ່ວນປີ 2019 ການແລ່ນເອກະສານຄວນປັບປຸງຈາກ 1 ມື້ ເຫຼືອພຽງ 2 – 3 ຊົ່ວໂມງ ຍິ່ງເປັນການດີ. ເຖິງຢ່າງໃດກໍຕາມ, ປີ 2019 ນີ້ລັດຖະບານກຽມຈະເປີດປີທ່ອງທ່ຽວ ລາວ – ຈີນ ທາງບໍລິສັດຂອງພວກເຮົາກໍພ້ອມແລ້ວທີ່ຈະໃຫ້ບໍລິການ.

 

( ຂ່າວ: ສົມລົດ, ຮູບ: ສຸກສະຫວັນ )

Leave a Reply

Your email address will not be published. Required fields are marked *