ປຶກສາຫາລືວຽກຈັດສັນຍົກຍ້າຍ ແລະ ຊົດເຊີຍ ຜົນກະທົບໂຄງການເຂື່ອນໄຟຟ້ານໍ້າເທີນ 1

ທ້າຍເດືອນທັນວາ 2018 ຜ່ານມາ ຢູ່ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊ, ພະແນກສັງຄົມ – ສິ່ງແວດລ້ອມ ບໍລິສັດ ໄຟຟ້ານໍ້າເທີນ 1 ຮ່ວມກັບຄະນະກຳມະການຍົກຍ້າຍຈັດສັນຂັ້ນແຂວງ ໄດ້ຈັດກອງປະຊຸມປຶກສາຫາລືວຽກງານຈັດສັນຊົດເຊີຍຜົນ ກະທົບ ແລະ ການປະຕິບັດແລວສາຍສົ່ງໄຟຟ້າແຮງສູງ 500 KV ຂອງໂຄງການເຂື່ອນໄຟຟ້ານໍ້າເທີນ 1 ເຂດຮັບຜິດຊອບຂອງ ແຂວງບໍລິຄໍາໄຊ ໂດຍການເປັນປະທານຂອງ ທ່ານ ບຸນເສັງ ປະທໍາມະວົງ ຮອງເຈົ້າແຂວງໆບໍລິຄໍາໄຊ ຮອງປະທານຄະນະກຳມະການ ຍົກຍ້າຍຈັດສັນເຂື່ອນໄຟຟ້ານໍ້າເທີນ 1 ຂັ້ນແຂວງ, ມີບັນດາຄະນະກໍາມະການຍົກຍ້າຍຈັດສັນຂັ້ນແຂວງ – ເມືອງ ແລະ ພະແນກການທີ່ກ່ຽວຂ້ອງເຂົ້າຮ່ວມ.

ຈຸດປະສົງຂອງກອງປະຊຸມໃນຄັ້ງນີ້ ເພື່ອປຶກສາຫາລືກ່ຽວກັບການຄຸ້ມຄອງຕິດຕາມກວດກາການກໍ່ສ້າງພື້ນຖານໂຄງລ່າງຕ່າງໆ ຢູ່ເຂດບ້ານຈັດສັນໃໝ່ ບ້ານຫ້ວຍຫອຍ ເມືອງວຽງທອງ ແຂວງບໍລິຄຳໄຊ, ກອງປະຊຸມໄດ້ປຶກສາຫາລື ແລະ ແກ້ໄຂຂໍ້ຄົງຄ້າງຕ່າງໆ ກ່ຽວກັບການຈັດສັນຍົກຍ້າຍ ແລະ ທົດແທນຄ່າເສຍຫາຍຕໍ່ຊັບສິນທີ່ໄດ້ຮັບຜົນກະທົບຈາກການກໍ່ສ້າງເຂື່ອນໄຟຟ້ານໍ້າເທີນ 1 ແລະ ການກໍ່ສ້າງແລວສາຍສົ່ງໄຟຟ້າແຮງສູງ 500 KV.

ສະນັ້ນ, ອີງໃສ່ການປຸກລະດົມພໍ່ແມ່ປະຊາຊົນໃນການຕັດສິນໃຈຍົກຍ້າຍຕາມແຜນມີ 50% ຂອງຈໍານວນຄອບຄົວທັງໝົດ, ອີງໃສ່ ຄວາມເໝາະສົມຂອງເນື້ອທີ່ບ້ານຈັດສັນໃໝ່, ອີງຕາມການຕົກລົງເຫັນດີຂອງບໍລິສັດ ແລະ ຄະນະກໍາມະການຊີ້ນໍາວຽກງານຈັດ ສັນຍົກຍ້າຍ ແລະ ທົດແທນຄ່າເສຍຫາຍ ຈຶ່ງໄດ້ກໍານົດເອົາ ບ້ານຫ້ວຍຫອຍ ເປັນເຂດຈັດສັນຍົກຍ້າຍໃໝ່ ເຊິ່ງມີເນື້ອທີ່ດິນປຸກສ້າງ ທັງໝົດ 75 ເຮັກຕາ ແລະ ດິນແຮ ເພື່ອຂະຫຍາຍ 35 ເຮັກຕາ ໃນເນື້ອທີ່ດັ່ງກ່າວສາມາດປຸກເຮືອນໄດ້ທັງໝົດ 400 ຫຼັງຄາ ມີໂຮງ ຮຽນອະນຸບານ, ໂຮງຮຽນປະຖົມ ແລະ ມັດທະຍົມ, ມີໂຮງໝໍຂະໜາດນ້ອຍ, ມີຫ້ອງການບ້ານ, ຕະຫຼາດຊຸມຊົນ, ຄິວລົດ ແລະ ສະໂມສອນບ້ານ. ພ້ອມນີ້, ກອງປະຊຸມຍັງໄດ້ຕີລາຄາຄືນການປະຕິບັດວຽກງານແລວສາຍສົ່ງໄຟຟ້າ 500 KV ແລະ 115 KV ມີການວາງແຜນຕິດຕາມທຸກຂັ້ນຕອນການຈັດຕັ້ງປະຕິບັດວຽກງານບຸກເບີກ ທະລຸແລວຕາມແຜນທີ່ກໍານົດໄວ້ ກວດກາຄືນ ແຕ່ລະຈຸດແຕ່ລະບ້ານທີ່ບໍ່ກະຈ່າງແຈ້ງ ຕໍ່ວຽກງານຊົດເຊີຍຕ່າງໆຂອງວຽກທົດແທນຄ່າເສຍຫາຍຈາກຜົນກະທົບຕ່າງໆ.

 

Leave a Reply

Your email address will not be published. Required fields are marked *