ບໍລິສັດ ອຳມະຕະ ຄໍປໍເຣເຊິນ ກຽມສຶກສາສ້າງເມືອງທັນສະໄໝ ຢູ່ອຸດົມໄຊ ແລະ ຫຼວງນໍ້າທາ

ແຂວງອຸດົມໄຊ ຈະມີໂສມໜ້າໃໝ່ ຫາກໂຄງການກໍ່ສ້າງເມືອງທັນສະໄໝ AMATA Smart & Eco City ໄດ້ເກີດຂຶ້ນ ເນື່ອງຈາກ ກ່ອນໜ້ານີ້ ລັດຖະບານ ກັບ ບໍລິສັດ ໄດ້ມີການເຊັນບົດບັນທຶກ ຄວາມເຂົ້າໃຈສຶກສາຄວາມເປັນໄປໄດ້ MOU ຮ່ວມກັນມາແລ້ວ ແລະ ຫຼ້າສຸດໃນວັນທີ 1 ມັງກອນ 2019 ບໍລິສັດ ອຳມະຕະ ຄໍປໍເຣເຊິນ ຈຳກັດ ( ມະຫາຊົນ ) ກໍໄດ້ລົງນາມບົດບັນທຶກຮ່ວມກັບອົງ ການປົກຄອງແຂວງເພື່ອເປັນການຊຸກຍູ້ໃຫ້ໂຄງການມີຄວາມຄືບໜ້າ ເຊິ່ງໂຄງການສ້າງເມືອງໃໝ່ແຫ່ງນີ້ແມ່ນມີຂອບເຂດເນື້ອ ທີ່ກວມເອົາ 2 ເມືອງ ໃນ 2 ແຂວງ ຄື: ເມືອງນາໝໍ້ ແຂວງອຸດົມໄຊ ແລະ ເມືອງຫຼວງນໍ້າທາ ແຂວງຫຼວງນໍ້າທາ.

ບໍລິສັດ ອຳມະຕະ ຄໍປໍເຣເຊິນ ຈຳກັດ ( ມະຫາຊົນ ) ສົນໃຈສ້າງເມືອງທັນສະໄໝ ຫຼື ເອີ້ນວ່າ: AMATA Smart & Eco City ຢູ່ແຂວງອຸດົມໄຊ. ໃນວັນທີ 1 ມັງກອນ 2019 ນີ້ ໄດ້ມີການເຊັນບົດບັນທຶກຄວາມເຂົ້າໃຈ ( MOU ) ລະຫວ່າງ ອົງການປົກຄອງ ແຂວງອຸດົມໄຊ ກັບ ບໍລິສັດ ອຳມະຕະ ຄໍປໍເຣເຊິນ ຈຳກັດ ( ມະຫາຊົນ ) ຂຶ້ນ, ຢູ່ທີ່ຫ້ອງວ່າການປົກຄອງແຂວງອຸດົມໄຊ ໂດຍຕາງໜ້າການລົງນາມອົງການປົກຄອງແຂວງອຸດົມໄຊ ແມ່ນ ທ່ານ ຄຳພັນ ເຜີຍຍະວົງ ເຈົ້າແຂວງໆອຸດົມໄຊ ແລະ ຕາງໜ້າ ຝ່າຍບໍລິສັດ ແມ່ນ ທ່ານ ວິກົມ   ກົມມະດິດ ປະທານເຈົ້າໜ້າທີ່ບໍລິຫານ ບໍລິສັດ ອຳມະຕະ ຄໍປໍເຣເຊິນ ຈຳກັດ ໂດຍມີບັນດາການນໍາ ຂອງແຂວງ, ເມືອງ ແລະ ບໍລິສັດເຂົ້າຮ່ວມ.

ໂດຍທັງສອງຝ່າຍຕົກລົງເຫັນດີໃນການຊຸກຍູ້ໂຄງການພັດທະນາເມືອງທັນສະໄໝ ທີ່ແຂວງອຸດົມໄຊ ເຊິ່ງບົດບັນທຶກຂໍ້ຕົກລົງ ຄວາມຮ່ວມມືສະບັບນີ້ແມ່ນເພື່ອເປັນການຈັດຕັ້ງຜັນຂະຫຍາຍບົດບັນທຶກຄວາມເຂົ້າໃຈທີ່ບໍລິສັດໄດ້ເຊັນກັບລັດຖະບານ ແຫ່ງ ສປປ ລາວ ຄັ້ງວັນທີ 2 ເມສາ 2018 ເພື່ອສຶກສາ, ສຳຫຼວດຄວາມເປັນໄປໄດ້ຂອງໂຄງການພັດທະນາ ເມືອງທັນສະໄໝ ທີ່ແຂວງອຸ ດົມໄຊ ສະເພາະໃນຂອບເຂດພື້ນທີ່ການສຶກສາ 70 ກິໂລຕາແມັດ ແລະ ຈະຂໍຂະຫຍາຍເພີ່ມເປັນ 200 ກິໂລຕາແມັດໃນອະນາຄົດ ໂດຍມີເປົ້າໝາຍ ເພື່ອເປັນການຜັນຂະຫຍາຍແນວຄິດລິເລີ່ມໃນການສ້າງຕົວເມືອງທັນສະໄໝ ( AMATA Smart & Eco City ) ແລະ ຍັງເປັນການຜັນປ່ຽນ ສປປ ລາວ ທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດທີ່ມີການເຊື່ອມຕໍ່ກັບບັນດາປະເທດ ໃນເຂດພາກພື້ນ, ສ້າງໃຫ້ເປັນຕົວເມືອງຕົ້ນແບບແຫ່ງອະນາຄົດ ເຊິ່ງໃນບົດບັນທຶກສະບັບນີ້ ບໍລິສັດຈະເປັນຜູ້ສຳປະທານທີ່ດິນ ຈາກລັດຖະບານຂອງ ສປປ ລາວ ເພື່ອພັດທະນາເມືອງທັນສະໄໝ ແລະ ເຂດການຂົນສົ່ງທີ່ທັນສະໄໝຕາມແນວທາງການພັດ ທະນາຢ່າງຍືນຍົງ ແລະ ເປັນມິດຕໍ່ສິ່ງແວດລ້ອມ ເພື່ອຍົກລະດັບຊຸມຊົນໃຫ້ທັນສະໄໝ ແລະ ເປັນມິດຕໍ່ກັບສິ່ງແວດລ້ອມ ພ້ອມທັງຍັງສະໜັບສະໜູນໃນການສ້າງວຽກເຮັດງານທຳ ແລະ ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ ໂດຍ ບໍລິສັດ ຈະເປັນເຈົ້າການໃນການສຶກສາ, ວິໄຈຄວາມເປັນໄປໄດ້ທາງດ້ານເສດຖະກິດ – ເຕັກນິກສັງຄົມຂອງໂຄງການ ແລະ ຊອກຫາແຫຼ່ງ ທຶນ, ເຕັກນິກ, ຂາຫຸ້ນ ຫຼື ລູກຄ້າ ທັງພາຍໃນ ແລະ ຕ່າງປະເທດ ຈາກບັນດາຜູ້ຮ່ວມພັດທະນາມາລົງທຶນ ເຊິ່ງມີເປົ້າໝາຍທີ່ຈະ ເລີ່ມການກໍ່ສ້າງ ໃນປີ 2019.

 

[ ຂ່າວ: ໄມພອນ ]

Leave a Reply

Your email address will not be published. Required fields are marked *

Facebook