ກອງປະຊຸມສະພາປະຊາຊົນນະຄອນຫຼວງວຽງຈັນ ປິດລົງດ້ວຍຜົນສຳເລັດຢ່າງຈົບງາມ

ກອງປະຊຸມສະໄໝສາມັນເທື່ອທີ VI ສະພາປະຊາຊົນນະຄອນຫຼວງວຽງຈັນຊຸດທີ I ໄດ້ປິດລົງດ້ວຍຜົນສໍາເລັດຢ່າງ ຈົບງາມ ໃນວັນທີ 28 ທັນວາຜ່ານມາ ທີ່ສໍານັກງານປົກ ຄອງນະຄອນຫຼວງວຽງຈັນ ໂດຍການເປັນປະທານຂອງ ທ່ານ ອານຸພາບ ຕຸນາລົມ ປະທານສະ ພາປະຊາຊົນນະຄອນຫຼວງວຽງຈັນ ແລະ ໃຫ້ກຽດເຂົ້າຮ່ວມຂອງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍຫົວໜ້າພະແນກການອ້ອມຂ້າງ, ເຈົ້າເມືອງ 9 ຕົວເມືອງ ແລະ ສະມາຊິກສະພາແຫ່ງຊາດເຂົ້າຮ່ວມ.

ຄຳຄິດຄຳເຫັນຢ່າງມີເຫດຜົນ ມີເນື້ອໃນທີ່ເລິກເຊິ່ງ ພ້ອມທັງມີຄວາມເປັນເອກະພາບດັ່ງນີ້: ຮັບຮອງເອົາບົດລາຍງານຂອງອົງ ການປົກຄອງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຜນງົບປະມານປະຈໍາປີ 2018 ແລະ ທິດທາງ ແຜນການປີ 2019 ບົດລາຍງານຂອງອົງການກວດສອບແຫ່ງລັດປະຈໍາພາກກາງກ່ຽວກັບການຈັດຕັ້ງປະຕິບັດແຜນການເຄື່ອນ ໄຫວວຽກງານປະຈໍາປີ 2018 ແລະ ທິດທາງແຜນການປະຈໍາປີ 2019 ແລະ ຮັບຮອງເອົາບົດລາຍງານຜົນຂອງການກວດສອບບົດ ສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານ ແຫ່ງລັດປະຈໍາປີ 2017 ຂອງນະຄອນຫຼວງວຽງຈັນ (ນວ) ຮັບຮອງເອົາການ ສະເໜີຍົກຍ້າຍທ່ານຫົວໜ້າພະແນກສາທາລະນະສຸກ ນວ ຜູ້ເກົ່າໄປຮັບໜ້າທີ່ໃໝ່ຢູ່ກະຊວງສາທາລະນະສຸກ ແລະ ຮັບຮອງເອົາ ການສະເໜີແຕ່ງຕັ້ງຫົວໜ້າພະແນກສາທາລະນະສຸກ ນວ ຜູ້ໃໝ່ ຮັບຮອງເອົາບົດລາຍງານການຈັດຕັ້ງປະຕິບັດແຜນການ ເຄື່ອນໄຫວວຽກງານປະຈໍາປີ 2018 ແລະ ທິດທາງແຜນການປະຈໍາປີ 2019 ຂອງອົງການໄອຍະການປະຊາຊົນ ແລະ ສານປະຊາຊົນ ນວ ແລະ ຮັບຮອງເອົາບົດລາຍງານການເຄື່ອນໄຫວວຽກງານປະຈໍາປີ 2018 ແລະ ທິດທາງແຜນການປະຈໍາປີ 2019 ຂອງສະພາປະ ຊາຊົນ ນວ ຊຸດທີ I ພ້ອມນັ້ນກອງປະຊຸມຍັງໄດ້ຮັບຮອງເອົາບົດລາຍງານການຊີ້ແຈງບາງບັນຫາສໍາຄັນ ແລະ ພົ້ນເດັ່ນຂອງ ນວ ຄື: ບັນຫາການຊົດເຊີຍໃຫ້ປະຊາຊົນທີ່ຖືກຜົນກະທົບຈາກບາງໂຄງການພັດທະນາ ບາງບັນຫາການນໍາໃຊ້ສານເຄມີ ການສ້າງມົນລະ ພິດຕໍ່ສິ່ງແວດລ້ອມ ບັນຫາການອອກໃບຕາດິນ ການກໍ່ສ້າງເສັ້ນທາງທີ່ບໍ່ໄດ້ມາດຕະຖານ ແລະ ຊັກຊ້າ ການຕິດຕາມກວດກາ ການເກັບຄ່າທໍານຽມຕ່າງໆຢູ່ຂັ້ນເມືອງ ຂັ້ນບ້ານ ບາງບັນຫາການດໍາເນີນຄະດີຊັກຊ້າ ການແກ້ໄຂບັນຫາຢາເສບຕິດ ແລະ ບັນຫາສໍາຄັນອີກຈໍານວນໜຶ່ງທີ່ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ I ແລະ ສະມາຊິກສະພາປະຊາຊົນ ນວ ໄດ້ຊັກຖາມໃນກອງປະຊຸມຄັ້ງນີ້.

ການດໍາເນີນກອງປະຊຸມດັ່ງກ່າວເຫັນວ່າມີຫຼາຍດ້ານສືບຕໍ່ໄດ້ຮັບການປັບປຸງ ແລະ ຍົກລະດັບທາງດ້ານຄຸນນະພາບເປັນຕົ້ນ ການປະກອບຄໍາເຫັນ ແລະ ການຕັ້ງຄໍາຊັກຖາມຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ໄດ້ຮັບການຍົກລະດັບດີຂຶ້ນ ມີຈຸດສຸມ ແລະ ຮັກສາເວລາໄດ້ດີ ອົງການປົກຄອງ ນວ ແລະ ອົງການກ່ຽວຂ້ອງໄດ້ເອົາໃຈໃສ່ກະກຽມ ເນື້ອໃນບົດລາຍງານຕໍ່ກອງປະຊຸມ ມີການອະທິບາຍຊີ້ແຈງຕໍ່ຄໍາຊັກຖາມຢ່າງລະອຽດ ຊັດເຈນດີສົມຄວນ ມີຄວາມຈິງໃຈ ແລະ ຮັບເອົາຄວາມຄິດເຫັນຂອງຜູ້ແທນກອງປະຊຸມໄປພິຈາລະນາເພື່ອປັບປຸງເນື້ອໃນ ແລະ ການປະຕິບັດວຽກງານຕົວຈິງໃນຂະ ແໜງການຂອງຕົນໃຫ້ດີຂຶ້ນ.

Leave a Reply

Your email address will not be published. Required fields are marked *