ປກສ ເມືອງຫົງສາ ຈັບ 2 ຍິງສາວ ຜູ້ຖືກຫາລັກຊັບພົນລະເມືອງ ມູນຄ່າເສຍຫາຍ 60 ລ້ານກວ່າກີບ

ເມື່ອບໍ່ດົນມານີ້ ເຈົ້າໜ້າທີ່ ປກສ ເມືອງຫົງສາ ຈັບຜູ້ຖືກຫາລັກຊັບພົນລະເມືອງ ຈໍານວນ 2 ຄົນ, ລວມມູນຄ່າເຄື່ອງທີ່ຖືກລັກ 60 ລ້ານກວ່າກີບ. ຜ່ານການສືບສວນສອບສວນຂອງເຈົ້າໜ້າທີ່ ປກສ ເມືອງຫົງສາ ໄດ້ໃຫ້ຮູ້ວ່າ: ໃນເວລາປະມານ 14:00 ໂມງ ຂອງວັນທີ 23 ພະຈິກ 2018 ທີ່ຜ່ານມາ ນາງ ໄລວັນ ຈັນທະກຸນ ອາຍຸ 31 ປີ ອາຊີບວ່າງງານ ແລະ ນາງ ນອດ ໄຊສະຫວັດ ອາຍຸ 30 ປີ ອາຊີບຄ້າຂາຍ ທັງສອງຢູ່ເມືອງຫົງສາ ແຂວງໄຊຍະບູລີ ໄດ້ພາກັນຂັບຂີ່ລົດຈັກອອກຈາກບ້ານສີມຸງຄຸນ ເມືອງຫົງສາ ເຄື່ອນໄຫວຊອກລັກຊັບພົນລະເມືອງ ເພື່ອນໍາໄປໃຊ້ໜີ້ສິນທີ່ໄດ້ກູ້ຢືມມາຈາກການໃຊ້ຈ່າຍຫຼິ້ນການພະນັນ.

ເມື່ອຂັບຂີ່ລົດຈັກໄປຮອດທາງສີ່ແຍກບ້ານສີບຸນເຮືອງ ທັງສອງໄດ້ພົບ ຊາຍເຖົ້າຄົນໜຶ່ງຢູ່ເຮືອນຄົນດຽວ ທັງສອງຈຶ່ງຈອດລົດຈັກແລ້ວ ແລະ ໄດ້ວາງແຜນລັກຊັບ, ໂດຍໃຫ້ນາງ ນອດ ເປັນຄົນໂອ້ລົມກັບຜູ້ຊາຍຄົນນັ້ນ ແລະ ສ່ວນ ນາງ ໄລວັນ ແມ່ນໄດ້ຍ່າງເຂົ້າປະຕູຂ້າງເຮືອນ ເຫັນຫ້ອງນອນບໍ່ໄດ້ໃສ່ກະແຈ ຜູ້ກ່ຽວຈຶ່ງເຂົ້າໄປຄົ້ນຕູ້ໃສ່ເຄື່ອງຢູ່ພາຍໃນຫ້ອງນອນ ພົບເຫັນສາຍຄໍຄໍາ 1 ເສັ້ນ, ກີ້ສາຍຄໍຄໍາ 1 ອັນ ແລະ ສາຍແຂນຄຳ 3 ເສັ້ນ ລວມທັງໝົດເປັນຄຳຈໍານວນ 11 ບາດ 01 ສະຫຼຶງ. ຫຼັງຈາກນັ້ນທັງສອງຈຶ່ງພາກັນຂັບຂີ່ລົດຈັກກັບມາບ້ານສີມຸງຄຸນ ແລ້ວໄດ້ເອົາຄຳຈໍານວນດັ່ງກ່າວນັ້ນໄປຊຸກເຊື່ອງໄວ້ກ້ອງເສື່ອໃນຫ້ອງນອນຂອງ ນາງ ໄລວັນ.
ຕົກມາຮອດ ວັນທີ 27 ພະຈິກ 2018 ເຈົ້າໜ້າທີ່ ປກສ ເມືອງຫົງສາ ໄດ້ກັກຕົວພວກກ່ຽວທັງສອງມາດໍາເນີນຄະດີຕາມຂັ້ນຕອນຂອງກົດໝາຍ ພ້ອມທັງຍຶດຂອງກາງຈໍານວນທັງໝົດ. ມາຮອດວັນທີ 25 ທັນວາ 2018 ຢູ່ທີ່ກອງບັນຊາການ ປກສ ເມືອງ ເຈົ້າໜ້າທີ່ ໜ່ວຍງານສືບສວນ-ສອບສວນ ປກສ ເມືອງຫົງສາ ຈຶ່ງໄດ້ມອບຄໍາຈຳນວນດັ່ງກ່າວສົ່ງຄືນໃຫ້ເຈົ້າຂອງເດີມ.

 

ແຫຼ່ງຂ່າວ: ມ່ວນ

 

Leave a Reply

Your email address will not be published. Required fields are marked *