ຜູ້ໃຊ້ຄອມພິວເຕີຮັບຊາບ! ອີກ 1 ປີ Windows 7 ຈະໝົດອາຍຸ ບໍ່ໄດ້ຮັບອັບເດດຄວາມປອດໄພ

ກາຍເປັນປະເດັນສຳຄັນຂອງໂລກໄອທີ ປະຈຳປີ 2019 ທີ່ຕ້ອງຈັບຕາ ນັ້ນຄື Windows 7 (ວິນໂດ 7) ຈະໝົດເວລາໄດ້ຮັບການສະໜັບສະໜຸນໃນວັນທີ 14 ມັງກອນ 2020. ເທົ່າກັບວ່າເຫຼືອເວລາພຽງແຕ່ 1 ປີ ພໍດີກ່ອນທີ່ລະບົບປະຕິບັດການດັ່ງກ່າວຈະໝົດອາຍຸ

ຂ່າວນີ້ຖືວ່າສ້າງແຮງສັ່ນສະເທືອນຕໍ່ກັບຜູ້ໃຊ້ຄອມພິວເຕີ ທົ່ວໂລກບໍ່ໜ້ອຍ ເພາະຜູ້ທີ່ໃຊ້ລະບົບປະຕິບັດການ Windows 7 ຈະໝົດໄລຍະ ຮັບການສະໜັບສະໜູນຈາກໄມໂຄຣຊອບໃນອີກ 1 ປີ ເທົ່ານັ້ນ. ທັງນີ້ ລະບົບປະຕິບັດການ Windows 7 ປ່ອຍອອກມາໃຫ້ໃຊ້ໃນເດືອນ ກໍລະກົດ 2009 ເຊິ່ງມາຮອດປັດຈຸບັນກໍ່ເກືອບ 10 ປີແລ້ວ ໂດຍທາງໄມໂຄຣຊອບໄດ້ຂະຫຍາຍເວລາສະໜັບສະໜຸນໄປອີກເລັກນ້ອຍຈົນຮອດເດືອນມັງກອນປີ 2020.

ສິ່ງທີ່ຈະເກີດຂຶ້ນຫຼັງຈາກນັ້ນກໍ່ຄື Windows 7 ຈະບໍ່ໄດ້ຮັບອັບເດດຄວາມປອດໄພໃດໆອີກຕໍ່ໄປ ນັ້ນໝາຍຄວາມວ່າມີຄວາມສ່ຽງທີ່ຈະຖືກລັກຂໍ້ມູນ ຫຼື ໂຈມຕີດ້ວຍວິທີການຕ່າງໆ

ແນວໃດກໍ່ຕາມຜູ້ໃຊ້ທົ່ວໄປອາດຈະບໍ່ຮູ້ສຶກວ່າຕົວເອງໄດ້ຮັບຜົນກະທົບຫຍັງຫຼາຍຈາກການບໍ່ໄດ້ຮັບອັບເດດຄວາມປອດໄພ ແຕ່ໃນດ້ານຂອງຜູ້ໃຊ້ ທີ່ເປັນອົງກອນ ເລື່ອງຄວາມປອດໄພຂອງຂໍ້ມູນເປັນເລື່ອງທີ່ສຳຄັນຫຼາຍ ສະນັ້ນເລື່ອງນີ້ຈຶ່ງຕ້ອງໃສ່ໃຈເປັນຢ່າງສູງ.

ຂໍ້ມູນຈາກໄມໂຄຣຊອບເມື່ອກາງປີທີ່ຜ່ານມາລະບຸວ່າ Windows 7 ຍັງຄົງຄອງສ່ວນແບ່ງຕະຫຼາດສູງສຸດທີ່ 41% ຂອງຈຳນວນຜູ້ໃຊ້ຄອມພິວເຕີທັງໝົດ ເຊິ່ງກວມເອົາ 184 ລ້ານເຄື່ອງ ເຊິ່ງໂຕເລກນີ້ຍັງບໍ່ທັນລວມຜູ້ໃຊ້ໃນປະເທດຈີນ

ທາງອອກຂອງຜູ້ໃຊ້ທົ່ວໄປຄົງໜີບໍ່ພົ້ນການອັບເກຣດລະບົບເປັນຮຸ່ນໃໝ່ກວ່າ ເຊັ່ນ: Windows 8.1 ຂຶ້ນໄປ. ໃນຂະນະທີ່ຜູ້ໃຊ້ອົງກອນ ຍັງມີຕົວເລືອກໜຶ່ງ ນອກຈາກການອັບເກຣດຄື ການຢູ່ກັບ Windows 7 ຕໍ່ໄປ ແລ້ວຊື້ບໍລິການອັບເດດຄວາມປອດໄພເພີ່ມເຕີມ ຫຼື Extended Security Updates (ESU) ໄດ້ອີກ 3 ປີ ເຊິ່ງລາຄາຈະແພງຂຶ້ນທຸກປີ. ແນວໃດກໍ່ຕາມການຊື້ ESU ບໍ່ແມ່ນທາງອອກທີ່ຍືນຍາວ ເພາະໃຊ້ໄດ້ຮອດພຽງແຕ່ປີ 2023 ເທົ່ານັ້ນ ແລະ ສຸດທ້າຍກໍ່ຕ້ອງໄດ້ອັບເກຣດ.

 

 

 

Leave a Reply

Your email address will not be published. Required fields are marked *