ປີ 2018 ສານປະຊາຊົນແຂວງສາລະວັນ ໄກ່ເກ່ຍ ແກ້ໄຂຄະດີໄດ້ 224 ເລື່ອງ

ຜ່ານການຈັດຕັ້ງປະຕິບັດໜ້າທີ່ວຽກງານຂອງສານປະຊາຊົນ ແຂວງສາລະວັນ ໃນໄລຍະ 1 ປີຜ່ານມາ ທ່ານ ວິໄລ  ສີລາດວງໃຈ ປະທານສານປະຊາຊົນ ແຂວງສາລະວັນ ໄດ້ໃຫ້ສໍາພາດເມື່ອທ້າຍເດືອນທັນວາ 2018 ນີ້ວ່າ: ສານປະຊາຊົນແມ່ນອົງການຕຸລາການໜຶ່ງທີ່ເຮັດໜ້າທີ່ໃນການພິຈາລະນາຕັດສິນຄະດີໃຫ້ມີຄວາມຖືກຕ້ອງ ແລະ ຍຸຕິທໍາ ສໍາລັບແຂວງສາລະວັນ ປະກອບມີ 3 ແຫ່ງ ຄື: ສານປະຊາຊົນແຂວງ, ສານປະຊາຊົນ ເຂດ 1 ຮັບຜິດຊອບ 5 ຕົວເມືອງ, ສານປະຊາຊົນ ເຂດ 2 ຮັບຜິດຊອບ 3 ເມືອງ, ສໍາລັບໃນ 1 ປີຜ່ານມາ ທົ່ວ  ແຂວງສາລະວັນ ມີຄະດີເກີດຂຶ້ນທັງໝົດ 288 ເລື່ອງ, ແກ້ໄຂ 224 ເລື່ອງ, ພວມດໍາເນີນຄະດີ 28 ເລື່ອງ, ແກ້ໄຂຄະດີແພ່ງ, ຄະດີການຄ້າ ແລະ ຄະດີຄອບຄົວ ມີ 10 ເລື່ອງ ກວມເອົາ 81,67% ຂອງຈໍານວນຄະດີທັງໝົດ ສ່ວນສານປະຊາຊົນ ເຂດ 1 ແລະ ເຂດ 2 ມີຄະດີເກີດຂຶ້ນ ທັງໝົດ 136 ເລື່ອງ, ແກ້ໄຂແລ້ວ 113 ເລື່ອງ, ແກ້ໄຂໄກ່ເກ່ຍ 16 ເລື່ອງ, ສານເຂດຂໍອຸທອນມາສານແຂວງມີທັງໝົດ 34 ເລື່ອງ, ຄະດີສ່ວນໃຫຍ່ແມ່ນຂັດແຍ່ງທີ່ດິນ, ມູນມໍລະດົກ, ຄະດີອາຍາ ແລະ ຄະດີປະເພດຢາເສບຕິດ ເຊິ່ງກວມເອົາ 83,08% ຂອງຈໍານວນຄະດີທັງໝົດ.

ທ່ານ ວິໄລ ສີລາດວງໃຈ ຍັງໃຫ້ຮູ້ຕື່ມອີກວ່າ: ເພື່ອເຮັດໃຫ້ການແກ້ໄຂຄະດີໃຫ້ມີຄວາມຖືກຕ້ອງທ່ຽງທໍາ ຕ້ອງເພີ່ມມາດຕະການ ເປັນຕົ້ນແມ່ນການປັບປຸງພະນັກງານໂດຍສຸມໃສ່ການສຶກສາອົບຮົມຄຸນທາດການເມືອງ, ຄຸນສົມບັດສິນທໍາປະຕິວັດ, ຈັນຍາບັນ – ຈັນຍາທໍາ, ຄວາມຮັບຜິດຊອບຂອງຜູ້ພິພາກສາ, ຜູ້ຊ່ວຍພິພາກສາ ແລະ ພະນັກງານພາຍໃນສານໃຫ້ເຄັ່ງຄັດເຂັ້ມງວດຕໍ່ວຽກງານຂອງຕົນ, ຍົກສູງຄວາມຮູ້ – ຄວາມສາມາດໃຫ້ແກ່ພະນັກງານ, ເລັ່ງໃສ່ປັບປຸງແບບແຜນວິທີການເຮັດວຽກງານໃຫ້ດີຂຶ້ນ, ເພີ່ມທະວີໃນການຮັບຜິດຊອບຕິດຕາມກວດກາບັນຫາຂໍ້ຂັດແຍ່ງຕົວຈິງຢູ່ຂັ້ນຮາກຖານທ້ອງຖິ່ນກັບອໍານາດການປົກຄອງບ້ານໃຫ້ຫຼາຍຂຶ້ນ.

ພ້ອມດຽວກັນນີ້, ສານປະຊາຊົນ ແຂວງສາລະວັນ ກໍ່ໄດ້ຈັດກອງປະຊຸມປະເມີນພະນັກງານ – ລັດຖະກອນ ປະຈໍາປີ 2018 ທີ່ຫ້ອງປະຊຸມຂອງຕົນ ໂດຍການເປັນປະທານຂອງ ທ່ານ     ສົມຫວັງ ມະນີແສງ ຮອງປະທານສານປະຊາຊົນແຂວງ ມີຕາງໜ້າຈາກພະແນກພາຍໃນແຂວງ ແລະ ພະນັກງານລັດຖະກອນພາຍໃນສານເຂົ້າຮ່ວມ ເຊິ່ງຈຸດປະສົງຂອງການປະເມີນພະນັກງານລັດຖະກອນ ແມ່ນເພື່ອເປັນການຕີລາຄາຄືນ ຈຸດດີ – ຈຸດອ່ອນ, ຂໍ້ຄົງຄ້າງໃນການຈັດຕັ້ງປະຕິບັດວຽກງານໃນປີຜ່ານມາ ແລະ ວິທີແກ້ໄຂໃນຕໍ່ໜ້າ.

 

ແຫຼ່ງຂ່າວ: ເສດຖະກິດ-ການຄ້າ

 

Leave a Reply

Your email address will not be published. Required fields are marked *

Facebook