ຮັບຮອງການແຕ່ງຕັ້ງບຸຄະລາກອນ ຂອງອົງການປົກຄອງ ນວ

ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສປ ນວ) ຊຸດ​ທີ I ໃນ​ວັນ​ທີ 27 ທັນ­ວາ 2018 ທີ່​ຫ້ອງ​ວ່າ­ການ ນວ ໂດຍ​ເປັນ​ປະ­ທານ​ຂອງ​ທ່ານ ອາ­ນຸ­ພາບ ຕຸ​ນາ​ລົມ ປະ­ທານ ສປ ນວ ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ພ້ອມ​ດ້ວຍ​ສະ­ມາ­ຊິກ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສສ ນວ) ແລະ ຜູ້­ຕາງ­ໜ້າ​ຈາກ​ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

ກອງ​ປະ­ຊຸມ​ໄດ້​ຮັບ​ຟັງ​ການ​ຊີ້​ແຈງ​ຂອງ​ທ່ານ​ເຈົ້າ​ຄອງ ນວ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ພົ້ນ​ເດັ່ນ ປະ­ຈຳ​ປີ 2018 ແລະ ທິດ​ທາງ​ປະ­ຈຳ​ປີ 2019 ຂອງ ນວ ເຊິ່ງ ສສ ນວ ໃຫ້​ຄວາມ​ສົນ­ໃຈ​ຫຼາຍ​ບັນ­ຫາ​ສຳ­ຄັນ ໂດຍ​ສະ­ເພາະ ບັນ­ຫາ​ການ​ລົງ­ທຶນ​ພາຍ​ໃນ ກໍ່​ຄື ການ­ຈັດ­ຕັ້ງ​ປະ­ຕິ­ບັດ​ສົ່ງ­ເສີມ​ຂະ­ແໜງ​ເສດ­ຖະ­ກິດ​ຂອງ ນວ ໃຫ້​ມີ​ຄວາມ​ໜັກ​ແໜ້ນ ເຂັ້ມ­ແຂງ ຍືນ​ຍົງ ບັນ­ດາ​ວຽກ​ງານ​ການ​ເກັບ​ລາຍ​ຮັບ​ເຂົ້າ​ງົບ­ປະ­ມານ ລວມ​ທັງ​ການ​ວາງ​ຕົວ​ເລກ​ເປົ້າ​ໝາຍ​ສູ້​ຊົນ ການ​ຂະ­ຫຍາຍ­ຕົວ​ທາງ​ດ້ານ​ເສດ­ຖະ­ກິດ​ຢູ່ ນວ ຈາກ 7% ເປັນ 11% ນອກ​ນີ້ ທ່ານ​ເຈົ້າ​ຄອງ​ຍັງ​ໄດ້​ຊີ້​ແຈງ​ເຖິງ​ບັນ­ດາ​ທິດ​ທາງ​ແຜນ­ການ ປະ­ຈຳ​ປີ 2019 ທີ່​ທຸກ​ພາກ­ສ່ວນ​ທົ່ວ​ສັງ­ຄົມ ຕ້ອງ​ເປັນ​ເຈົ້າ​ການ​ຢ່າງ​ຕັ້ງ­ໜ້າ ສູ້​ຊົນ​ຈັດ​ຕັ້ງ​ປະ­ຕິ­ບັດ​ວຽກ​ງານ​ວິ­ຊາ​ສະ­ເພາະ​ຂອງ​ຂະ­ແໜງ­ການ​ຕົນ ດ້ວຍ​ຄວາມ​ຮັບ­ຜິດ­ຊອບ​ສູງ ເປັນ​ເຈົ້າ​ການ​ສົ່ງ­ເສີມ​ວຽກ​ງານ​ຜະ­ລິດ​ເປັນ​ສິນ­ຄ້າ ເຂັ້ມ​ງວດ​ໃນ​ການ​ກວດ­ກາ​ການ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ ຮັບ­ປະ­ກັນ​ຄວາມ​ປອດ​ໄພ ສາ­ມາດ​ກວດ​ສອບ​ໄດ້ ຄຽງ​ຄູ່​ກັບ​ການ​ສົ່ງ­ເສີມ​ວຽກ​ງານ​ທ່ອງ​ທ່ຽວ​ທາງ​ທຳ​ມະ​ຊາດ ແລະ ວັດ­ທະ­ນະ­ທຳ ຮີດ­ຄອງ​ປະ­ເພ­ນີ​ທີ່​ປະ­ຊາ­ຊົນ​ມີ​ສ່ວນ​ຮ່ວມ ແນ­ໃສ່​ສ້າງ​ລາຍ​ຮັບ ແລະ ຮັບ­ປະ­ກັນ​ການ­ທ່ອງ­ທ່ຽວ​ໃຫ້​ມີ​ຄວາມ​ຍືນ​ຍົງ.

ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ໄດ້​ຜ່ານ​ໜັງ­ສື​ສະ­ເໜີ​ຂອງ​ທ່ານ​ເຈົ້າ​ຄອງ ນວ ກ່ຽວ​ກັບ​ການ​ສະ­ເໜີ​ແຕ່ງ­ຕັ້ງ ຍົກ­ຍ້າຍ​ທ່ານ ພອນ​ປະ­ເສີດ ອຸ​ນາ​ພົມ ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ ນວ ໄປ​ຮັບ​ໜ້າ­ທີ່​ໃໝ່​ຢູ່​ກະ­ຊວງ​ສາ­ທາ­ລະ­ນະ​ສຸກ ແລະ ແຕ່ງ­ຕັ້ງ​ທ່ານ​ນາງ ໄຊ​ພອນ ນັນ­ທະ​ພອນ ຂຶ້ນ​ເປັນ​ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ ນວ ຄົນ​ໃໝ່ ເຊິ່ງ ສສ ນວ ໄດ້​ຕົກ­ລົງ​ເຫັນ​ດີ​ຮັບ­ຮອງ​ເອົາ​ຕາມ​ໜັງ­ສື​ສະ­ເໜີ​ດັ່ງ­ກ່າວ ດ້ວຍ​ຄະ­ແນນ​ສຽງ​ສ່ວນ​ຫຼາຍ.

ນອກ​ນີ້ ຍັງ​ໄດ້​ຮັບ​ຟັງ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ​ວຽກ​ງານ ປະ­ຈຳ​ປີ 2018 ແລະ ທິດ​ທາງ​ແຜນ­ການ ປະ­ຈຳ​ປີ 2019 ຂອງ​ໄອ​ຍະ​ການ​ປະ­ຊາ­ຊົນ ນວ ຈາກ​ທ່ານ ພຸດ​ທະ​ວົງ ບົວ­ລະ­ພາ ຫົວ­ໜ້າ​ອົງ­ການ​ໄອ​ຍະ​ການ​ປະ­ຊາ­ຊົນ ນວ ບົດ​ລາຍ​ງານ​ການ­ເຄື່ອນ­ໄຫວ ປະ­ຈຳ​ປີ 2018 ແລະ ແຜນ­ການ​ປີ 2019 ຂອງ​ສານ​ປະ­ຊາ­ຊົນ ນວ ຈາກ​ທ່ານ ຈິດ​ຕາ­ວັນ ວົງ​ໄຊ ຮອງ​ປະ­ທານ​ສານ​ປະ­ຊາ­ຊົນ ນວ ໃນ​ປີ 2018 ມີ​ຄະ­ດີ​ເກີດ​ຂຶ້ນ 3.035 ເລື່ອງ ແກ້​ໄຂ​ໄດ້ 2.160 ເລື່ອງ ຄະ­ດີ​ອາ­ຍາ​ພົ້ນ​ເດັ່ນ​ແມ່ນ​ຄ້າ­ຂາຍ​ຢາ​ເສບ​ຕິດ ລະ­ເມີດ​ກົດ​ຈາ­ລະ​ຈອນ ລັກ​ຊັບ ແລະ ສໍ້​ໂກງ​ຊັບ​ພົນ­ລະ­ເມືອງ ຄະ­ດີ​ແພ່ງ​ທີ່​ພົ້ນ​ເດັ່ນ​ແມ່ນ​ສັນ­ຍາ​ກູ້​ຢືມ ຂໍ້​ຂັດ​ແຍ່ງ​ມູນ​ມໍ­ລະ­ດົກ ຂັດ​ແຍ່ງ​ກຳ­ມະ­ສິດ​ທີ່​ດິນ ສຳ­ລັບ​ການ­ຈັດ­ຕັ້ງ​ເຄື່ອນ​ໄຫວ​ວຽກ​ງານ​ຂອງ​ໄອ​ຍະ​ການ​ປະ­ຊາ­ຊົນ​ປີ 2018 ໄດ້​ອອກ​ຄຳ​ສັ່ງ​ກັກ​ຂັງ​ພາງ 2.410 ສະ­ບັບ ອອກ​ຄຳ​ສັ່ງ​ຕໍ່​ການ​ກັກ​ຂັງ​ພາງ 939 ສະ­ບັບ ຄຳ​ສັ່ງ​ຈັບ​ຕົວ 377 ສະ­ບັບ ຄຳ​ແນະ­ນຳ 441 ສະ­ບັບ ຄຳ​ສັ່ງ​ກວດ​ຄົ້ນ​ເຄ­ຫາ​ສະ­ຖານ 233 ສະ­ບັບ ຄຳ​ສັ່ງ​ປ່ອຍ​ຕົວ​ພາງ 131 ສະ­ບັບ ຄຳ​ສັ່ງ​ກຳ­ນົດ​ເວ­ລາ​ສືບ­ສວນ-ສອບ​ສວນ 643 ສະ­ບັບ ໄດ້​ຮັບ​ສຳ­ນວນ​ຄະ­ດີ​ອາ­ຍາ 3.476 ເລື່ອງ ແກ້​ໄຂ​ໄດ້ 3.188 ເລື່ອງ ຄະ­ດີ​ອາ­ຍາ​ອຸ­ທອນ 25 ເລື່ອງ ໄດ້​ຖະ­ແຫຼງ​ລົງ​ສານ​ແລ້ວ 24 ເລື່ອງ ຍັງ​ພິ­ຈາ­ລະ­ນາ 1 ເລື່ອງ​ເທົ່າ​ກັບ 96%.

ຈາກ​ນັ້ນ ທ່ານ ພັນ​ໂທ ຈັນ­ທະ​ລາ ອຸ­ດົມ​ສຸກ ປະ­ທານ​ກຳ­ມະ­ການ​ຍຸ­ຕິ​ທຳ ປກສ-ປກຊ ພ້ອມ​ດ້ວຍ ສສ ນວ ໄດ້​ປະ­ກອບ​ຄຳ​ເຫັນ​ຢ່າງ​ກົງ​ໄປ​ກົງ​ມາ ເພື່ອ​ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ຂອງ​ອົງ­ການ​ໄອ​ຍະ​ການ ແລະ ສານ​ປະ­ຊາ­ຊົນ ນວ ໃນ­ຕໍ່­ໜ້າ​ມີ​ຄວາມ​ຮັດ­ກຸມ ຖືກ­ຕ້ອງ ແລະ ສອດ­ຄ່ອງ​ກັບ​ການ​ຂະ­ຫຍາຍ­ຕົວ​ທາງ​ດ້ານ​ເສດ­ຖະ­ກິດ-ສັງ­ຄົມ​ຫຼາຍ​ທີ່​ສຸດ.

 

Leave a Reply

Your email address will not be published. Required fields are marked *

Facebook