ໂຮງຮຽນ ພອນສະຫວັນ ແຂວງຊຽງຂວາງ ຄາດຈະໄດ້ນຳໃຊ້ປີ 2020

ໂຄງການກໍ່ສ້າງ ໂຮງຮຽນ ພອນສະຫວັນ ຢູ່ແຂວງຊຽງຂວາງ ໄດ້ເລີ່ມລົງມືກໍ່ສ້າງແຕ່ກາງເດືອນກັນຍາ 2018 ເປັນຕົ້ນມາ ເຊິ່ງໄດ້ຮັບການຊ່ວຍເຫຼືອລ້າຈາກລັດຖະບານ ສສ ຫວຽດນາມ 137 ກວ່າຕື້ດົງ ໂດຍໃຫ້ສຳເລັດພາຍໃນ 30 ເດືອນ ແຕ່ມາຮອດປັດຈຸບັນສຳເລັດແລ້ວ 26% ດ້ານຜູ້ຮັບເໝົາໂຄງການຄາດວ່າຈະໃຫ້ໄດ້ນຳໃຊ້ພາຍໃນປີ 2020.

ທ່ານ ວົງສາ ລໍ່ເຢຍ ຫົວໜ້າຂະແໜງບໍລິຫານ – ການເງິນ – ກໍ່ສ້າງ ພະແນກສຶກສາທິການ ແລະ ກີລາແຂວງ ລາຍງານຕໍ່ ທ່ານ ບົວສອນ ສີນວນທອງ ຮອງເຈົ້າແຂວງໆຊຽງຂວາງ ໄດ້ລົງຕິດຕາມກວດກາຄວາມຄືບໜ້າໂຄງການດັ່ງກ່າວໃນຕົ້ນອາທິດຜ່ານມາ ວ່າ: ໂຄງການກໍ່ສ້າງ ໂຮງຮຽນ ພອນສະຫວັນ ເທສະບານ ແຂວງຊຽງຂວາງ ໄດ້ເລີ່ມລົງມືກໍ່ສ້າງມາແຕ່ວັນທີ 15 ກັນຍາ 2018 ໂດຍແມ່ນ ບໍລິສັດ COECO ສສ ຫວຽດນາມ ເປັນຜູ້ຮັບເໝົາກໍ່ສ້າງ ແລະ ອອກແບບໃນຈໍານວນມູນຄ່າທັງໝົດ 137 ຕື້ກວ່າດົງ. ໃນນັ້ນ, ທຶນຊ່ວຍເຫຼືອລ້າຂອງລັດຖະບານ ສສ ຫວຽດນາມ 134 ຕື້ກວ່າດົງ ແລະ ທຶນສົມທົບຂອງລັດຖະບານ ສປປ ລາວ 2 ຕື້ກວ່າດົງ, ມາຮອດປັດຈຸບັນຄວາມຄືບໜ້າຂອງການກໍ່ສ້າງສໍາເລັດແລ້ວ 26% ເປັນຕົ້ນແມ່ນພື້ນຖານໂຄງລ່າງຂອງຕຶກອາຄານ, ລະບົບຕາຂ່າຍໄຟຟ້າ, ການແກ້ໄຂສິ່ງກີດ ຂວາງ ແລະ ລະບົບປະກອບສ່ວນອື່ນໆ, ໃນເບື້ອງຕົ້ນລັດຖະບານຫວຽດນາມ ໃຫ້ເວລາ 30 ເດືອນໃນການກໍ່ສ້າງໃຫ້ສໍາເລັດ ແຕ່ໃນຄວາມເປັນຈິງ ທາງບໍລິສັດຮັບເໝົາກໍ່ສ້າງໄດ້ຢືນຢັນວ່າຈະໃຫ້ສໍາເລັດກ່ອນກໍານົດ ຄາດວ່າເດືອນເມສາ ປີ 2020 ຈະໃຫ້ໄດ້ນໍາໃຊ້ ແຕ່ທັງນີ້ທັງນັ້ນກໍ່ຂຶ້ນຢູ່ກັບຄະນະຮັບຜິດຊອບທັງສອງຝ່າຍ ລາວ – ຫວຽດນາມ ໃຫ້ຄວາມຮ່ວມມືໃກ້ຊິດຕິດແທດໃນການລົງຕິດຕາມກວດກາດໍາເນີນການກໍ່ສ້າງຖືກຕາມຮູບແບບທຸກຂັ້ນຕອນ ເພື່ອໃຫ້ອາຄານອອກມາໄດ້ມາດຕະຖານ.

ໂອກາດນີ້, ທ່ານ ບົວສອນ ສີນວນທອງ ໄດ້ຮຽກຮ້ອງໃຫ້ຄະນະຮັບຜິດຊອບທັງສອງຝ່າຍເບິ່ງຄືນໃໝ່ MOU ທີ່ໄດ້ເຊັນກັນ ແລະ ພ້ອມກັນຈັດຕັ້ງປະຕິບັດໃຫ້ເຂັ້ມງວດ. ພ້ອມດຽວກັນນັ້ນ, ໃນຕໍ່ໜ້າກໍ່ຢາກໃຫ້ທາງບໍລິສັດກໍ່ສ້າງມີແຜນລະອຽດໃນການນໍາເຂົ້າແຮງງານ ແລະ ວັດສະດຸ, ປັບປຸງຂໍ້ຕົກລົງຄືນໃໝ່ ຍັງພາກສ່ວນໃດບໍ່ໄດ້ເຂົ້າຮ່ວມ ແລະ ມີຄວາມຈໍາເປັນຕ້ອງໄດ້ເຂົ້າຮ່ວມ, ເບິ່ງຄືນບ່ອນໃດທີ່ເຫັນວ່າເປັນອຸປະສັກຕໍ່ການກໍ່ສ້າງແມ່ນໃຫ້ຮີບຮ້ອນແກ້ໄຂຢ່າງຮີບດ່ວນ, ມອບໃຫ້ພະແນກສຶກສາທິການ ແລະ ກີລາແຂວງ ເປັນເຈົ້າການໃນການປະສານງານນໍາຝ່າຍບໍລິສັດກໍ່ສ້າງ ເພື່ອອໍານວຍຄວາມສະດວກໃຫ້ວິຊາການທັງຝ່າຍລາວເວລາລົງຕິດຕາມກວດກາ. ພ້ອມນັ້ນ, ກໍ່ໃຫ້ມີການສ່ອງແສງລາຍງານຄວາມຄືບໜ້າການກໍ່ສ້າງນໍາກັນເປັນປົກກະຕິປະຈໍາໄຕມາດ ເພື່ອເຮັດແນວໃດໃຫ້ໂຄງການກໍ່ສ້າງໂຮງຮຽນແຫ່ງນີ້ກາຍເປັນຕົວແບບ ຂອງໂຄງການໃນການຮ່ວມມື ລາວ – ຫວຽດນາມ.

 

ແຫຼ່ງຂ່າວ: ເສດຖະກິດ-ການຄ້າ

 

 

Leave a Reply

Your email address will not be published. Required fields are marked *

Facebook