ໂຮງຮຽນ ສີຄໍາພັດທະນາຈັດກິດຈະກໍາສົ່ງເສີມການສະແດງອອກຂອງເດັກນ້ອຍ

ໂຮງຮຽນ ລ້ຽງເດັກ – ອະນຸບານ ປະຖົມສຶກສາ ສີຄໍາພັດທະນາ ໄດ້ຈັດກິດຈະກໍາສ້າງຄວາມມ່ວນຊື່ນ ເພື່ອສົ່ງເສີມການກ້າສະແດງອອກຂອງເດັກນ້ອຍ ໂດຍສະເພາະແມ່ນການໃຊ້ພາສາ ແລະ ທັກສະທາງດ້ານສິລະປະ ເມື່ອທ້າຍອາທິດຜ່ານມາ ໂດຍເປັນກຽດເຂົ້າຮ່ວມຂອງ ທ່ານ ເຕັມໃຈ ໂຄດປັນຍາ ຜູ້ອໍານວຍການ ໂຮງຮຽນ ລ້ຽງເດັກ – ອະນຸບານ ປະຖົມສຶກສາ ສີຄໍາພັດທະນາ, ມີພະນັກງານ, ຄູ – ອາຈານ, ພໍ່ແມ່ຜູ້ປົກຄອງ ແລະ ນ້ອງນ້ອຍນັກຮຽນເຂົ້າຮ່ວມຢ່າງພ້ອມພຽງ.

ທ່ານ ເຕັມໃຈ ໂຄດປັນຍາ ກ່າວໃຫ້ຮູ້ວ່າ: ການຈັດກິດຈະກໍາໃນຄັ້ງນີ້ແມ່ນເພື່ອສ້າງຄວາມເບີກບານມ່ວນຊື່ນໃຫ້ແກ່ນ້ອງນັກຮຽນ, ພໍ່ແມ່ນຜູ້ປົກຄອງ ແລະ ຄູ – ອາຈານ ໄດ້ມີກິດຈະກໍາຮ່ວມກັນ ໂດຍເນັ້ນ ຄວາມຮູ້ຄວາມເຂົ້າໃຈຂອງຜູ້ປົກຄອງ ກ່ຽວກັບວຽກງານເຄື່ອນໄຫວຂອງໂຮງຮຽນ, ພາຍໃນງານນອກຈາກການສະແດງຂອງນ້ອງນ້ອຍນັກຮຽນອະນຸບານແລ້ວ ກໍ່ຍັງມີກິດຈະກໍາການໃຫ້ຄວາມຮູ້ດ້ານການຮັກສາສຸຂະພາບຂັ້ນພື້ນຖານຂອງເດັກນ້ອຍໂດຍຜູ້ຊ່ຽວຊານດ້ານເດັກ ໂດຍສະເພາະທີ່ປະຈໍາຢູ່ໂຮງໝໍມະໂຫສົດ. ພ້ອມດຽວກັນນັ້ນ, ຍັງເນັ້ນໃສ່ເລື່ອງການສະແດງ ຄວາມສາມາດຂອງນ້ອງນ້ອຍ ໂດຍສະເພາະແມ່ນຊັ້ນອະນຸບານ ໄດ້ມີໂອກາດສະແດງຄວາມສາມາດທີ່ໄດ້ຮຽນມາ ເປັນຕົ້ນແມ່ນຄວາມສາມາດໃນການກ້າສະແດງອອກກ່ຽວກັບເລື່ອງການໃຊ້ພາສາ, ທັກສະທາງດ້ານສິລະປະ ທີ່ເປັນເວທີໜຶ່ງໃຫ້ນ້ອງນ້ອຍໄດ້ມີໂອກາດ, ໄດ້ຮູ້ຈັກກັນໃນແຕ່ລະຫ້ອງ. ໃນໄລຍະຕໍ່ໜ້າແມ່ນຢາກໃຫ້ໂຮງຮຽນສ້າງກິດຈະກໍາໃຫ້ນັກຮຽນ ເພື່ອແນໃສ່ໃຫ້ນັກຮຽນ ແລະ ຜູ້ປົກຄອງມີສ່ວນຮ່ວມຫຼາຍທີ່ສຸດ ເຊິ່ງນັກຮຽນຈະໄດ້ຮຽນຮູ້ຈາກສິ່ງທີ່ເຂົາໄດ້ເຮັດ, ກ່ອນຈະຈັດກິດຈະກໍາກໍ່ໄດ້ມີການປຶກສາຫາລືກັບທີມງານບໍລິຫານ ແລະ ໄດ້ແຈ້ງທາງຜູ້ປົກຄອງເພື່ອເຂົ້າຮ່ວມງານ.

ສໍາລັບ ໂຮງຮຽນ ລ້ຽງເດັກ – ອະນຸບານ ປະຖົມສຶກສາ ສີຄໍາພັດທະນາ ຕັ້ງຢູ່ບ້ານດົງຄໍາຊ້າງ ເມືອງຫາດຊາຍຟອງ ນະຄອນຫຼວງວຽງຈັນ ເປັນໂຮງຮຽນທີ່ເປີດໃນສົກຮຽນ 2018 – 2019 ໂດຍໂຮງຮຽນໄດ້ເນັ້ນໜັກເຖິງຄວາມປອດໄພ ໂດຍມີການຕິດກ້ອງວົງຈອນປິດທຸກຫ້ອງ ເພື່ອເບິ່ງ ຄວາມປອດໄພຂອງເດັກ, ຄວາມສຸກຂອງຜູ້ຮຽນຜູ້ສອນ, ສຸຂະພາບທີ່ດີ ໂດຍມີແພດປະຈໍາໂຮງຮຽນ ແລະ ເອົາໃຈໃສ່ໃນເລື່ອງຄວາມເປັນລະບຽບຮຽບຮ້ອຍ.

ນອກຈາກນີ້, ທ່ານຍັງກ່າວໃຫ້ຮູ້ຕື່ມວ່າ: ໂຮງຮຽນ ລ້ຽງເດັກ – ອະນຸບານ ປະຖົມສຶກສາ ສີຄໍາພັດທະນາ ຍັງມີກິດຈະກໍາໃໝ່ ເພື່ອພັດທະນາການຂອງເດັກນ້ອຍ ໂດຍສະເພາະແມ່ນເດັກກຽມປະຖົມ ເຊິ່ງຈະມີກິດຈະກໍາກ່ຽວກັບການເສີມສ້າງ ຄວາມຮູ້ທັກສະຕ່າງໆທາງດ້ານສຸຂະພາບ ແລະ ວັດທະນະທໍາ ເພາະທາງໂຮງຮຽນມີຄູສອນຈາກຕ່າງປະເທດໄດ້ມາສອນ ແລະ ແລກປ່ຽນເຊິ່ງກັນ ແລະ ກັນ.

 

 

 

Leave a Reply

Your email address will not be published. Required fields are marked *