ສະຫຼອງວັນສ້າງຕັ້ງ ມວສ ຄົບຮອບ 60 ປີ

ພິ­ທີ​ສະ­ເຫຼີມ­ສະ­ຫຼອງ ວັນ​ສ້າງ­ຕັ້ງ​ມະ­ຫາ­ວິ­ທະ­ຍາ­ໄລ ວິ­ທະ­ຍາ­ສາດ​ສຸ­ຂະ­ພາບ (ມວ​ສ) ຄົບ­ຮອບ 60 ປີ ຈັດ​ຂຶ້ນ​ວັນ​ທີ 25 ທັນ­ວາ 2018 ທີ່​ມະ­ຫາ­ວິ­ທະ­ຍາ­ໄລ​ດັ່ງ­ກ່າວ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ມີ​ຮອງ​ລັດ­ຖະ­ມົນ­ຕີ ອະ­ທິ­ການ ຮອງ​ອະ­ທິ­ການ​ບໍ­ດີ ອະ­ດີດ​ການ​ນຳ​ກະ­ຊວງ ພະ­ນັກ­ງານ​ກ່ຽວ­ຂ້ອງ ແລະ ແຂກ​ຖືກ​ເຊີນ.

ທ່ານ ພູ­ທອນ ວັງ​ກອນ​ວິ­ໄລ ອະ­ທິ­ການ​ບໍ­ດີ​ມະ­ຫາ­ວິ­ທະ­ຍາ­ໄລ ວິ­ທະ­ຍາ­ສາດ​ສຸ­ຂະ­ພາບ ກ່າວ​ວ່າ ມວ​ສ ເປັນ​ໂຮງ­ຮຽນ​ແພດ​ແຫ່ງ​ທຳ​ອິດ ສ້າງ­ຕັ້ງ​ຂຶ້ນ​ໃນ​ປີ 1958 ໄລ­ຍະ​ນັ້ນ​ແມ່ນ​ໄດ້​ສ້າງ​ແພດ​ຊ່ວຍ ມາ​ຮອດ​ປີ 1965 ໄດ້​ສ້າງ​ທັນ​ຕະ​ແພດ​ຊ່ວຍ​ຕໍ່​ມາ​ໄດ້​ສ້າງ​ເພ​ສຊ​ກອນ​ຊ່ວຍ ແລະ ມີ​ການ​ພັດ­ທະ­ນາ​ຂຶ້ນ​ເລື້ອຍໆ ຕະ­ຫຼອດ 60 ປີ­ຜ່ານ­ມາ ສາ­ມາດ​ສ້າງ​ບຸ​ຄະ­ລາ​ກອນ​ອອກ​ຮັບ​ໃຊ້​ສັງ­ຄົມ ໃນ​ແຕ່​ລະ​ຂັ້ນ​ໃນ​ຫຼັກ­ສູດ​ຕ່າງໆ​ເຊັ່ນ ຫຼັກ­ສູດ​ຊັ້ນ​ກາງ​ມີ 14 ຫຼັກ­ສູດ ສ້າງ​ບຸ​ຄະ­ລາ​ກອນ​ໄດ້ 6.947 ຄົນ ຫຼັກ­ສູດ​ອະ­ນຸ​ປະ­ລິນ­ຍາ ມີ 13 ຫຼັກ­ສູດ ສ້າງ​ບຸ​ຄະ­ລາ​ກອນ​ໄດ້ 2.167 ຄົນ ຫຼັກ­ສູດ​ປະ­ລິນ­ຍາ​ຕີ ມີ 10 ຫຼັກ­ສູດ ສ້າງ​ບຸ​ຄະ­ລາ​ກອນ​ໄດ້ 8.593 ຄົນ ຫຼັກ­ສູດ​ປະ­ລິນ­ຍາ​ໂທ ມີ 9 ຫຼັກ­ສູດ ສ້າງ​ບຸ​ຄະ­ລາ​ກອນ​ໄດ້ 226 ຄົນ ຫຼັກ­ສູດ​ຊ່ຽວ­ຊານ​ຂັ້ນ 1 ມີ 13 ຫຼັກ­ສູດ ສ້າງ​ບຸ​ຄະ­ລາ​ກອນ​ໄດ້ 1.460 ຄົນ ຊ່ຽວ­ຊານ​ຂັ້ນ 2 ມີ 9 ຫຼັກ­ສູດ​ສ້າງ​ບຸ​ຄະ­ລາ​ກອນ​ໄດ້ 27 ຄົນ ທັງ​ໝົດ​ມີ 59 ຫຼັກ­ສູດ ແລະ ສາ­ມາດ​ສ້າງ​ບຸ​ຄະ­ລາ​ກອນ​ໄດ້ 19.194 ຄົນ.

ນອກ­ຈາກ​ນີ້ ໃນ​ພິ­ທີ​ຍັງ​ໄດ້​ມອບ​ນາມ­ມະ­ຍົດ​ໃຫ້​ສາດ­ສະ­ດາ­ຈານ​ທີ່​ມີ​ຜົນ­ງານ​ດີ­ເດັ່ນ ຈຳ­ນວນ 3 ທ່ານ ມອບ​ໃບ​ກຽດ​ຕິ​ຄຸນ​ຂອງ ມວ​ສ ຈຳ­ນວນ 11 ທ່ານ ມອບ​ລາ­ງວັນ​ໃຫ້​ຜູ້​ຊະ­ນະ​ໃນ​ການ​ສະ­ເໜີ​ບົດ​ຄົ້ນ­ຄວ້າ​ວິ­ທະ­ຍາ­ສາດ ບົດ​ຄວາມ​ກ່ຽວ​ກັບ​ສຸ­ຂະ­ພາບ ຮັບ​ຟັງ​ການ​ໂອ້​ລົມ​ຈາກ​ລັດ­ຖະ­ມົນ­ຕີ ທ່ຽວ​ຊົມ​ກາ­ນວາງ­ສະ­ແດງ​ຮູບ​ພາບ ໃນ​ຕອນ​ບ່າຍ​ຂອງ​ວັນ​ດຽວ​ກັນ ໄດ້​ມີ​ການ​ພົບ​ປະ​ອະ­ດີດ​ນັກ​ສຶກ​ສາ ມວ​ສ ອີກ​ດ້ວຍ.

 

ແຫຼ່ງຂ່າວ: ນສພ ວຽງຈັນໃໝ່

 

Leave a Reply

Your email address will not be published. Required fields are marked *

Facebook