ມອບ-ຮັບໂຮງຮຽນປະຖົມສົມບູນ ບ້ານນາກາງເຊ

ພິ­ທີ​ມອບ-ຮັບ​ໂຮງ­ຮຽນ​ປະ­ຖົມ​ສົມ­ບູນ ບ້ານ​ນາ​ກາງ​ເຊ ເມືອງ​ພະ​ລານ​ໄຊ ແຂວງ​ສະ­ຫວັນ​ນະ​ເຂດ ໂດຍ​ການ​ຊ່ວຍ­ເຫຼືອ​ຂອງ​ມູນ​ນິ­ທິ​ຮ່ວມ​ມື​ຊ່ວຍ­ເຫຼືອ ດ້ານ​ການ​ສຶກ​ສາ​ເດັກ­ນ້ອຍ​ລາວ ຈັດ​ຂຶ້ນ​ວັນ​ທີ 18 ທັນ­ວາ 2018 ທີ່​ໂຮງ­ຮຽນ​ດັ່ງ­ກ່າວ ກ່າວ​ມອບ​ຂອງ​ທ່ານ ຟຼັງ​ຊົ່ວ ທຼາມ​ເດຼ່ ປະ­ທານ​ມູນ​ນິ­ທິ​ຮ່ວມ​ມື​ຊ່ວຍ­ເຫຼືອ​ດ້ານ​ການ​ສຶກ​ສາ​ເດັກ­ນ້ອຍ​ລາວ ກ່າວ​ຮັບ​ຂອງ​ທ່ານ ຖະ­ໜອມ ສີ​ພະ­ຈັນ ເລ­ຂາ​ພັກ ນາຍ­ບ້ານ​ນາ​ກາງ​ເຊ ໂດຍ​ມີ​ທ່ານ​ຫົວ­ໜ້າ​ພະ​ແນກ​ສຶກ​ສາ​ແຂວງ ຫົວ­ໜ້າ​ຫ້ອງ­ການ​ສຶກ​ສາ​ເມືອງ ທ່ານ ພູ​ວົງ ພະ​ມີ​ສິດ ປະ­ທານ​ສະ­ມາ­ຄົມ​ອັນ­ຍະ​ມະ­ນີ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ຄູ-ອາ­ຈານ ນ້ອງ​ນັກ­ຮຽນ ແລະ ພໍ່​ແມ່​ປະ­ຊາ­ຊົນ​ພາຍ​ໃນ​ບ້ານ​ເຂົ້າ​ຮ່ວມ.

ທ່ານ ທອງ​ໄສ ພາ­ນຸ​ວົງ ຮອງ​ປະ­ທານ​ມູນ​ນິ­ທິ​ຮ່ວມ​ມື​ຊ່ວຍ­ເຫຼືອ​ດ້ານ​ການ​ສຶກ​ສາ​ເດັກ­ນ້ອຍ​ລາວ ກ່າວ​ວ່າ: ໂຮງ­ຮຽນ​ຫຼັງ​ນີ້​ສ້າງ​ຂຶ້ນ​ເປັນ​ໂຮງ­ຮຽນ​ຫຼັງ​ທີ 7 ທີ່​ສ້າງ​ສຳ­ເລັດ ໂດຍ​ໄດ້​ຮັບ​ທຶນ​ປະ­ກອບ­ສ່ວນ​ຈາກ​ປະ­ເທດ ກາ​ນາ​ດາ ສິງ­ກະ­ໂປ ສະ­ຫະ­ລັດ​ອາ​ເມ​ຣິ​ກາ ແລະ ລາວ​ເຮົາ ມູນ​ຄ່າ​ການ​ກໍ່­ສ້າງ 55 ພັນ​ໂດ​ລາ​ສະ­ຫະ­ລັດ ປະ­ມານ 471 ລ້ານ​ກີບ ອາ­ຄານ​ຮຽນ​ຫຼັງ​ນີ້​ປະ­ກອບ​ມີ 5 ຫ້ອງ ປະ­ກອບ​ດ້ວຍ ໂຕະ ຕັ່ງ ລະ­ບົບ​ໄຟ­ຟ້າ​ໃຫ້​ແສງ​ສະ­ຫວ່າງ ມີ​ຫ້ອງ​ນ້ຳ​ເພື່ອ​ຮັບ​ໃຊ້​ຈຳ­ນວນ 4 ຫ້ອງ ພ້ອມ​ຮົ້ວ​ອ້ອມ​ຮອບ​ທັງ 4 ດ້ານ ໃນ​ການ​ປ້ອງ​ກັນ​ສັດ­ລ້ຽງ​ເຂົ້າ​ມາ​ໃນ​ບໍ­ລິ­ເວນ​ໂຮງ­ຮຽນ.

ມູນ​ນິ­ທິ​ຮ່ວມ​ມື​ຊ່ວຍ­ເຫຼືອ​ດ້ານ​ການ​ສຶກ​ສາ​ເດັກ­ນ້ອຍ​ລາວ ໄດ້​ສ້າງ­ຕັ້ງ​ຂຶ້ນ​ໃນ​ທ້າຍ​ປີ 2017 ແລະ ໄດ້​ເລີ່ມ​ການ​ຮ່ວມ​ມື​ປຸກ​ສ້າງ​ໂຮງ­ຮຽນ​ຫຼັງ​ທຳ​ອິດ​ໃນ ສປປ ລາວ ໃນ​ຕົ້ນ​ປີ 2018 ທີ່​ບ້ານ​ທ່າ​ຈຳ­ປາ ແຂວງ​ວຽງ​ຈັນ ແລະ ມອບ​ຮັບ​ອາ­ຄານ​ຮຽນ​ຫຼັງ​ທີ 8 ທີ່​ບ້ານ​ຜາ​ຕັ້ງ ເມືອງ​ວັງ​ວຽງ ແຂວງ​ວຽງ​ຈັນ ແລະ ເລີ່ມ​ກໍ່­ສ້າງ​ອາ­ຄານ​ຮຽນ​ຫຼັງ​ທີ 9 ຕໍ່​ທີ່​ບ້ານ​ໜອງ​ຈັນ ເມືອງ​ຫີນ​ບູນ ແຂວງ​ຄຳ​ມ່ວນ.

 

ແຫຼ່ງຂ່າວ: ນສພ ວຽງຈັນໃໝ່

Leave a Reply

Your email address will not be published. Required fields are marked *

Facebook