ເບຍລາວ ມອບທຶນການສຶກສາ 150 ທຶນ ໃຫ້ 2 ສະຖາບັນ ເບຍລາວ ມອບທຶນການສຶກສາ 150 ທຶນ ໃຫ້ 2 ສະຖາບັນ

ບໍ­ລິ­ສັດ ເບຍ​ລາວ ຈຳ­ກັດ ສືບ­ຕໍ່​ໃຫ້​ທຶນ​ການ​ສຶກ​ສາ​ແກ່​ນັກ​ສຶກ​ສາ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ແລະ ສະ​ຖາ​ບັນ​ວິ­ຈິດ​ສິນ​ແຫ່ງ​ຊາດ 150 ທຶນ ເພື່ອ​ປະ­ກອບ­ສ່ວນ​ໃນ​ການ​ຊ່ວຍ­ເຫຼືອ​ສັງ­ຄົມ ກໍ່​ຄື: ປະ­ກອບ­ສ່ວນ​ໃນ​ການ​ພັດ­ທະ­ນາ​ບຸ​ຄະ­ລາ​ກອນ​ທີ່​ມີ​ຄຸ­ນະ­ພາບ ສະ­ໜອງ​ໃຫ້​ແກ່​ສັງ­ຄົມ ໂດຍ​ມີ​ພິ­ທີ​ມອບ​ໃນ​ວັນ​ທີ 19 ທັນ­ວາ 2018 ທີ່​ສະ​ຖາ​ບັນ​ວິ­ຈິດ​ສິນ​ແຫ່ງ​ຊາດ.

ຕາງ­ໜ້າ​ໃຫ້​ບໍ­ລິ­ສັດ ເບຍ​ລາວ ຈຳ­ກັດ ມອບ​ທຶນ​ໃຫ້​ກັບ​ນັກ​ສຶກ​ສາ​ສອງ​ສະ​ຖາ​ບັນ​ໃນ​ເທື່ອ​ນີ້ ແມ່ນ​ທ່ານ ວຽງ​ເພັດ ພັນ­ທະ​ວົງ ຜູ້​ຈັດ­ການ​ຝ່າຍ​ບໍ­ລິ­ການ ແລະ ກິດ­ຈະ­ກຳ​ເພື່ອ​ສັງ­ຄົມ ແລະ ຮັບ​ໂດຍ​ທ່ານ ອຸ­ດົມ ພອນ​ຄຳ​ເພັງ ຮອງ​ອະ­ທິ­ການ​ບໍ­ດີ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ທ່ານ ໄມ່​ສິງ ຈັນ​ບຸດ​ດີ ຜູ້­ອຳ­ນວຍ­ການ​ສະ​ຖາ​ບັນ​ວິ­ຈິດ​ສິນ​ແຫ່ງ​ຊາດ ເຊິ່ງ​ມີ​ບັນ­ດາ​ຄູ-ອາ­ຈານ ນັກ​ສຶກ​ສາ ທັງ​ສອງ​ສະ​ຖາ​ບັນ​ເຂົ້າ​ຮ່ວມ.

ໂຄງ­ການ​ມອບ​ທຶນ​ການ​ສຶກ​ສາ​ຂອງ​ບໍ­ລິ­ສັດ ເບຍ​ລາວ ຈຳ­ກັດ ໄດ້​ເລີ່ມ​ມາ​ແຕ່​ປີ 2010 ມາ​ຮອດ​ປັດ­ຈຸ­ບັນ ໂຄງ­ການ​ດັ່ງ­ກ່າວ ໄດ້​ສະ­ໜອງ​ທຶນ​ໃຫ້​ແກ່​ນັກ​ສຶກ​ສາ 330 ທຶນ ໃນ 7 ສະ​ຖາ​ບັນ​ທົ່ວ​ປະ­ເທດ ຄື: ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ມະ­ຫາ­ວິ­ທະ­ຍາ­ໄລ​ຈຳ­ປາ​ສັກ ມະ­ຫາ­ວິ­ທະ­ຍາ­ໄລ​ສະ­ຫວັນ​ນະ​ເຂດ ມະ­ຫາ­ວິ­ທະ­ຍາ­ໄລ​ສຸ​ພາ­ນຸ​ວົງ ວິ­ທະ­ຍາ­ໄລ​ຄູ​ສະ­ຫວັນ​ນະ​ເຂດ ວິ­ທະ­ຍາ­ໄລ​ຄູ​ຈຳ­ປາ​ສັກ ແລະ ສະ​ຖາ​ບັນ​ວິ­ຈິດ​ສິນ ລວມ​ມູນ​ຄ່າ 976 ລ້ານ​ກີບ ເຮັດ​ໃຫ້​ນັບ​ແຕ່​ປີ 2010 ມາ​ຈົນ​ເຖິງ​ປີ 2018 ລວມ​ມູນ​ຄ່າ​ໃນ​ການ​ສະ­ໜອງ​ທຶນ​ແກ່​ນັກ​ສຶກ​ສາ​ທັງ​ໝົດ 5,75 ຕື້​ກວ່າ​ກີບ.

ສຳ­ລັບ​ການ​ມອບ​ທຶນ​ຄັ້ງ​ນີ້ ມອບ​ໃຫ້​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ 120 ທຶນ ແລະ ສະ​ຖາ​ບັນ​ວິ­ຈິດ​ສິນ​ແຫ່ງ​ຊາດ 30 ທຶນ ສ່ວນ​ການ​ມອບ​ທຶນ​ໃຫ້​ກັບ​ມະ­ຫາ­ວິ­ທະ­ຍາ­ໄລ​ສຸ​ພາ­ນຸ​ວົງ ຈັນ​ຂຶ້ນ​ໃນ​ວັນ​ທີ 23 ພະ­ຈິກ 2018 ວິ­ທະ­ຍາ­ໄລ​ຄູ​ຈຳ­ປາ​ສັກ ຈັດ​ຂຶ້ນ​ໃນ​ວັນ​ທີ 11 ທັນ­ວາ 2018 ມະ­ຫາ­ວິ­ທະ­ຍາ­ໄລ​ສະ­ຫວັນ​ນະ​ເຂດ ຈັດ​ຂຶ້ນ​ວັນ​ທີ 14 ທັນ­ວາ 2018 ແລະ ຈະ​ສືບ­ຕໍ່​ມອບ​ໃຫ້​ຄົບ 7 ສະ​ຖາ​ບັນ.

 

ແຫຼ່ງຂ່າວ: ນສພ ວຽງຈັນໃໝ່

 

 

Leave a Reply

Your email address will not be published. Required fields are marked *