9 ເຄັດລັບ ກຽມຕົວສອບເສັງໃຫ້ໄດ້ຄະແນນດີ

ນອກຈາກການສອນໃນຫ້ອງຮຽນແລ້ວນ້ອງໆຊັ້ນປະຖົມ – ມັດທະຍົມປາຍ ຍັງຕ້ອງໄດ້ກຽມຝຶກສະໝອງໃຫ້ພ້ອມກັບສະໜາມສອບເສັງຈົບຊັ້ນ ແລະ ເລື່ອນຂັ້ນຫຼາກຫຼາຍວິຊາ ແຕ່ນ້ອງໆບໍ່ຕ້ອງທໍ້ ເພາະມື້ນີ້ພວກເຮົາມີ 9 ເຄັດລັບດີໆໃນການກຽມຕົວສອບເສັງໃຫ້ໄດ້ຄະແນນດີມາຝາກນ້ອງໆ.

  1. ມີຄວາມຕັ້ງໃຈໃຫ້ດີ: ມີຄວາມເຊື່ອໝັ້ນໃນຕົວເອງ ສ້າງກໍາລັງໃຈໃນການອ່ານໜັງສືເອົາຊະນະຄວາມກຽດຄ້ານ.
  2. ວິເຄາະຕົວເອງ: ວິເຄາະວ່າເຮົາມີຄວາມມັກ ແລະ ມີຄວາມຖະໜັດໃນສາຂາວິຊາໃດແດ່ ລອງເລືອກເກັບໄວ້ 3 ອັນດັບ ໂດຍເລືອກຕາມຄວາມຖະໜັດຂອງຕົວເອງ ບໍ່ເລືອກຕາມໃຈເພື່ອນ, ຕາມໃຈພໍ່ແມ່ຜູ້ປົກຄອງ ຫຼື ຕາມກະແສນິຍົມ.
  3. ວິເຄາະສາຂາວິຊາທີ່ຈະສອບເສັງ: ວິເຄາະສາຂາວິຊາທີ່ຈະສອບເສັງວ່າເຮົາມີພື້ນຖານຄວາມຮູ້ໃນສາຂານັ້ນຫຼາຍພໍທີ່ຈະສອບເສັງຜ່ານ ຫຼື ບໍ່? ມີເວລາອ່ານໜັງສືພໍ ຫຼື ບໍ່? ແລ້ວສາຂານັ້ນມີການແຂ່ງຂັນສູງປານໃດ? ແລ້ວປະເມີນຕົວເອງຕາມຄວາມເໝາະສົມ ຖ້າອັນດັບ1 ທີ່ເລືອກໄວ້ນັ້ນເປັນໄປບໍ່ໄດ້ກໍ່ມຸ່ງໄປອັນດັບທີ 2 ຫຼື ທີ 3.
  4. ກຽມຄວາມພ້ອມ: ກຽມຕົວອ່ານໜັງສື ແລະ ຊອກໜັງສືມາໃຫ້ຄົບທຸກເນື້ອຫາທີ່ຈະຕ້ອງສອບເສັງ, ປຶກສາອາຈານ ຫຼື ເພື່ອນທີ່ເກັ່ງໆມາສອນ, ກຽມຫ້ອງ ແລະ ອຸປະກອນສຳລັບການອ່ານໜັງສື.
  5. ວາງແຜນການໃຊ້ຊີວິດ: ລອງອອກແບບຊີວິດຕົວເອງເບິ່ງ ໃນມື້ໜຶ່ງເຮົາຈະເຮັດຫຍັງແດ່? ອັນໃດທີ່ຈຳເປັນ ແລະ ອັນໃດທີ່ບໍ່ຈຳເປັນ? ພະຍາຍາມໃຊ້ເວລາໃນການອ່ານໜັງສືໃຫ້ຫຼາຍທີ່ສຸດ.
  6. ວາງແຜນການອ່ານໜັງສື: ເລີ່ມຕົ້ນວາງແຜນວ່າຈະເລືອກອ່ານວິຊາໃດກ່ອນ ຄວນເລືອກອ່ານວິຊາທີ່ມັກ ຫຼື ຖະໜັດກ່ອນ, ເລືອກເຮັດຂໍ້ສອບ ຫຼື ບົດຝຶກຫັດຈາກງ່າຍກ່ອນ ເພື່ອເປັນການສ້າງກຳລັງໃຈໃນການອ່ານວິຊາຕໍ່ໄປ ເຊິ່ງຕ້ອງວາງແຜນການອ່ານໃຫ້ເໝາະສົມກັບໄລຍະເວລາທີ່ເຫຼືອຂອງການສອບເສັງ.
  7. ງົດກິດຈະກຳຊົ່ວຄາວ: ສ້າງກົດລະບຽບໃຫ້ກັບຕົນເອງ ເຊັ່ນ: ເຊົາຫຼິ້ນເກມ, ເຊົາຫຼິ້ນກິນຟຸມເຟືອຍ, ເຊົາຫຼິ້ນວັອດແອັບ, ວີແຊັດ, ເຟສບຸ໊ກ ແລະ ກິດຈະກຳອື່ນໆຊົ່ວຄາວ ແຕ່ອາດຈະຜ່ອນຄາຍດ້ວຍການອອກກຳລັງກາຍ ຫຼື ການນັ່ງສະມາທິ.
  8. ເຕັກນິກການອ່ານໜັງສື: ຢ່າປ່ອຍໃຫ້ຕົວເອງມີເວລາວ່າງ ອ່ານທຸກຍາມທີ່ມີໂອກາດ, ເອົາໜັງສືຕິດຕົວຕະຫຼອດເວລາ ວ່າງຍາມໃດຈັບປຶ້ມມາອ່ານໄດ້ທັນທີ, ພະຍາຍາມຈົດຂໍ້ມູນທີ່ສຳຄັນ, ບໍ່ຄວນນອນກິນເຂົ້ານົມ, ຟັງເພງ, ເບິ່ງໂທລະພາບ ພ້ອມໆກັນກັບການອ່ານໜັງສື ຄວນໃຊ້ສະມາທິໃນການອ່ານຢ່າງດຽວ.
  9. ສ້າງກຳລັງໃຈໃຫ້ຕົວເອງຢ່າງຕໍ່ເນື່ອງ: ໃນໄລຍະອ່ານໜັງສືເຮົາຈະພົບອຸປະສັກຫຼາຍຢ່າງ ເຊັ່ນ: ຄວາມກຽດຄ້ານ, ຢາກນອນ, ຄວາມກັງວົນ, ຄວາມເບື່ອໜ່າຍ ຕ້ອງຫາກິດຈະກຳເພື່ອຜ່ອນຄາຍຄວາມຕຶງຄຽດ ເຊັ່ນ: ການອອກມາສູດອາກາດນອກຫ້ອງ, ກິນເຂົ້າໜົມ, ຟັງເພງ, ປຶກສາກັບຄອບຄົວ, ຫຼິ້ນກັບສັດລ້ຽງ ຫຼື ຫຼິ້ນດົນຕີ ຈັກໄລຍະໜຶ່ງແລ້ວຈຶ່ງເລີ່ມອ່ານໜັງສືໃໝ່ ພະຍາຍາມເຊື່ອໝັ້ນຕົວເອງວ່າເຮັດໄດ້ ແລະ ສ້າງກຳລັງໃຈຢູ່ຕະຫຼອດເວລາ.

 

ແລ່ງຂ່າວ: ເສດຖະກິດ-ການຄ້າ

 

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *