ແຄນາດາ ຈັບກຸມຜູ້ບໍລິຫານລະດັບສູງ “ຫົວເວີ່ຍ”

ສໍານັກຂ່າວຕ່າງປະເທດລາຍງານຈາກນະຄອນອອດຕາວາ ປະເທດແຄນາດາ ເມື່ອວັນທີ່ 5 ທັນວາ 2018 ວ່າ ກະຊວງຍຸດຕິທໍາຂອງ ແຄນາດາອອກຖະແຫຼງການເມື່ອວັນພຸດ ວ່າເຈົ້າໜ້າທີ່ໄດ້ຈັບກຸມຕົວທ່ານນາງ ເມັ່ງ ວ່ານໂຈວ ປະທານຄະນະເຈົ້າໜ້າທີ່ບໍລິຫານ ດ້ານການເງິນ ແລະ ບັນຊີ (ຊີເອຟໂອ) ຂອງບໍລິສັດຫົວເວີ່ຍ ທີ່ເມືອງແວນຄູເວີຣ ເມື່ອວັນເສົາທີ່ຜ່ານມາ ແລະ ກຽມເນລະເທດໄປ ຍັງສະຫະລັດ ເພື່ອເຂົ້າຮັບການດໍາເນີນຄະດີ ແລະ ສືບສວນຕາມຂະບວນການທາງກົດໝາຍຂອງລັດຖະບານວໍຊິງຕັນ ຈາກການທີ່ຫົວເວີ່ຍລະເມີດມາດຕາການຂວໍ້າບາດອີຣ່ານ ຢ່າງໃດກໍ່ຕາມ ມີຄວາມເປັນໄປໄດ້ເຊັ່ນກັນ ທີ່ການເນລະເທດທ່ານນາງ ເມັ່ງ ໄປຍັງສະຫະລັດຍັງບໍ່ເກີດຂື້ນໃນອານາຄົດອັນໃກ້ນີ້ ເນື່ອງຈາກທະນາຍຄວາມຂອງ ທ່ານນາງ ເມັ່ງ ຍື່ນຄໍາຮ້ອງ ເພື່ອວາງຫຼັກຊັບສໍາລັບການປະກັນຕົວແລ້ວ

ຂະນະທີ່ສະຖານເອກອັກຄະລັດຖະທູດຈີນປະຈໍານະຄອນວໍຊິງຕັນ ແລະ ສະຖານເອກອັກຄະລັດຖະທູດຈີນປະຈໍານະຄອນອອດຕາວາ ຕ່າງອອກຖະແຫຼງການສະແດງຄວາມບໍ່ພໍໃຈຢ່າງໜັກ ຈາກເຫດການທີ່ເກີດຂື້ນກັບ  ຫົວເວີ່ຍ ແລະ ຮຽກຮ້ອງໃຫ້ມີການປ່ອຍໂຕ ນາງ ເມັ່ງ “ໂດຍໄວທີ່ສຸດ” ດ້ານຖະແຫຼງການຂອງຫົວເວີ່ຍລະບຸວ່າ ລັດຖະບານອອດຕາວາຈັບກຸມນາງ ເມັ່ງ “ຕາມຄໍາສັ່ງຂອງສະຫະ ລັດ” ດ້ວຍຂໍ້ກ່າວຫາທີ່ “ບໍ່ມີຫຼັກຖານຢືນຢັນຢ່າງຊັດເຈນ” ພ້ອມທັງເຜີຍວ່າ ນາງ ເມັ່ງຢູ່ສະໜາມບິນໃນເມືອງແວນຄູເວີຣພຽງ ຊົ່ວຄາວ ເພື່ອລໍຖ້າປ່ຽນຖ້ຽວບິນຕາມກໍານົດການເທົ່ານັ້ນ

ໃນເວລາດຽວກັນ ເດິ ວໍ ສະຕີທ ເຈີນັລ ລາຍງານໂດຍອ້າງແຫຼ່ງຂ່າວ ວ່າໜ່ວຍງານດ້ານຄວາມໝັ້ນຄົງຂອງສະຫະລັດເຊື່ອ ວ່າຫົວເວີ່ຍ ເຊິ່ງປັດຈຸບັນຖືເປັນໜຶ່ງໃນບໍລິສັດດ້ານໂທລະຄົມລາຍໃຫຍ່ຂອງໂລກ ໂດຍມີສໍານັກງານໃຫຍ່ຢູ່ທີ່ເມືອງເຊິນເຈີ້ນ ທາງພາກໃຕ້ຂອງຈີນ ໃຫ້ຄວາມສະໜັບສະໜູນດ້ານອຸປະກອນ ແລະ ການວາງລະບົບໂຄງຂ່າຍການສື່ສານແກ່ລັດຖະບານເຕຫະ ຣານ ແລະ ທ່ານນາງ ເມັ່ງ ເປັນບຸດສາວຂອງ ທ່ານ ເຫຣິນ ເຈີ້ງເຟີຍ ຜູ້ກໍ່ຕັ້ງຫົວເວີ່ຍ ທີ່ໜ່ວຍງານຂ່າວສານຂອງສະຫະລັດເຊື່ອ ວ່າເຄີຍເປັນນັກວິເຄາະດ້ານເທັກໂນໂລຢີຂອງກອງທັບປົດປ່ອຍປະຊາຊົນຈີນ (ພີແອລເອ)


ນອກຈາກນີ້ ສະຖານະການດັ່ງກ່າວເກີດຂື້ນພຽງ 1 ອາທິດ ຫຼັງນິວຊີແລນປະກາດຢຸດຕິການໃຊ້ງານລະບົບ ແລະ ອຸປະກອນດ້ານ ໂທລະຄົມຂອງຫົວເວີ່ຍ ຕະຫຼອດການຍົກເລີກຮ່ວມມືໃນອານາຄົດກັບຫົວເວີ່ຍ ກ່ຽວກັບໂຄງການເຄືອຂ່າຍຍຸກທີ່ 5 ຫຼື ລະບົບ “5ຈີ” ເນື່ອງຈາກ “ມີຄວາມສ່ຽງຢ່າງມີໄນສໍາຄັນ” ຕໍ່ຄວາມໝັ້ນຄົງຂອງຊາດ ສ່ວນອອສເຕຣເລຍປະກາດແບບດຽວກັນນີ້ເມື່ອເດືອນ ສິງຫາທີ່ຜ່ານມາ.

Leave a Reply

Your email address will not be published. Required fields are marked *

Facebook