ລັດຖະມົນຕີກະຊວງການຕ່າງປະເທດ ຕ້ອນຮັບຄະນະຜູ້ແທນ ກະຊວງການຕ່າງປະເທດ ເວເນຊູເອລາ

ໃນວັນທີ 5 ທັນວາ 2018, ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບທ່ານ ຣູເບັນ ດາຣີໂອ ໂມລີນາ ຮອງລັດຖະມົນຕີ ກະຊວງການຕ່າງປະເທດ ແຫ່ງ ສາທາລະນະລັດ ໂບລີວາຣຽນ ເວເນຊູເອລາ, ຜູ້ຊີ້ນຳວຽກງານຂົງເຂດອາຊີ, ຕາເວັນອອກກາງ ແລະ ໂອເຊອານີ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ລະຫວ່າງວັນທີ 4-5 ທັນວາ ນີ້.

ໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ກໍໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ ທ່ານ ຣູເບັນ ດາຣີໂອ ໂມລີນາ ທີ່ໄດ້ນຳພາຄະນະ ເດີນທາງມາຢ້ຽມຢາມ ແລະ ເຮັດວຽກໃນຄັ້ງນີ້, ຊຶ່ງເປັນ​ການ​ປະກອບສ່ວນ ສຳຄັນ​ ເຂົ້າ​​ໃນ​ການ​ເສີມ​ຂະຫຍາ​ຍ ສາຍ​ພົວພັນ​ມິດຕະພາບ ແລະ ການຮ່ວມມື ຊ່ວຍເຫລືອເຊິ່ງກັນ ແລະ ກັນ ໃນທຸກຂົງເຂດວຽກງານ ພ້ອມທັງສະແດງ ຄວາມຊົມເຊີຍຕໍ່ຜົນສຳເລັດ ໃນກອງປະຊຸມປຶກສາຫາລື ທາງດ້ານການເມືອງ ລາວ-ເວເນຊູເອລາ ຄັ້ງປະຖົມມະລືກ ແນໃສ່ຊອກຫາຊ່ອງທາງ ເພື່ອຂະຫຍາຍສາຍພົວພັນ ມິດຕະພາບອັນດີຖານອ້າຍນ້ອງ ແລະ ການຮ່ວມມື ລະຫວ່ງ ສອງປະເທດ ກໍຄື ລະຫວ່າງ ສອງກະຊວງການຕ່າງປະເທດ ໃຫ້ນັບມື້ນັບເຂັ້ມແຂງ ແລະ ແຕກດອກອອຜົນຍິ່ງໆຂຶ້ນ.

ໃນໂອກາດນີ້, ທ່ານ ຣູເບັນ ດາຣີໂອ ໂມລີນາ ໄດ້​ສະ​ແດງ​ຄວາມ​ຂອບ​ໃຈ​ຕໍ່ ທ່ານ ສະເຫລີມໄຊ ກົມມະສິດ ທີ່​​ໄດ້​ສະຫລະ​ເວລາອັນ​ມີຄ່າ ໃຫ້ການຕ້ອນຮັບອັນອົບອຸ່ນ​ ໃນ​ຄັ້ງນີ້ ແລະ ຈະຍັງສືບຕໍ່ຮ່ວມ​ມື​ ໃນ​ວຽກງານ​ຕ່າງໆ ພ້ອມ​ທັງແຈ້ງ​ຈຸດປະສົງ​ ຂອງ​ການ​ເດີນທາງ​ມາ​ຢ້ຽມຢາມໃຫ້ ທ່ານ ລັດຖະ ມົນຕີ ກະຊວງການຕ່າງປະເທດ ຮັບຊາບຕື່ມອີກ​​.

 

Leave a Reply

Your email address will not be published. Required fields are marked *

Facebook