ເມືອງແກ່ນທ້າວ ເປີດບໍລິການຜ່ານປະຕູດຽວ

ພິທີເປີດບໍລິການຜ່ານປະຕູດຽວຢູ່ເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້ນໃນຕອນແລງ ວັນທີ 5 ທັນວາ 2018 ຢູ່ທີ່ຫ້ອງປະຊຸມ ຫ້ອງການ ການເງິນເມືອງ ໂດຍການເປັນກຽດເຂົ້າຮ່ວມຂອງ ທ່ານ ສີຄານ ແກ່ນມະນີ ຮອງເຈົ້າເມືອງໆແກ່ນທ້າວ, ມີຫົວໜ້າ, ຮອງຫົວໜ້າຫ້ອງການ, ຫົວໜ້າໜ່ວຍງານ, ພະນັກງານຫ້ອງການທີ່ກ່ຽວຂ້ອງ, ນາຍບ້ານ ແລະ ຮອງນາຍບ້ານເທສະບານເຂົ້າຮ່ວມ 40 ກວ່າຄົນ.

ໃນພິທີໄດ້ຜ່ານຂໍ້ຕົກລົງຂອງທ່ານເຈົ້າແຂວງໆໄຊຍະບູລີ ເລກທີ 1234/ຈຂ.ຊຍ ລົງວັນທີ 20 ພະຈິກ 2018 ວ່າດ້ວຍການສ້າງຕັ້ງ ໜ່ວຍງານບໍລິການຜ່ານປະຕູດຽວ, ຂໍ້ຕົກລົງເລກທີ 1233/ຈຂ.ຊຍ ລົງວັນທີ 20 ພະຈິກ 2018 ວ່າດ້ວຍການຮັບຮອງ ເອົາບົດວິພາກການບໍລິການຜ່ານປະຕູດຽວ, ຂໍ້ຕົກລົງເລກທີ 1235/ຈຂ.ຊຍ ລົງວັນທີ 20 ພະຈິກ 2018 ວ່າດ້ວຍການຮັບຮອງ ເອົາກົດລະບຽບການບໍລິການຜ່ານປະຕູດຽວຢູ່ເມືອງແກ່ນທ້າວ, ຂໍ້ຕົກລົງຂອງທ່ານເຈົ້າເມືອງ ເລກທີ 1037/ຈມ.ກທ ລົງວັນທີ 2 ພະຈິກ 2018 ວ່າດ້ວຍການແຕ່ງຕັ້ງຄະນະຮັບຜິດຊອບລວມວຽກງານກົນໄກການບໍລິການຜ່ານປະຕູດຽວ, ຂໍ້ຕົກລົງເລກທີ 1038/ຈມ.ກທ ລົງວັນທີ 2 ພະຈິກ 2018 ວ່າດ້ວຍການແຕ່ງຕັ້ງບັນຈຸ – ສັບຊ້ອນບຸກຄະລາກອນເຂົ້າປະຈໍາຢູ່ໜ່ວຍງານບໍລິການ ຜ່ານປະຕູດຽວ ແລະ ຜ່ານກົດລະບຽບວ່າດ້ວຍການຈັດຕັ້ງເຄື່ອນໄຫວຂອງໜ່ວຍງານຜ່ານປະຕູດຽວ ເຊິ່ງປະຕູດຽວໝາຍເຖິງ ການແກ້ໄຂວຽກງານຂອງການຈັດຕັ້ງ, ຜູ້ປະກອບການ ແລະ ປະຊາຊົນທີ່ນອນຢູ່ໃນຂອບເຂດຂອງອົງການບໍລິຫານລັດ ນັບແຕ່ຂອດຮັບການສະເໜີ, ຮັບເອກະສານຂອງອົງການຈັດຕັ້ງ ແລະ ປະຊາຊົນຈົນຮອດສົ່ງຜົນຕອບ – ສົ່ງເອກະສານຄືນ ໂດຍຜ່ານໜ່ວຍບໍລິການຂອງລັດພຽງບ່ອນດຽວ.

ການປະຕິບັດກົນໄກການບໍລິການຜ່ານປະຕູດຽວ ແນໃສ່ເຮັດໃຫ້ການພົວພັນ ແລະ ແບບແຜນວິທີແກ້ໄຂວຽກງານລະຫວ່າງ ປະຊາຊົນ ຫຼື ການຈັດເກັບໜ່ວຍບໍລິການຂອງລັດມີອັນປ່ຽນແປງແນວໃໝ່ສະດວກຂຶ້ນກວ່າເກົ່າ, ສາມາດຫຼຸດຜ່ອນຄວາມ ຫຍຸ້ງຍາກຕ່າງໆໃຫ້ແກ່ການຈັດຕັ້ງ, ຜູ້ປະກອບການ ແລະ ປະຊາຊົນຜູ້ທີ່ມາພົວພັນວຽກງານສາມາດຈໍາກັດ ແລະ ສາມາດແກ້ໄຂ ປະກົດການຫຍໍ້ທໍ້ຕ່າງໆ. ທັງນີ້, ແນໃສ່ເພື່ອຄຸ້ມຄອງ ແລະ ຈັດເກັບລາຍຮັບໃຫ້ລວມສູນ, ສະກັດກັ້ນການຮົ່ວໄຫຼດ້ານງົບປະມານໃຫ້ ເປັນລະບົບ, ເຮັດໃຫ້ການບໍລິການຂອງລັດໃນການຂໍອະນຸຍາດຕ່າງໆຂອງຜູ້ປະກອບການ, ປະຊາຊົນ ແລະ ອົງການຈັດຕັ້ງຕ່າງໆໃຫ້ ມີຄວາມວ່ອງໄວ, ຫຼຸດຜ່ອນຫຼາຍຂັ້ນຕອນ, ຫຼາຍຂອດ, ຫຼຸດຜ່ອນຄວາມຫຍຸ້ງຍາກລໍາຄານໃຈໃຫ້ແກ່ປະຊາຊົນ, ເພື່ອຕ້ານ ແລະ ສະກັດກັ້ນພະຍາດອາຍາສິດ, ສໍ້ລາດບັງຫຼວງ, ຮັບສິນບົນໃນຖັນແຖວພະນັກງານ – ລັດຖະກອນ, ຍົກສູງ ຄວາມສັກສິດ ແລະ ປະສິດທິພາບຂອງການຄຸ້ມຄອງບໍລິຫານລັດ.

 

Leave a Reply

Your email address will not be published. Required fields are marked *

Facebook