ເສຍຫາຍໜັກ! ກະສິກໍາໄດ້ຮັບງົບເພີ່ມ 500 ຕື້ກີບ

ຈາກເຫດການພາຍຸຫຼາຍຫົວໄດ້ພັດເຂົ້າມາໃນໄລຍະລະດູຝົນ ແລະ ການລະບາດຂອງຕັກແຕນຢູ່ເຂດພາກເໜືອ ໄດ້ສ້າງຄວາມ ເສຍຫາຍໃຫ້ແກ່ຂົງເຂດກະສິກຳເປັນວົງກວ້າງ,ລັດຖະບານຕ້ອງແຂ່ງກັບເວລາໃນການຟື້ນຟູໂດຍໄດ້ຈັດງົບປະມານແກ້ໄຂສຸກເສີນ 500 ຕື້ກີບ .

ຄວາມເສຍຫາຍຈາກໄພພິບັດທາງທຳມະຊາດໃນປີ 2018 ຫຼາຍເຖິງ 2 ພັນຕື້ກີບ ນັບແຕ່ຜົນລະປູກຂອງປະຊາຊົນ, ພື້ນຖານໂຄງລ່າງ, ຖະໜົນຫົນທາງ, ລະບົບຊົນລະປະທານຕ່າງໆ. ເຊິ່ງຜ່ານມາລັດຖະບານໄດ້ເຮັດທຸກວິທີທາງເພື່ອແກ້ໄຂ ແລະ ເລັ່ງຟື້ນຟູຄວາມເສຍຫາຍໂດຍໄວແຕ່ກໍ່ປາສະຈາກເລື່ອງຄວາມບໍ່ທົ່ວເຖິງຕ້ອງໄດ້ມອບໃຫ້ແຂວງເປັນເຈົ້າການ ເນື່ອງຈາກຄວາມເສຍຫາຍມີຢູ່ທົ່ວທຸກແຂວງຍົກເວັ້ນແຂວງທີ່ເສຍຫາຍໜ້ອຍທີ່ສຸດ ຄື: ແຂວງໄຊສົມບູນ ແລະ ແຂວງສາລະວັນ.

ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ຕອບຂໍ້ຊັກຖາມຂອງ ສສຊ ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ວ່າ: ການຂະຫຍາຍຕົວຂອງຂະແໜງກະສິກຳຈະບໍ່ເປັນໄປຕາມແຜນກຳນົດຄືລະດັບ 2,8% ໃນປີ 2018 ນີ້ ຍ້ອນຜົນກະທົບຈາກໄພນ້ຳຖ້ວມຢູ່ຫຼາຍເຂດໃນທົ່ວປະເທດ ເພື່ອເປັນການແກ້ໄຂ ແລະ ຟື້ນຟູຄວາມເສຍ ຫາຍ ລັດຖະບານໄດ້ສຸມທຶນ 100 ຕື້ກີບ ແກ້ໄຂສຸກເສີນໃນປີ 2018 ແລະ ອະນຸມັດເພີ່ມ 500 ຕື້ກີບ ສຳລັບປີ 2019 ເຂົ້າໃນການປັບປຸງພື້ນຖານໂຄງລ່າງໃຫ້ກັບຄືນສູ່ປົກກະຕິ.

ພາຍຫຼັງສຳເລັດການສ້ອມແປງສຸກເສີນ ແລະ ຟື້ນຟູບັນດາພື້ນຖານໂຄງລ່າງ ແລະ ສິ່ງອຳນວຍຄວາມສະດວກຕ່າງໆ ເປັນຕົ້ນ: ລະບົບຊົນລະປະທານ, ຈັກສູບນ້ຳ, ເໝືອງຝາຍ, ແນວພັນເຂົ້າ, ຝຸ່ນ, ປຸ໋ຍ ແລະ ປັດໄຈການຜະລິດອື່ນໆ ຈະເຮັດໃຫ້ມີປະສິດທິ ພາບໃນການຜະລິດສູງຂຶ້ນໃນເຂດທີ່ມີທ່າແຮງ ເຊັ່ນ: ເຂດທົດລອງປູກເຂົ້າແຂວງສະຫວັນນະເຂດ ແລະ ແຂວງຄຳມ່ວນ ຄາດວ່າໃນປີ 2019 ກະສິກຳຈະກັບມາຂະຫຍາຍຕົວຢູ່ໃນລະດັບປົກກະຕິ 2,8% – 3%.

ຢ່າງໃດກໍ່ຕາມ, ງົບປະມານດັ່ງກ່າວບໍ່ໄດ້ມີການຢັ້ງຢືນວ່າຈະສາມາດກະຈາຍໄດ້ຢ່າງທົ່ວເຖິງ ເພາະງົບປະມານດັ່ງກ່າວອາດຈະເນັ້ນ ໃສ່ແຕ່ສະເພາະການປູກລະດູແລ້ງຫຼາຍກວ່າ, ແນວໃດກໍ່ຕາມຖືວ່າເປັນຂ່າວດີເມື່ອລັດຖະບານໄດ້ມີແຜນປັບຫຼຸດຄ່າໄຟຟ້າຊົນ ລະປະທານຫຼາຍເຖິງ 50% ແລະ 30% ຂະແໜງກະສິກຳລ້ຽງສັດຈາກທີ່ເຄີຍເກັບໃນອັດຕາທີ່ກ້າວໜ້າ ເຊິ່ງຈະເລີ່ມປະຕິບັດນັບແຕ່ ວັນທີ 1 ມັງກອນ 2019 ເປັນຕົ້ນໄປ.

 

[ ຂ່າວ: ສຸລິນ; ຮູບ: ວິລະສັກ ]

Leave a Reply

Your email address will not be published. Required fields are marked *

Facebook