ລາຄາພືດຜັກໃນນະຄອນຫຼວງຫຼຸດລົງ ຂະນະທີ່ຕ່າງແຂວງລາຄາເຂົ້າສານຈ້າວຫຼຸດລົງ

ພືດຜັກບາງຕະຫຼາດໃນນະຄອນຫຼວງວຽງຈັນ ອາທິດນີ້ ແມ່ຄ້າເຜີຍຫຼາຍລາຍການແມ່ນຖືວ່າຫຼຸດລົງ ເນື່ອງຈາກຫຼາຍທ້ອງຖິ່ນໄດ້ ປູກຂາຍສົ່ງອອກຕະຫຼາດ, ໃນຂະນະທີ່ຕະຫຼາດຕ່າງແຂວງລາຄາເຂົ້າສານຈ້າວ ແມ່ນໄດ້ຫຼຸດລົງ    1 – 2 ພັນກີບຕໍ່ກິໂລ.

ໃນວັນທີ 6 ທັນວາ 2018 ຜ່ານມາ ທີມຂ່າວໜັງສືພິມ ເສດຖະກິດ – ການຄ້າ ພວກເຮົາໄດ້ລົງຕິດຕາມລາຄາສິນຄ້າ ແລະ ສຳພາດແມ່ຄ້າຊາວຂາຍຢູ່ບາງຕະຫຼາດໃນນະຄອນຫຼວງວຽງຈັນ ວ່າ: ລາຄາສິນຄ້າປະເພດພືດຜັກໃນໄລຍະນີ້ແມ່ນຂ້ອນຂ້າງ ຫຼຸດລົງຫຼາຍແລ້ວ ຖ້າທຽບໃສ່ 2 ເດືອນກ່ອນ ເນື່ອງຈາກປະຊາຊົນໄດ້ປູກຜັກໃນຫຼາຍທ້ອງຖິ່ນບໍ່ສະເພາະແຕ່ເຂດບ້ານຫ້ອມ ເມືອງຫາດຊາຍຟອງ ແຕ່ເຂດອື່ນໆກໍ່ໄດ້ມີການປູກ ແລະ ໄດ້ສົ່ງເຂົ້າມາຂາຍໃນຕະຫຼາດນະຄອນຫຼວງວຽງຈັນ.

ແມ່ ສອນ ຂາຍຜັກຍ່ອຍທີ່ຕະຫຼາດຫົວຂົວ ເມືອງໄຊເສດຖາ ນະຄອນຫຼວງວຽງຈັນ ໃຫ້ສຳພາດວ່າ: ລາຄາຜັກໃນໄລຍະນີ້ແມ່ນຫຼຸດ ລົງຫຼາຍແລ້ວເມື່ອທຽບໃສ່ເມື່ອກ່ອນ ເຊັ່ນ: ຜັກບົ້ງ 4 ພັນກີບຕໍ່ກິໂລ, ຜັກກາດຂາວ 5 ພັນກີບຕໍ່ກິໂລ, ຜັກສະຫຼັດ 5 ພັນກີບຕໍ່ກິໂລ, ຫອມບົ່ວ 14 ພັນກີບຕໍ່ກິໂລ, ໝາກນາວ 12 ພັນກີບຕໍ່ກິໂລ, ຜັກເຊເລີຣີ 24 ພັນກີບຕໍ່ກິໂລ, ຜັກກາດດອກ 8 ພັນກີບຕໍ່ກິໂລ, ໝາກເຜັດ 22 ພັນກີບຕໍ່ກິໂລ ເຊິ່ງລາຄາທີ່ກ່າວມານີ້ບາງມື້ກໍ່ຂາຍຫຼຸດ 1 – 5 ພັນກີບຕໍ່ກິໂລ ແລ້ວແຕ່ມື້ຜັກໜ້ອຍ – ຫຼາຍ ແລະ ສາເຫດທີ່ເຮັດໃຫ້ລາຄາຜັກຫຼຸດລົງແມ່ນເນື່ອງມາຈາກປະຊາຊົນໃນຫຼາຍທ້ອງຖິ່ນໄດ້ປູກ ແລະ ໄລຍະນີ້ຜັກກໍ່ຂ້ອນຂ້າງງອກງາມດີ.

ເອື້ອຍ ປານີ ຂາຍຜັກທີ່ຕະຫຼາດໂນ້ນຄໍ້ ເມືອງໄຊເສດຖາ ນະຄອນຫຼວງວຽງຈັນ ໃຫ້ຮູ້ວ່າ: ຮ້ານຂອງພວກເຮົາແມ່ນໄດ້ນຳເອົາສິນຄ້າ ປະເພດພືດຜັກມາຂາຍ ເຊັ່ນ: ໝາກເຫຼ່ນ, ໝາກຫຸ່ງ, ໝາກນາວ, ໝາກເຜັດ ແລະ ອື່ນໆ ເຊິ່ງບາງລາຍການສິນຄ້າກໍ່ນຳເຂົ້າມາ ຈາກປະເທດເພື່ອນບ້ານ ຄື: ໝາກຫຸ່ງ ເນື່ອງຈາກຫຼາຍບ້ານເຂດເມືອງໄຊທານີ ທີ່ເຄີຍມີໝາກຫຸ່ງສະໜອງຕະຫຼາດ ສວນໄດ້ຖືກນ້ຳຖ້ວມໃນລະດູຝົນຜ່ານມາ ເຮັດໃຫ້ບໍ່ມີຜົນຜະລິດສະໜອງຕະຫຼາດ ແຕ່ວ່າລາຄາຂາຍກໍ່ຍັງຖືວ່າບໍ່ແພງ 4 ພັນກີບຕໍ່ກິໂລ ແລະ ສິນຄ້າປະເພດອື່ນສ່ວນໃຫຍ່ເປັນສິນຄ້າພາຍໃນຂາຍລາຄາບໍ່ແພງ ເຊັ່ນ: ໝາກເຫຼ່ນ 6 ພັນກີບຕໍ່ກິໂລ, ໝາກນາວ 8 ພັນກີບຕໍ່ກິໂລ, ໝາກເຜັດ 10 ພັນກີບຕໍ່ກິໂລ  ( ແລ້ວແຕ່ປະເພດ ).

ນອກຈາກນີ້, ແມ່ຄ້າທັງສອງຍັງໃຫ້ຮູ້ຕື່ມອີກວ່າ: ສຳລັບປີໃໝ່ສາກົນນີ້ຄາດວ່າລາຄາສິນຄ້າປະເພດພືດຜັກຈະມີການປັບຂຶ້ນເລັກ ໜ້ອຍ ເນື່ອງຈາກຈະມີການຊື້ – ຂາຍ ຫຼາຍກວ່າປົກກະຕິ, ໃນຂະນະທີ່ລາຄາສິນຄ້າຕ່າງແຂວງ 3 ແຂວງ ຄື: ອຸດົມໄຊ, ຊຽງຂວາງ ແລະ ສະຫວັນນະເຂດ ມີການເໜັງຕີງເລັກໜ້ອຍ ໂດຍສະເພາະແມ່ນສິນຄ້າປະເພດພືດຜັກທີ່ເປັນສິນຄ້າຕາມລະດູການ.

ຈາກການສັງລວມຂອງພະແນກອຸດສາຫະກຳ ແລະ ການຄ້າໃນ 3 ແຂວງໃນອາທິດນີ້ ວັນທີ 5 ທັນວາ 2018 ເຫັນວ່າ ສິນຄ້າປະເພດ ເຂົ້າສານຈ້າວ ໃນຕະຫຼາດ 3 ແຂວງ ມີການຫຼຸດລົງ 1 – 2 ພັນກີບຕໍ່ກິໂລ, ຂະນະທີ່ລາຄາພືດຜັກອື່ນແມ່ນມີການເໜັງຕີງຂຶ້ນ – ລົງເລັກໜ້ອຍ ຄື:

ຕະຫຼາດແຂວງອຸດົມໄຊ: ອາທິດນີ້ ເຂົ້າສານຈ້າວມະລິລາວ ຫຼຸດລົງຢູ່ທີ່ 7 ພັນກີບຕໍ່ກິໂລ ອາທິດຜ່ານມາ 9 ພັນກີບຕໍ່ກິໂລ, ຜັກຫອມປ້ອມ ຫຼຸດລົງ 5 ພັນກີບຕໍ່ກິໂລ ອາທິດຜ່ານມາ 10 ພັນກີບຕໍ່ກິໂລ, ຜັກຫອມລາບ ຫຼຸດລົງຢູ່ທີ່ 15 ພັນກີບຕໍ່ກິໂລ ອາທິດຜ່ານມາ 20 ພັນກີບ, ຜັກຊີ ຫຼຸດລົງເຫຼືອ 10 ພັນກີບຕໍ່ກິໂລ ອາທິດຜ່ານມາ 15 ພັນກີບຕໍ່ກິໂລ. ນອກຈາກນັ້ນ, ຍັງມີລາຍການສິນຄ້າປະເພດພືດຜັກຊະນິດອື່ນໆທີ່ມີການຫຼຸດລົງເລັກໜ້ອຍ.

ແຂວງຊຽງຂວາງ: ອາທິດນີ້ ເຂົ້າສານຈ້າວມະລິລາວ ຫຼຸດລົງຢູ່ທີ່ 8 ພັນກີບຕໍ່ກິໂລ ອາທິດຜ່ານມາ 9 ພັນກີບຕໍ່ກິໂລ ແລະ ເຂົ້າສານຈ້າວມະລິໄທ ຫຼຸດລົງເຫຼືອ 13 ພັນກີບຕໍ່ກິໂລ ອາທິດຜ່ານມາ 15 ພັນກີບຕໍ່ກິໂລ ໃນຂະນະທີ່ລາຍການສິນຄ້າປະເພດອື່ນໆ ແມ່ນຢູ່ໃນເກນປົກກະຕິໃນອາທິດຜ່ານມາ.

ແຂວງສະຫວັນນະເຂດ: ອາທິດນີ້ ເຂົ້າສານຈ້າວລາວ ປະເພດ 1 ຫຼຸດລົງຢູ່ທີ່ 9 ພັນກີບຕໍ່ກິໂລ ອາທິດຜ່ານມາ 10 ພັນກີບຕໍ່ກິໂລ ແລະ ເຂົ້າສານຈ້າວລາວ ປະເພດ 2 ກໍ່ຫຼຸດລົງຢູ່ທີ່ 7 ພັນກີບຕໍ່ກິໂລ ຈາກອາທິດຜ່ານມາ 8 ພັນກີບຕໍ່ກິໂລ; ດ້ານລາຄາສິນຄ້າປະ ເພດພືດຜັກກໍ່ຍັງມີການເໜັງຕີງຂຶ້ນ – ລົງເລັກໜ້ອຍ ເຊັ່ນ: ຜັກສະຫຼັດ ເພີ່ມຂຶ້ນເປັນ 15 ພັນກີບຕໍ່ກິໂລ ອາທິດຜ່ານມາ 8 ພັນກີບຕໍ່ກິໂລ, ຜັກຫອມບົ່ວ ຫຼຸດລົງຢູ່ທີ່ 14 ພັນກີບຕໍ່ກິໂລ ອາທິດຜ່ານມາ 18 ພັນກີບຕໍ່ກິໂລ, ໝາກເຜັດດິບ ຫຼຸດລົງຢູ່ທີ່ 20 ພັນກີບຕໍ່ກິໂລ ອາທິດຜ່ານມາ 25 ພັນກີບຕໍ່ກິໂລ. ນອກຈາກນັ້ນ, ຍັງມີລາຍການສິນຄ້າປະເພດອື່ນໆທີ່ມີລາຄາເໜັງຕີງຕ່າງຈາກ ອາທິດຜ່ານມາ.

 

( ຂ່າວ: ສັນຕິ )

 

Leave a Reply

Your email address will not be published. Required fields are marked *

Facebook