ເຊັນສັນຍາຮ່ວມມືການໃຫ້ບໍລິການ ດ້ານໂທລະຄົມມະນາຄົມ ໃນເຂດເສດຖະກິດສະເພາະບໍ່ເຕນ

ກຸ່ມບໍລິສັດ ພັດທະນາ ເຂດເສດຖະກິດສະເພາະບໍ່ເຕ່ນແດນງາມ ລາວ ຈໍາກັດ ( ຂສບ ) ໄດ້ເລືອກ ບໍລິສັດ ລັດວິສາຫະກິດ ລາວໂທລະຄົມມະນາຄົມ ( ທທລ ) ໃຫ້ເປັນຜູ້ພັດທະນາ ແລະ ສະໜອງການບໍລິການດ້ານໂທລະຄົມມະນາຄົມແບບຄົບວົງຈອນໃນ ເຂດເສດຖະກິດສະເພາະບໍ່ເຕ່ນແດນງາມ ແຂວງຫຼວງນໍ້າທາ ເປັນເວລາ 5 ປີ ເພື່ອອໍານວຍຄວາມສະດວກທາງດ້ານພື້ນຖານ ໂຄງລ່າງຄົມມະນາຄົມໃຫ້ສະດວກສະບາຍ, ທັນສະໄໝ ແລະ ໄດ້ມາດຕະຖານສາກົນ.

ພິທີເຊັນສັນຍາຮ່ວມມືມີຂຶ້ນໃນວັນທີ 6 ທັນວາ 2018 ທີ່ສໍານັກງານໃຫຍ່ ທທລ ລະຫວ່າງ ທ່ານ ຈິດປະສົງ ໜູແກ້ວໄກສອນ ຮອງຜູ້ອໍານວຍການໃຫຍ່ ບໍລິສັດ ລັດວິສາຫະກິດ ລາວໂທລະຄົມມະນາຄົມ ກັບ ທ່ານ ນາງ ຢາງຢ້າຫົງ ຮອງຜູ້ອໍານວຍການ ປະຈໍາການ ກຸ່ມບໍລິສັດ ພັດທະນາເຂດເສດຖະກິດສະເພາະບໍ່ເຕ່ນແດນງາມ ລາວ ຈໍາກັດ ໂດຍເປັນກຽດເຂົ້າຮ່ວມຂອງທ່ານ ທອງໃສ ຊານໄຊຍະ ຮອງລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ, ທ່ານ ພົນຕີ ກົງທອງ ພົງພິຈິດ ຮອງລັດຖະມົນຕີກະຊວງ ປກສ, ມີຜູ້ຕາງໜ້າຈາກຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ຫົວໜ້າຄະນະກໍາມະ ການຮ່ວມມືລາວ – ຈີນ ພ້ອມດ້ວຍແຂກຖືກເຊີນເຂົ້າຮ່ວມ.

ຈຸດປະສົງຂອງການລົງນາມເຊັນສັນຍາໃນຄັ້ງນີ້ແມ່ນ ກຸ່ມບໍລິສັດ ພັດທະນາເຂດເສດຖະກິດສະເພາະບໍ່ເຕ່ນແດນງາມ ລາວ ຈໍາກັດ ໄດ້ຄັດເລືອກໃຫ້ ບໍລິສັດ ລັດວິສາຫະກິດ ລາວໂທລະຄົມມະນາຄົມ ເປັນຜູ້ດໍາເນີນການພັດທະນາ ແລະ ສະໜອງການບໍລິການທາງ ດ້ານການສື່ສານຄົມມະນາຄົມແບບຄົບວົງຈອນ ພາຍໃນກໍານົດເວລາ 5 ປີ ເພື່ອອໍານວຍຄວາມສະດວກທາງດ້ານພື້ນຖານ ໂຄງລ່າງການສື່ສານໂທລະຄົມມະນາຄົມທີ່ສະດວກສະບາຍ, ທັນສະໄໝ ແລະ ໄດ້ມາດຕະຖານໃຫ້ແກ່ການຈັດຕັ້ງປະຕິບັດແຜນພັດ ທະນາຂອງ ຂສບ ໃຫ້ບັນລຸຕາມຈຸດປະສົງທີ່ວາງໄວ້ໃນການຮ່ວມມືພັດທະນາ ໜຶ່ງແລວທາງໜຶ່ງເສັ້ນທາງ ຂອງລັດຖະບານ ສປ ຈີນ. ຂໍ້ມູນຂອງລາວໂທລະຄົມ ຍັງໃຫ້ຮູ້ຕື່ມອີກວ່າ: ປັດຈຸບັນສາມາດຕອບສະໜອງບໍລິການເຂົ້າເຖິງລູກຄ້າທັງລະບົບໃຊ້ສາຍ ແລະ ໄຮ້ສາຍ ໄດ້ແລ້ວຫຼາຍກວ່າ 3,5 ລ້ານລູກຄ້າໃນທົ່ວປະເທດ ເຊິ່ງໃນປີ 2011 ລາວໂທລະຄົມໄດ້ເປີດບໍລິການ 4ຈີ ຢ່າງເປັນທາງການ ຖືວ່າເປັນບໍລິສັດທໍາອິດ ແລະ ເປັນບໍລິສັດທີສອງໃນອາຊຽນຮອງລົງມາຈາກສິງກະໂປ ເພື່ອຕອກຢໍ້າຄວາມເປັນຜູ້ນໍາທາງດ້ານ ການສື່ສານໂທລະຄົມມະນາຄົມໃນລາວ ແລະ ຕົ້ນປີ 2017 ລາວໂທລະຄົມຍັງໄດ້ເປີດໃຫ້ບໍລິການ 4.5ຈີ ໃນນະຄອນຫຼວງວຽງຈັນ ແລະ ຂະຫຍາຍການບໍລິການໄປສູ່ບັນດາແຂວງຕ່າງໆຄວບຄຸມໃນຂອບເຂດທົ່ວປະເທດ.

 

[ ຂ່າວ: ສົມສະຫວິນ; ຮູບ: ວິລະສັກ ]

Leave a Reply

Your email address will not be published. Required fields are marked *

Facebook