ໂຈນປຸ້ນຊິງຊັບ, ດືງກະເປົາ, ເປົ້າໝາຍແມ່ນແມ່ຍີງ ແລະຜູ້ເຖົ້າ

ສະພາບຊິງຊັບພົນລະເມືອງຢູ່ນະຄອນຫຼວງວຽງຈັນ ແມ່ນເກີດຂຶ້ນຢ່າງເນື່ອງນິດລຽນຕິດ, ຜູ້ກໍ່ເຫດສ່ວນຫຼາຍແມ່ນໄວລຸ້ນ, ໄວຄະນອງ ແລະ ພວກມົ້ວສຸມຢາເສບຕິດ, ເຊິ່ງພວກເຂົາກໍ່ເຫດຢ່າງບັງອາດເປີດແປນ ແລະ ສ້າງເປັນກຸ່ມແກ້ງ ຜູ້ທີ່ຕົກເປັນເຫຍື່ອສ່ວນຫຼາຍເປັນເພດຍິງ ແລະ ຜູ້ເຖົ້າ ທີ່ຂັບຂີ່ລົດຈັກ ແລະ ຍ່າງໄປຕາມທາງ ເຊັ່ນ: ນັບແຕ່ວັນທີ 6-26 ພະຈິກ ທີ່ຜ່ານມາ, ມີສະພາບຊິ່ງຊັບພົນລະເມືອງ ທັງໝົດ 19 ເລື່ອງ ມີລົດຈັກເສຍຫາຍ 4 ຄັນ ແລະ ເຄື່ອງມີຄ່າຈໍານວນໜຶ່ງ.

ຫ້ອງຕໍາຫຼວດ ປກສ ນະຄອນຫຼວງວຽງຈັນ ໃຫ້ຮູ້ວ່າ: ປັດຈຸບັນ, ປະກົດການຊິງຊັບພົນລະເມືອງ ເຫັນວ່ານັບມື້ນັບມີຄວາມຮຸນແຮງຂຶ້ນເລື້ອຍໆ, ເຊິ່ງໄລຍະຜ່ານມາ ມີຜູ້ຕົກເປັນເຫຍື້ອຈໍານວນຫຼວງຫຼາຍ ສ່ວນຫຼາຍຜູ້ທີ່ຕົກເປັນເຫຍື່ອແມ່ນເປັນເພດຍິງ, ຜູ້ເຖົ້າ ແລະ ນັກທ່ອງທ່ຽວຊາວຕ່າງປະເທດ ສະແດງອອກໃນເວລາ 18 ໂມງຂອງວັນທີ 14 ພະຈິກ ໄດ້ມີຄົນຮ້າຍ 1 ຄົນ ຂັບຂີ່ລົດຈັກ ເຂົ້າໄປດຶງເອົາສາຍຄໍຄໍາຂອງ ນາງ ຄອນສະຫວັນ ອາຍຸ 40 ປີ ພັກເຊົາຢູ່ບ້ານວັດໄຕທົ່ງ ເມືອງສີໂຄດຕະບອງ ໃນລະຫວ່າງຜູ້ກ່ຽວຂັບຂີ່ລົດຈັກໄປຮອດໄຟແດງ ບ້ານນາຄໍາ ເມືອງສີໂຄດ, ເຊິ່ງມີຄໍາຮູບປະພັນເສຍຫາຍນໍ້າໜັກ 1 ບາດ.

ນາງ ວຽງໄຊ ອາຍຸ 75 ປີ ຢູ່ບ້ານໂພນປ່າເປົ້າ ເມືອງສີສັດຕະນາກ ເຂົ້າແຈ້ງຄວາມຕໍ່ເຈົ້າໜ້າທີ່ ປກສ ເມືອງສີສັດຕະນາກ ວ່າ: ເວລາ 9 ໂມງຂອງວັນທີ 15 ພະຈິກ, ມີຄົນຮ້າຍ 1 ຄົນ ຂັບຂີ່ລົດຈັກໄປດ້ານຫຼັງ ແລ້ວດຶງເອົາກະເປົາຢູ່ໃນມື ຂະນະທີ່ຍ່າງເລາະຕະຫຼາດ ຮອດເຂດທາງ 4 ແຍກໂຮງງານຕັດຍິບທີ່ຢູ່ບ້ານໂພນປ່າເປົ້າ ແລ້ວຫຼົບໜີໄປ, ໃນກະເປົາ ມີສາຍຄໍາ 1 ເສັ້ນ ນໍ້າໜັກ 2 ບາດ, ເງິນ 2.500 ບາດ, ເງິນກີບ 1 ລ້ານກີບ, ກີ້ເພັດ 1 ອັນ ມູນຄ່າ 2.500.000 ກີບ ແລະ ແຫວນຄໍາ 1 ວົງ ມີນໍ້າໜັກ 1 ສະຫຼຶງ.

ໃນເວລາ 11 ໂມງ ຂອງວັນທີ 17 ພະຈິກ, ມີຄົນບໍ່ດີ 2 ຄົນ ຂັບຂີ່ລົດຈັກເວັບ 100 ສີດໍາ ບໍ່ຕິດປ້າຍທະບຽນ ຊ້ອນກັນໄປດຶງເອົາສາຍຄໍຄໍາຂອງ ທ້າວ ຄໍາຕັນ ອາຍຸ 65 ປີ ຢູ່ບ້ານສີໄຄທົ່ງ ເມືອງສີໂຄດຕະບອງ ຢູ່ເສັ້ນທາງຕໍ່ໜ້າສູນລາວໂທລະຄົມ ຕັ້ງຢູ່ບ້ານສາຍລົມ ເມືອງຈັນທະບູລີ ໃນຂະນະທີ່ກໍາລັງຂີ່ລົດຈັກກັບເຮືອນ, ເຊິ່ງມີສາຍຄໍາເສຍຫາຍ 1 ເສັ້ນ ມີນໍ້າໜັກ 3 ບາດ.

ເວລາ 11 ໂມງຂອງ ວັນທີ 18 ພະຈິກ, ໄດ້ມີຄົນບໍ່ດີ 2 ຄົນ ຂັບຂີ່ລົດຈັກຮອນດາ ສີດໍາ ບໍ່ຕິດປ້າຍທະບຽນ ເຂົ້າມາດຶງເອົາສາຍຄໍຄໍາຂອງ ທ້າວ ຕິກພິດຕະພັນ ອາຍຸ 45 ປີ ຢູ່ບ້ານຫັດສະດີ ເມືອງຈັນທະບູລີ ຢູ່ເສັ້ນທາງບ້ານສີສະຫວາດ ໃນຂະນະທີ່ຜູ້ກ່ຽວຂັບຂີ່ລົດຈັກກັບເຮືອນ, ຜົນເສຍຫາຍມີສາຍຄໍຄໍາໜັກ 5 ບາດ ໜຶ່ງເສັ້ນ.

ນາງ ປາວີນາ ອາຍຸ 39 ປີ ຢູ່ບ້ານ ໂພນສະຫວັນ ເມືອງສີສັດຕະນາກ ໄດ້ເຂົ້າແຈ້ງຄວາມຕໍ່ເຈົ້າໜ້າທີ່ ປກສ ເມືອງ ສີສັດຈະນາກວ່າ: ເວລາ 14 ໂມງ ຂອງວັນທີ 20 ພະຈິກ, ໄດ້ມີໄວລຸ້ນ 2 ຄົນ ຂັບຂີ່ລົດຈັກຮອນດາເວັບ 100 ຊ້ອນກັນມາແຕ່ດ້ານຫຼັງ ດຶງເອົາກະເປົາຢູ່ມືຂອງຜູ້ກ່ຽວ ໃນຄະນະທີ່ກໍາລັງລໍຂ້າມທາງ ຢູ່ຕໍ່ໜ້າສຸນການຄ້າວຽງຈັນ ເຊັນເຕີ ຕັ້ງຢູ່ບ້ານເກົ້າຍອດ ເມືອງສີສັດຕະນາກ, ເຊິ່ງໃນກະເປົາມີເງິນ 8 ລ້ານກີບ, 800 ໂດລາສະຫະລັດ, ໂທລະສັບ 2 ເຄື່ອງ, ບັດເອທີເອັມ 5 ບັດ ແລະ ເອກະສານຈໍານວນໜຶ່ງ ລວມມູນຄ່າເສຍຫາຍ 3.840 ໂດລາ ສະຫະລັດ.

 

ເວລາ 12 ໂມງຂອງວັນທີ 20 ພະຈິກ, ມີໄວລຸ້ນ 2 ຄົນ ຂັບຂີ່ລົດຈັກເຂົ້າໄປດຶງເອົາກະເປົາຂອງ ນາງ ບຸນມີ ອາຍຸ 53 ປີ ຢູ່ບ້ານສະພັງໝໍ້ ເມືອງໄຊເສດຖາ ຢູ່ຕໍ່ໜ້າຕະຫຼາດສະພານທອງ ເມືອງສີສັດຕະນາກ ໃນຂະນະທີ່ກໍາລັງຂັບຂີ່ລົດຈັກໄປຊື້ເຄື່ອງໃຊ້. ໃນກະເປົາມີເງິນເສຍຫາຍ ເງິນ 15 ລ້ານກີບ, ເງິນບາດ 10.000 ບາດ, ເງິນໂດລາ 20 ໂດລາສະຫະລັດ, ບັດເອທີເອັມ, ບັດປະກັນສັງຄົມ, ບັດປະຈໍຕົວ, ພັດສະປອດ ແລະ ໃບຂັບຂີ່ຢ່າງລະ 1 ບັດ.

ຢ່າງໃດກໍຕາມ, ກ່ອນເດີນທາງອອກຈາກເຮືອນຈະໄປວຽກທາງໃດ ກໍຄວນມີສະຕິ, ມີຄວາມລະມັດລະວັງຕົວໃຫ້ສູງກວ່າເກົ່າ ໂດຍສະເພາະແມ່ຍິງ ແລະ ຜູ້ເຖົ້າ ບໍ່ຄວນໃສ່ເຄື່ອງປະດັບທີ່ມີຄ່າຫຼາຍເກີນໄປ ແລະ ບໍ່ຄວນພົກພາເງິນໃສ່ກະເປົາຈໍານວນຫຼາຍ ຫຼື ຖ້າຈໍາເປັນກໍຄວນໃຫ້ລູກຫຼານ ຫຼື ບຸກຄົນທີ່ໄວ້ໃຈໄປນໍາ ເພື່ອຮັບປະກັນພວກຄົນບໍ່ດີກໍ່ເຫດຊິງຊັບເອົາໄດ້.

 

 

ຂໍ້ມູນມາຈາກ : ເລົ່າສູ່ກັນຟັງ

 

Leave a Reply

Your email address will not be published. Required fields are marked *

Facebook