ຊົມເຊີຍເຈົ້າໜ້າທີ່ກວດກາປ່າໄມ້ແຂວງຊຽງຂວາງ ຊ່ວຍລູກໝີ ຈາກຊາຍຫວຽດນາມ

ເມື່ອທ້າຍເດືອນພະຈິກທີ່ຜານມາ ຂະນະທີ່ເຈົ້າໜ້າທີ່ກົມກວດກາປ່າໄມ້ແຂວງຊຽງຂວາງ ກຳລັງຂັບລົດຈັກເມືອເຮືອນ ໄດ້ເຫັນລົດກະບະຄັນໜຶ່ງ ບັນທຸກກົງຂັງສັດຢູ່ດ້ານຫຼັງຂອງລົດ, ໃນກົງມີລູກໝີ ຫຼື ເໝືອຍ (Sun Bear) ໂຕໜຶ່ງ ຖືກຂັງຢູ່ ຈຶ່ງຟ້າວໂທຫາເຈົ້າໜ້າທີ່ກວດກາປ່າໄມ້ຄົນອື່ນໆ ທີ່ເຮັດວຽກນຳກັນ ສ່ວນລາວເຝົ້າເບິ່ງລູກໝີໂຕນີ້ຢູ່.

ເມື່ອເຈົ້າໜ້າທີ່ຄົນອື່ນມາຮອດ ພວກເຂົາຈຶ່ງເຂົ້າຈັບກຸມຕົວຊາຍຫວຽດນາມ ພ້ອມຢຶດລົດ, ກົງຂັງສັດ ແລະ ລູກໝີໄວ້ ຈາກການສືບສວນ ຊາຍຫວຽດນາມຄົນດັ່ງກ່າວ ອ້າງວ່າ ໄດ້ຄອບຄອງລູກໝີໂຕນີ້ ມາເປັນເວລາ 5 ເດືອນແລ້ວ ແລະ ກຳລັງຈະຍ້າຍໄປຢູ່ສວນຂອງຕົນແຫ່ງໜຶ່ງ ມີລາຍງານວ່າ ຊາຍຫວຽດນາມຄົນນີ້ ຖືກປັບໃໝເງິນເປັນຈຳນວນຫຼາຍ ແລະ ຖືກຕັກເຕືອນ ເນື່ອງຈາກການກະທຳຜິດຕໍ່ລະບຽບກົດໝາຍວ່າດ້ວຍການຄຸ້ມຄອງສັດປ່າຫາຍາກ, ແນວໃດກໍ່ຕາມ ເປັນສິ່ງທີ່ໜ້າພາກພູມໃຈທີ່ເຫັນເຈົ້າໜ້າທີ່ປະຕິບັດໜ້າທີ່ໄດ້ດີ.

ອີງຕາມການລາຍງານຈາກ Free the Bears Fund ລູກໝີໂຕນີ້ ເປັນເພດແມ່ ອາຍຸປະມານ 6 ເດືອນ ແຕ່ເບິ່ງຈາກຂະໜາດແລ້ວ ຄືອາຍຸລະຫວ່າງ 2-3 ເດືອນ ໜ້າຈະຂາດສານອາຫານຈຶ່ງເຮັດໃຫ້ການຈະເລີນເຕີບໂຕຊ້າ ລູກໝີໂຕນີ້ ມີອາການອ່ອນແອ ເຖິງແມ່ນວ່າຈະໄດ້ກິນອາຫານກໍ່ຕາມ.

ເຈົ້າໜ້າທີ່ໄດ້ມອບລູກໝີໂຕນີ້ແກ່ອົງການ Free the Bears ເມື່ອວັນທີ 4 ທັນວາຜ່ານມານີ້ ກ່ອນຈະສົ່ງໄປເບິ່ງແຍງຮັກສາຢູ່ທີ່ສູນກູ້ໄພໝີກວາງຊີຂອງ Free the Bears ທີ່ໄດ້ປົກປັກຮັກສາສັດປ່າອັນຫາຍາກ ແລະ ໃກ້ຈະສູນພັນນີ້ໄວ້.

 

ແຫຼ່ງຂ່າວ: ມ່ວນ

 

Leave a Reply

Your email address will not be published. Required fields are marked *

Facebook