ລາວຍາດໄດ້ຫຼຽນທອງ ແຂ່ງຂັນຫຸ່ນຍົນຊາວໜຸ່ມສາກົນ

ການ​ແຂ່ງ­ຂັນ​ຫຸ່ນ​ຍົນ​ຊາວ​ໜຸ່ມ​ສາ­ກົນ ຄັ້ງ​ທີ 5 ປີ 2018 ຈັດ​ຂຶ້ນ​ຢູ່​ບາງ­ກອກ ປະ­ເທດ​ໄທ ໃນ​ວັນ​ທີ 30 ພະ­ຈິກ-1 ທັນ­ວາ 2018 ໄດ້​ສຳ­ເລັດ ມີ​ນັກ­ຮຽນ​ເກືອບ 600 ຄົນ ຈາກ 25 ປະ­ເທດ​ເຂົ້າ​ຮ່ວມ​ໃນ 11 ລາຍ­ການ​ແຂ່ງ­ຂັນ ໃນ​ນັ້ນ ກໍ່​ມີ​ຕົວ​ແທນ​ນັກ­ຮຽນ​ລາວ​ເຂົ້າ​ຮ່ວມ ແລະ ສາ­ມາດ​ຍາດ​ໄດ້​ລາ­ງວັນ​ຫຼຽນ​ທອງ 1 ລາ­ງວັນ.

ສູນ​ການ​ຮຽນ​ຮູ້ VF My Robot Time Lao PDR ແລະ ໄດ້​ຮັບ​ການ​ຮ່ວມ​ມື​ຈາກ​ກົມ​ເຕັກ​ໂນ​ໂລ​ຊີ​ດີ​ຈີ​ຕອນ​ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ເປັນ​ຕົວ​ແທນ​ຈາກ​ລາວ ໄດ້​ສົ່ງ​ນັກ­ຮຽນ​ເຂົ້າ​ຮ່ວມ 5 ຄົນ ຍິງ 1 ຄົນ ໃນ 5 ລາຍ­ການ ຄື: ການ​ແຂ່ງ­ຂັນ Bowling Item RecycleAnimal Kingdom Soccer Humanoid Mission ແລະ Save the Forest ເຊິ່ງ​ເປັນ​ຄັ້ງ​ທຳ​ອິດ ທີ່​ລາວ​ເຮົາ​ໄດ້​ເຂົ້າ​ຮ່ວມ​ການ​ແຂ່ງ­ຂັນ​ນາ­ນາ​ຊາດ​ຄັ້ງ​ນີ້ ໂດຍ​ທຸກ​ຄົນ​ແມ່ນ​ເຮັດ​ໄດ້​ດີ ແຕ່​ໜຶ່ງ​ໃນ​ນັກ­ຮຽນ​ທີ່​ເຮັດ​ໄດ້​ດີ​ກວ່າ​ໝູ່​ແມ່ນ​ທ້າວ ບຸນ​ຍາ​ລິດ ໄຊ​ສຸ​ລຽນ ທີ່​ເປັນ​ນັກ­ຮຽນ​ໄດ້​ຮັບ​ທຶນ​ການ​ສຶກ​ສາ STEM ຈາກ​ສູນ​ການ​ຮຽນ​ຮູ້ VF ປັດ­ຈຸ­ບັນ​ຮຽນ​ຢູ່​ໂຮງ­ຮຽນ VIS ນະ­ຄອນ­ຫຼວງ​ວຽງ​ຈັນ ຊັ້ນ​ມັດ­ທະ­ຍົມ​ປີ​ທີ 4 ສາ­ມາດ​ຍາດ​ໄດ້​ຫຼຽນ​ທອງ​ຈາກ​ການ​ແຂ່ງ­ຂັນ Humanoid Mission ເປັນ​ການ​ສ້າງ​ຊື່​ສຽງ​ໃຫ້​ແກ່​ປະ­ເທດ​ລາວ.

ທ່ານ​ນາງ ສຸກ​ຖາ­ວອນ ວົງ​ສະ​ຫັວນ ອຳ­ນວຍ​ການ​ສູນ​ການ​ຮຽນ​ຮູ້ VF ກ່າວ​ວ່າ: ໂອ­ກາດ​ເດີນ­ທາງ​ເຂົ້າ​ຮ່ວມ​ການ​ແຂ່ງ­ຂັນ​ຄັ້ງ​ນີ້ ສູນ​ການ​ຮຽນ​ຮູ້ VF My Robot Time Lao PDR ຕາງ­ໜ້າ​ຈາກ​ລາວ ໄດ້​ຮັບ​ການ​ແຕ່ງ­ຕັ້ງ​ຢ່າງ​ເປັນ​ທາງ​ການ ເປັນ​ສະ­ມາ­ຊິກ​ຂອງ​ສະ­ມາ­ຄົມ​ຫຸ່ນ​ຍົນ​ຊາວ​ໜຸ່ມ​ສາ­ກົນ ພ້ອມ​ກັບ​ປະ­ເທດ​ບາ​ຊີວ ໄອ​ແລນ ຣັດ​ເຊຍ ແລະ ປະ­ເທດ​ມຽນ​ມາ ເຊິ່ງ​ຄັ້ງ​ນີ້ ລາວ​ເປັນ​ຄັ້ງ​ທຳ​ອິດ​ຂອງ​ການ​ເຂົ້າ​ຮ່ວມ​ແຂ່ງ­ຂັນ​ໃນ​ລາຍ­ການ​ນີ້ ແຕ່​ກໍ່​ສາ­ມາດ​ສະ­ແດງ​ຜົນ­ງານ​ອອກ​ມາ​ຢ່າງ​ໜ້າ​ພາກ­ພູມ​ໃຈ ແລະ ການ​ແຂ່ງ­ຂັນ​ຄັ້ງ​ຕໍ່​ໄປ​ຈະ​ຈັດ​ຂຶ້ນ​ທີ່ Daejeon ສ ເກົາ­ຫຼີ ສຳ­ລັບ IYRC 2019 ທາງ​ສູນ​ການ​ຮຽນ​ຮູ້​ຈະ​ສູ້​ຊົນ​ສືບ­ຕໍ່​ສ້າງ​ຜົນ­ງານ​ໃຫ້​ດີ​ກວ່າ​ເກົ່າ.

 

ແຫຼ່ງຂ່າວ: ນສພ ວຽງຈັນໃໝ່

 

Leave a Reply

Your email address will not be published. Required fields are marked *

Facebook