ທຳລາຍໝາກກະໂພກ ແລະ ຢາສູບທີ່ບໍ່ຕິດຄຳເຕືອນ

ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນະ­ຄອນ­ຫຼວງ​ວຽງ​ຈັນ ໄດ້​ເອົາ­ໃຈ­ໃສ່​ຢ່າງ​ຕັ້ງ­ໜ້າ ເຂົ້າ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ວິ­ຊາ​ສະ­ເພາະ​ຂອງ​ຕົນ ດ້ວຍ​ຄວາມ​ຮັບ­ຜິດ­ຊອບ​ສູງ ເປັນ­ຕົ້ນ ການ​ລົງ​ຕິດ­ຕາມ ກວດ­ກາ ແລະ ຢຶດ​ສິນ­ຄ້າ​ທີ່​ນຳ​ເຂົ້າ​ບໍ່​ຖືກ​ລະ­ບຽບ​ການ ເຊິ່ງ​ນັ້ນ​ຖື​ເປັນ​ການ​ປົກ​ປ້ອງ​ສິດ ແລະ ຜິດ​ປະ­ໂຫຍດ​ອັນ​ຊອບ​ທຳ​ແກ່​ຜູ້​ບໍ­ລິ­ໂພກ ໂດຍ​ຜ່ານ​ການ​ກວດ­ກາ​ຢ່າງ​ເຂັ້ມ​ງວດ​ໃນ​ເດືອນ​ຜ່ານ​ມາ ສາ­ມາດ​ຢຶດ​ໝາກ​ກະ­ໂພກ ແລະ ຢາ­ສູບ​ທີ່​ບໍ່​ຕິດ​ຄຳ­ເຕືອນ​ສຸ­ຂະ­ພາບ​ດ້ວຍ​ຮູບ​ພາບ​ກວມ 75% ໃສ່​ຊອງ ຈຳ­ນວນ 297 ຕຸດ ແລະ 88 ຊອງ ມູນ​ຄ່າ 37 ລ້ານ​ກີບ ແລະ ໝາກ​ກະ­ໂພກ 626 ກິ​ໂລ ມູນ​ຄ່າ 32 ລ້ານ​ກີບ.

ທ່ານ ມະ­ໂນ​ສັກ ໄຊ​ສີ​ລິ​ກຸນ ຫົວ­ໜ້າ​ໜ່ວຍ​ງານ​ກວດ­ກາ​ການ​ຄ້າ ຂະ­ແໜງ­ການ​ຄ້າ​ພາຍ​ໃນ ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນະ­ຄອນ­ຫຼວງ​ວຽງ​ຈັນ ກ່າວ​ວ່າ: ການ​ທຳ­ລາຍ​ໝາກ​ກະ­ໂພກ ແລະ ຢາ­ສູບ​ທີ່​ບໍ່​ຕິດ​ຄຳ­ເຕືອນ​ຄັ້ງ​ນີ້ ສືບ​ເນື່ອງ​ຈາກ​ການ​ລົງ​ປະ­ຕິ­ບັດ​ໜ້າ­ທີ່​ກວດ­ກາ​ຢ່າງ​ເຂັ້ມ​ງວດ ຢູ່​ຕາມ​ບັນ­ດາ​ຕະ­ຫຼາດ​ທົ່ວ​ນະ­ຄອນ­ຫຼວງ​ວຽງ​ຈັນ​ໃນ 5 ເດືອນ​ຜ່ານ​ມາ ສາ­ມາດ​ພົບ​ເຫັນ​ການ­ຈຳ­ໜ່າຍ​ສິນ­ຄ້າ​ຕ້ອງ​ຫ້າມ​ປະ­ເພດ​ໝາກ​ກະ­ໂພກ ຢູ່​ເມືອງ​ໄຊ​ເຊດ​ຖາ 80 ກິ​ໂລ ມູນ​ຄ່າ 4 ລ້ານ​ກີບ ເມືອງ​ຫາດ​ຊາຍ​ຟອງ 20 ກິ​ໂລ ມູນ​ຄ່າ 2 ລ້ານ​ກວ່າ​ກີບ ສີ​ສັດ­ຕະ​ນາກ 3 ກິ​ໂລ ມູນ​ຄາ 3 ແສນ​ກີບ ໄຊ​ທາ­ນີ 9 ກິ​ໂລ ສີ​ໂຄດ​ຕະ­ບອງ 35 ກິ​ໂລ ຈັນ­ທະ​ບູ​ລີ 20 ກິ​ໂລ ສັງ​ທອງ 15 ກິ​ໂລ ແລະ ເມືອງ​ປາກ​ງື່ມ 32 ກິ​ໂລ ພ້ອມ​ນັ້ນ ພະ­ແນກ­ການ​ຄ້າ​ຍັງ​ສາ­ມາດ​ຢຶດ​ໄດ້​ອີກ 412 ກິ​ໂລ ແລະ ຢຶດ​ຈາກ​ພໍ່­ຄ້າ​ທີ່​ລະ­ເມີດ​ກົດ​ລະ­ບຽບ​ອີກ 76 ກິ​ໂລ ລວມ​ທັງ​ໝົດ 626 ກິ​ໂລ ຢາ­ສູບ​ທີ່​ບໍ່​ຕິດ​ຄຳ­ເຕືອນ​ດ້ວຍ​ຮູບ​ພາບ​ອີກ​ຈຳ­ນວນ​ໜຶ່ງ ລວມ​ມູນ​ຄ່າ​ທັງ​ໝົດ 69 ລ້ານ​ກີບ.

ພິ­ທີ​ຈູດ​ທຳ­ລາຍ​ສິນ­ຄ້າ​ດັ່ງ­ກ່າວ ໄດ້​ຈັດ​ຂຶ້ນ​ວັນ​ທີ 30 ພະ­ຈິກ 2018 ທີ່​ສະ­ໜາມ​ກຳ­ຈັດ​ຂີ້​ເຫຍື້ອ​ຫຼັກ 32 ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ມີ​ທ່ານ ມະ­ໂນ​ສັກ ໄຊ​ສີ​ລິ​ກຸນ ພ້ອມ​ດ້ວຍ​ຜູ້​ຕາງ​ໜ້າງ​ຈາກ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ແຫຼ່ງຂ່າວ: ນສພ ວຽງຈັນໃໝ່