ສສຊ ປະກອບຄຳເຫັນໃສ່ ຮ່າງປະມວນກົດໝາຍແພ່ງ

ບັນດາສະມາຊິກສະພາແຫ່ງຊາດ (ສສຊ) ໄດ້ປະກອບຄຳຄິດ​ຄຳເຫັນ ໃສ່ຮ່າງປະມວນກົດໝາຍແພ່ງ (ກົດໝາຍສ້າງໃໝ່), ​ໂດຍໄດ້ສຸມໃສ່ຄໍາຖາມເຈາະຈີ້ມ ຂອງປະທານກອງປະຊຸມ ໂດຍສະເພາະມາດຕາ 5 ກ່ຽວກັບການນຳໃຊ້ ປະມວນກົດໝາຍແພ່ງ, ມາດຕາ 92 ການ​ຫາຍ​ສາບ​ສູນ, ມາດຕາ 145 ການໝັ້ນໝາຍ-ການສູ່ຂໍ, ມາດຕາ 149 ການຮ່ວມປະເພນີ ກ່ອນການແຕ່ງດອງ, ມາດຕາ 173 ການຢ່າຮ້າງດ້ວຍຄວາມສະໝັກໃຈ, ມາດຕາ 189 ການເສຍຊີວິດຂອງຜົວ ຫລື ເມຍ ຕາມທຳມະຊາດ, ມາດຕາ 524 ຊັບດຽວນຳໃຊ້ເຂົ້າໃນ ການຄ້ຳປະກັນຫລາຍບ່ອນ ​ວ່າມີເນື້ອໃນຈະ ແຈ້ງ, ເລິກເຊິ່ງ, ລະອຽດ, ຮັດກຸມ, ຄົບຖ້ວນ ແລະ ສອດຄ່ອງກັບ ສະພາບຕົວຈິງແລ້ວ ຫລື ບໍ.

ຮ່າງ​ກົດໝາຍ​ດັ່ງກ່າວ, ​ສະ​ເໜີ​ໂດຍ ທ່ານ ໄຊສີ ສັນຕິວົງ ລັດຖະມົນຕີ ກະຊວງຍຸຕິທຳ ໃນວາລະດຳເນີນກອງປະຊຸມ ສະໄໝສາມັນ ເທື່ອທີ6 ຂອງສະພາແຫ່ງຊາດຊຸດທີ VIII ໃນວັນທີ 5 ທັນວາ 2018, ​ພາຍໃຕ້ການເປັນປະທານ ຂອງ ທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ, ​ເຊິ່ງໃຊ້ເວລາປະກອບ ຄຳຄິດຄຳເຫັນເປັນເວລາມື້ເຄິ່ງ ຈຶ່ງຈະໄດ້ສະເໜີ ພິຈາລະນາຮັບຮອງເອົາ.

ບັນດາ ສສຊ ກໍໄດ້ສະແດງຄວາມຍ້ອງຍໍຊົມເຊີຍ ອະນຸກຳມະການ ກະກຽມຮ່າງກົດໝາຍ ດັ່ງທີ່ຄົ້ນຄວ້າຫລາຍຫລົບຫລາຍຕ່າວ, ໄດ້ປັບປຸງເນື້ອໃນໃຫ້ຄົບຖ້ວນ ຂຶ້ນຫລາຍກວ່າເກົ່າ ແລະ ພະຍາຍາມສັງລວມ ເອົາຫລາຍໆມາດຕາ, ຫລາຍກົດໝາຍເຂົ້າໃນຮ່າງ ປະມວນກົດໝາຍສະບັບນີ້,ພ້ອມທັງໄດ້ສະເໜີ ຕັດບາງເນື້ອໃນທີ່ເຫັນວ່າ ບໍ່ເໝາະສົມອອກ, ບາງ ສສຊ ກໍສະເໜີ ໃຫ້ເອົາມາດຕາ ທີ່ຄ້າຍຄືກັນ ມາລວມເຂົ້າເປັນມາດຕາດຽວ,ບາງທ່ານ ສະເໜີ ໃຫ້ຕື່ມເນື້ອໃນເຂົ້າຕື່ມ ເພື່ອໃຫ້ມີຄວາມຮັດກຸມ ແລະ ຊັດເຈນກວ່າເກົ່າ ເພື່ອເປັນການປົກປ້ອງ ຜູ້ອັບຜົນປະໂຫຍດ ​ແລະ ບາງ ສສຊ ສະເໜີ ໃຫ້ມີການເພີ່ມເວລາ ຂອງການຕັດສິນສຳລັບ ຜູ້ຫາຍສາບສູນ ຈາກ 2 ປີ ອອກ​ໄປ​ຕື່ມ.

ທ່ານ ນາງ ອຳໄພວອນ ລ້ອມ​ບຸນ​ແພງ ສສຊ ເຂດເລືອກຕັ້ງທີ 8 ແຂວງຫົວພັນ, ທ່ານ ນາງ ສີໃຄ ສີປະເສີດ ສສຊ ເຂດເລືອກຕັ້ງທີ 11ແຂວງບໍລິຄໍາໄຊ ແລະ ບັນດາ ສສຊ ເພດຍິງອື່ນໆ ​ໄດ້ສະເໜີ ຢ່າງເອົາຈິງເອົາຈັງຕໍ່ອະນຸກຳມະການ ​ເພື່ອໃຫ້ເບິ່ງຄືນ ກ່ຽວກັບບາງເນື້ອໃນຂອງມາດຕາ 149 ວ່າດ້ວຍການຮ່ວມປະເວນີ ກ່ອນການແຕ່ງດອງເປັນຜົວເມຍ, ​ເຊິ່ງຂຽນ​ວ່າ ເມື່ອຊູ້ສາວໄດ້ ຮ່ວມປະເວນີກັນ ກ່ອນການເອົາກັນເປັນຜົວເມຍແລ້ວ, ຖ້າຫາກວ່າຊາຍຊູ້ ຫລື ຍິງຊູ້ ຫາກບໍ່ເອົາກັນ ຝ່າຍໜຶ່ງຕ້ອງໄດ້ຮັບຜິດຊອບ ປົວແປງຈິດໃຈ​ໃຫ້​ອີກ​ຝ່າຍ. ຖ້າຫາກວ່າກຳນົດ ແຕ່ຊາຍຊູ້ຝ່າຍດຽວ ແມ່ນເຫັນດີ ແຕ່ຖ້າກຳນົດວ່າຍິງຊູ້ ບໍ່ເອົາແລ້ວ ຍັງໄປເສຍຄ່າປົວແປງຈິດໃຈ ໃຫ້ຜູ້ຊາຍແມ່ນມີຄວາມຄັດຄ້ານ ແລະ ບໍ່ເຫັນດີທີ່​ສຸດ ເນື່ອງຈາກວ່າ​ແມ່ຍິງ ຖືຮີດຄອງປະເພນີ, ຖືບັນຫານີ້ສໍາຄັນ ກວ່າໝູ່ໝົດໃນຊີວິດ ຫລື ຮ່າງກາຍ ຖ້າຫາກໄດ້ເສຍຄວາມບໍລິສຸດນີ້ແລ້ວ ຫາກວ່າບໍ່ເອົາກະແມ່ນ ມີຄວາມຈຳເປັນແທ້ໆ.

 

ແຫຼ່ງຂ່າວ: ຂ່າວສານປະເທດລາວ

 

Leave a Reply

Your email address will not be published. Required fields are marked *

Facebook