ຮອງລັດຖະມົນຕີ ສສກ ເນັ້ນໜັກນັກກີລາລາວເອົາໃຈໃສ່ຮອບດ້ານໃນ ມ.ອາຊຽນ ຕັ້ງອັດສີດຫຼຽນຄໍາ 20 ລ້ານກີບ

ທ່ານ ຮສ. ປອ. ຄໍາຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກີລາ ( ສສກ ) ທັງເປັນຫົວໜ້າທັບນັກກີລາ ສະຫະພັນກີລາມະຫາວິທະຍາໄລລາວ ( ສກມລ ) ເນັ້ນໜັກທັບນັກກີລານັກສຶກສາລາວ ເພີ່ມທະວີຄວາມເອົາໃຈໃສ່ ຄວາມຮັບຜິດຊອບໜ້າທີ່ຂອງຕົນເອງຢ່າງຮອບດ້ານ ໂດຍສະເພາະແມ່ນຕ້ອງມີນ້ຳໃຈນັກກີລາ, ມີຄວາມຮັບຜິດຊອບສູງ, ຮັກສາກຽດສັກສີຂອງຄວາມເປັນຊາດລາວ, ວາງແຜນຢ່າງຮອບຄອບ, ກວດສອບກົດລະບຽບກະຕິກາຂອງແຕ່ລະປະເພດກີລາ ເພື່ອສ້າງຜົນງານດີເດັ່ນຍາດໃຫ້ໄດ້ໄຊຊະນະເປັນກຽດ – ຊື່ສຽງໃຫ້ປະເທດຊາດ ຈາກງານມະຫະກຳກີລາ ມະຫາວິທະຍາໄລອາຊຽນ ຄັ້ງທີ 19 ທີ່ສະຫະພາບມຽນມາ ຮັບກຽດເປັນເຈົ້າພາບ ລະຫວ່າງ ວັນທີ 10 – 19 ທັນວາ 2018. ໃນຕອນເຊົ້າວັນທີ 4 ທັນວາຜ່ານມາ ທີ່ສະໂມສອນໃຫຍ່ ຊັ້ນ 2 ມະຫາວິທະຍາໄລແຫ່ງຊາດ ( ມຊ ) ໄດ້ມີກອງປະຊຸມເພື່ອເຕົ້າໂຮມບັນດາຄະນະຮັບຜິດຊອບທຸກວຽກງານຂອງ ສກມລ ກໍ່ຄືຄະນະນຳພາ, ແພດ, ນັກຂ່າວ, ຄູຝຶກ ແລະ ນັກກີລາ ກຽມຄວາມພ້ອມຮ່ວມງານມະຫະກຳກີລາມະຫາວິທະຍາໄລ ອາຊຽນ ຄັ້ງທີ 19 ທີ່ສະຫະພາບມຽນມາ ຮັບກຽດເປັນເຈົ້າພາບ ໂດຍໃຫ້ກຽດເຂົ້າຮ່ວມ ແລະ ໂອ້ລົມຂອງ ທ່ານ ຮສ. ປອ. ຄໍາຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກີລາ ທັງເປັນຫົວໜ້າທັບນັກກີລາມະຫາວິທະຍາໄລລາວ, ມີທ່ານ ຮສ. ປອ. ອານຸລົມ ວິໄລພອນ ວ່າການຄະນະບໍດີ ຄະນະວິທະຍາສາດການກີລາ – ກາຍະກຳ ມຊ ທັງເປັນຫົວໜ້າກອງເລຂາ ສກມລ ພ້ອມດ້ວຍບັນດາຄະນະກີລາສະຫະພັນກີລາແຫ່ງຊາດ, ຄູຝຶກ ແລະ ນັກກີລາເຂົ້າຮ່ວມ. ທ່ານ ຮສ. ປອ. ອານຸລົມ ວິໄລພອນ ໄດ້ລາຍງານກ່ຽວກັບຄວາມພ້ອມໃນການກະກຽມແຜນຕ່າງໆ ເປັນຕົ້ນແມ່ນແຜນການເດີນທາງຂອງນັກກີລາແຕ່ລະປະເພດ ເຊິ່ງການເດີນທາງຂອງນັກກີລາລາວ ເລີ່ມອອກເດີນທາງຕັ້ງແຕ່ວັນທີ 5 ທັນວາ 2018 ເປັນຕົ້ນໄປ ເພື່ອເຂົ້າຮ່ວມງານມະຫະກຳກີລາມະຫາວິທະຍາໄລອາຊຽນ ຄັ້ງທີ 19 ທີ່ສະຫະພາບມຽນມາ ຮັບກຽດເປັນເຈົ້າພາບ ລະຫວ່າງ ວັນທີ 10 – 19 ທັນວາ 2018 ໂດຍທີມງານກອງເລຂາ ພ້ອມດ້ວຍນັກກີລາບານເຕະອອກເດີນທາງເປັນຊຸດທຳອິດກ່ອນ, ສ່ວນກີລາປະເພດອື່ນໆຈະເດີນທາງຕາມຫຼັງ. ທັງນີ້, ກໍ່ເພື່ອອີງຕາມຕາຕະລາງການແຂ່ງຂັນຂອງແຕ່ລະປະເພດກີລາ ງານກີລາມະຫາວິທະຍາໄລອາຊຽນ ມີການແຂ່ງຂັນຫຼາຍປະເພດ ສຳລັບ ສກມລ ສົ່ງທັບນັກກີລາ 150 ຄົນ ຈາກ 9 ປະເພດ ປະກອບມີ: ບານເຕະຊາຍ, ຍິງທະນູ, ເປຕັງ, ກະຕໍ້, ໂວວີນາມ, ກ໊ອຟ, ດອກປີກໄກ່, ວູຊູ ແລະ ແລ່ນ – ລານເຂົ້າຮ່ວມແຂ່ງຂັນ. ແນວໃດກໍ່ ດີ, ຜົນສຳເລັດໃນການກະກຽມຄວາມພ້ອມຮ່ວມງານກີລາ ມ.ອາຊຽນ ໃນຄັ້ງນີ້ ເບື້ອງຕົ້ນຄະນະຮັບຜິດຊອບກອງເລຂາ ສາມາດຈັດຕັ້ງປະຕິບັດວຽກງານຕ່າງໆໄດ້ເຕັມ 100% ໂດຍສະເພາະວຽກນະໂຍບາຍຫຼຽນລາງວັນຂອງທັບນັກກີລາທີ່ສາມາດສ້າງຜົນງານໃນງານດັ່ງກ່າວໄດ້ ສຳລັບຫຼຽນຄຳ ປະເພດທີມ ຈະໄດ້ຮັບເງິນອັດສີດ ຫຼຽນລະ 20 ລ້ານກີບ, ປະເພດດ່ຽວ ຫຼຽນລະ 12 ລ້ານກີບ, ສ່ວນຫຼຽນເງິນ ປະເພດທີມ ຈະໄດ້ຮັບເງິນອັດສີດ ຫຼຽນລະ 10 ລ້ານກີບ, ປະເພດດ່ຽວ ຫຼຽນລະ 5 ລ້ານກີບ ແລະ ຫຼຽນທອງ ປະເພດທີມ ຈະໄດ້ຮັບເງິນອັດສີດ ຫຼຽນລະ 5 ລ້ານກີບ ແລະ ປະເພດດ່ຽວ ຫຼຽນລະ 3 ລ້ານກີບ. ໃນໂອກາດດຽວກັນ, ທ່ານ ຮສ. ປອ. ຄຳຜາຍ ສີສະຫວັນ ກໍ່ໄດ້ໃຫ້ກຽດໂອ້ລົມຕໍ່ຄະນະນຳ, ແພດ, ນັກຂ່າວ, ຄູຝຶກ ແລະ ທັບນັກກີລານັກສຶກສາລາວ ໃນຈຳນວນ 150 ຄົນ ເພີ່ມທະວີຄວາມເອົາໃຈໃສ່ຄວາມຮັບຜິດຊອບໃນໜ້າທີ່ຂອງຕົນເອງຢ່າງຮອບດ້ານ ໂດຍສະເພາະຄວນສະແດງຄວາມມີນ້ຳໃຈເຜີຍແຜ່ວັດທະນະທຳຄວາມເປັນຊາດລາວ, ມີຄວາມຮັບຜິດຊອບສູງ, ຮັກສາກຽດສັກສີຄວາມເປັນຊາດລາວ, ພ້ອມກັນວາງແຜນຢ່າງຮອບຄອບລະອຽດຊັດເຈນສ້າງຄວາມເຊື່ອໝັ້ນໃຫ້ນັກກີລາມີຄວາມສາມັກຄີຮັກແພງ ແລະ ກວດສອບກົດລະບຽບ, ກະຕິກາຂອງແຕ່ລະປະເພດກີລາ. ທັງນີ້, ກໍ່ເພື່ອສ້າງຜົນງານດີເດັ່ນຍາດໃຫ້ໄດ້ໄຊຊະນະເປັນກຽດ – ຊື່ສຽງໃຫ້ປະເທດຊາດ ແລະ ນຳເອົາຄວາມພາກພູມໃຈມາສູ່ພໍ່ແມ່ປະຊາຊົນຊາວລາວຢ່າງສົມກຽດໃນງານມະຫະກຳກີລາ ມະຫາວິທະຍາໄລອາຊຽນ ຫຼື ເອຢູຈີ ຄັ້ງທີ 19 ທີ່ສະຫະພາບມຽນມາ ຮັບກຽດເປັນເຈົ້າພາບ.

 

 

ຂໍ້ມູນມາຈາກ : ເສດຖະກິດການຄ້າ

Leave a Reply

Your email address will not be published. Required fields are marked *

Facebook