ທັກ – ຣັກບີ້ ສົ່ງເສີມການມີສ່ວນຮ່ວມຂອງຄົນພິການ ແລະ ບໍ່ພິການ

ຖືເປັນອີກກິດຈະກໍາທີ່ດີ ສໍາລັບ ທັກ – ຣັກບີ້ ຂອງໜ່ວຍງານກີລາເພື່ອວັນຂ້າງໜ້າ ( Sports For Tomorrow ) ໃນນາມຜູ້ປະສານງານຂອງອົງການ ADDP ໄດ້ມາຈັດກິດຈະກໍານີ້ລະຫວ່າງວັນທີ 5 – 6 ທັນວາ 2018 ທີ່ ສປປ ລາວ ເພື່ອເປັນເຄື່ອງມືໃນການສົ່ງເສີມການປູກຈິດສໍານຶກໃນການສ້າງສັງຄົມເປີດກວ້າງການມີສ່ວນຮ່ວມຂອງຄົນພິການ ແລະ ບໍ່ພິການ. ເມື່ອວັນທີ 5 ທັນວາຜ່ານມານີ້ ທີ່ຄະນະກໍາມະການໂອແລັມປິກແຫ່ງຊາດລາວ ໄດ້ມີພິທີເປີດກິດຈະກໍາ ທັກ – ຣັກບີ້ ຂອງໜ່ວຍງານກີລາເພື່ອວັນຂ້າງໜ້າ ໂດຍການມີສ່ວນຮ່ວມລະຫວ່າງຄົນພິການ ແລະ ບໍ່ພິການ ຈາກຜູ້ຊ່ຽວຊານຈາກປະເທດຍີ່ປຸ່ນ ໃຫ້ກຽດເຂົ້າຮ່ວມຂອງ ທ່ານ ສີທາດ ຈັນທະບູລີ ຫົວໜ້າກົມກີລາມວນຊົນ ກະຊວງສຶກສາທິການ ແລະ ກີລາ, ທ່ານ ຈຸງຈິ ມາຊຸອິ ຜູ້ຊ່ຽວຊານຈາກສູນການສຶກສາ ແຂວງໂອອິຕະ ປະເທດຍີ່ປຸ່ນ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ສໍາມະນາກອນຈາກ 3 ພາກສ່ວນເຂົ້າຮ່ວມ. ໃນໂອກາດດັ່ງກ່າວ ທ່ານ ສີທາດ ຈັນທະບູລີ ໄດ້ກ່າວວ່າ: ກິດຈະກໍາຄັ້ງນີ້ຖືວ່າເປັນອີກກິດຈະກໍາໜຶ່ງທີ່ໄດ້ສ້າງສາຍພົວພັນລະຫວ່າງ ລາວ – ຍີ່ປຸ່ນ ເພື່ອຝຶກອົບຮົມການມີສ່ວນຮ່ວມລະຫວ່າງຄົນພິການ ແລະ ບໍ່ພິການ ຈາກຊ່ຽວຊານປະເທດຍີ່ປຸ່ນກ່ຽວກັບການພັດທະນາຄົນພິການ ເຊິ່ງກິດຈະກໍາຄັ້ງນີ້ໄດ້ສືບເນື່ອງ ແລະ ໄດ້ຮັບການຊ່ວຍເຫຼືອຈາກປະເທດ ຍີ່ປຸ່ນ ມາແຕ່ປີ 2016. ດັ່ງນັ້ນ, ເພື່ອຂະຫຍາຍການຮ່ວມມື ແລະ ເຜີຍແຜ່ການພັດທະນາ. ພ້ອມກັນນັ້ນ, ຕ້ອງພັດທະນາແຕ່ຂັ້ນພື້ນຖານເພື່ອເປີດໂອກາດໃຫ້ແກ່ນັກກີລາລາວໄດ້ເຂົ້າຮ່ວມການແຂ່ງຂັນໃນພາກພື້ນ ແລະ ສາກົນ ພ້ອມທັງຍົກລະດັບທັກສະການຫຼິ້ນກີລາຣັກບີ້ໃຫ້ມີ ຄວາມຄ່ອງແຄ້ວ. “ ນອກຈາກນັ້ນ, ຍັງເປັນກິດຈະກໍາໜຶ່ງທີ່ເຮັດໃຫ້ມີສ່ວນຮ່ວມລະຫວ່າງຄົນພິການ ແລະ ບໍ່ພິການ ໂດຍກິດຈະກໍາກີລາ ທັກ – ຣັກບີ້ ຄັ້ງນີ້ແມ່ນຈະດໍາເນີນແຕ່ວັນທີ 5 – 6 ທັນວາ ໂດຍມີສໍາມະນາກອນຈາກ 3 ພາກສ່ວນເຂົ້າຮ່ວມ ຄື: ໂຮງຮຽນ ມສ ເຈົ້າອານຸວົງ, ວິທະຍາໄລພະລະສຶກສາ ແລະ ສະຫະພັນຣັກບີ້ແຫ່ງຊາດລາວ ໂດຍສໍາມະນາກອນໄດ້ຮຽນພາກທິດສະດີ ແລະ ພາກປະຕິບັດຕົວຈິງ ” ຫົວໜ້າກົມກີລາມວນຊົນ ກະຊວງສຶກສາທິການ ແລະ ກີລາ ກ່າວ. ສໍາລັບກິດຈະກໍາດັ່ງກ່າວແມ່ນຈັດຂຶ້ນເປັນເວລາ 2 ມື້ ໂດຍມີທັງພາກທິດສະດີ ຈັດຂຶ້ນທີ່ຫ້ອງປະຊຸມຄະນະກໍາມະການໂອແລັມປິກແຫ່ງຊາດລາວ ໃນວັນທີ 5 ທັນວາ 2018, ສ່ວນພາກປະຕິບັດຕົວຈິງແມ່ນຈະຈັດຂຶ້ນທີ່ ສະໜາມກີລາເຈົ້າອານຸວົງ ໃນວັນທີ 6 ທັນວາ 2018 ໂດຍເປົ້າໝາຍຫຼັກຂອງກິດຈະກໍາ ປະກອບມີ: – ນໍາສະເໜີຄຸນຄ່າຂອງກີລາຣັກບີ້ ເພື່ອສື່ໃຫ້ເຫັນວ່າ ບໍ່ວ່າຄົນເຮົາຈະມີ ຄວາມພິການ ຫຼື ບໍ່ພິການກໍ່ຕາມ ສາມາດດຳລົງຊີວິດຮ່ວມກັນ ແລະ ຮຽນຮູ້ຮ່ວມກັນຢ່າງເຕັມເມັດເຕັມໜ່ວຍໃນສັງຄົມ. – ເປົ້າໝາຍໃນອະນາຄົດແມ່ນຫວັງຢາກໃຫ້ນໍ້າໃຈຂອງນັກກີລາຣັກບີ້ ຖືກນໍາເຂົ້າໃຊ້ໃນຫຼັກສູດການຮຽນ – ການສອນຂອງການສຶກສາພິເສດ.

 

 

ຂໍ້ມູນມາຈາກ : ເສດຖະກິດການຄ້າ

Leave a Reply

Your email address will not be published. Required fields are marked *

Facebook