ທ່ານນາງ ວຽງທອງ ສີພັນດອນ ຕ້ອນຮັບຄະນະຝຶກອົບຮົມກວດສອບການເງິນ

ທ່ານນາງ ວຽງທອງ ສີພັນດອນ ປະທານອົງການກວດສອບແຫ່ງລັດໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະຝຶກອົບຮົມການ ກວດສອບການເງິນພາຍໃຕ້ການຮ່ວມມືຂອງ ອົງການລິເລີ່ມການພັດທະນາອາຊຽນຊາຍ (Intosai Development Initiatives-ASEANSAI) ຊຶ່ງນຳໂດຍທ່ານ ກາມາ ເທັນຊິນ ຜູ້ຈັດການອົງການລິເລີ່ມການພັດທະນາອາຊຽນຊາຍ ໃນວັນທີ 4 ທັນວາ ນີ້ ທີ່ອົງການກວດສອບແຫ່ງ ລັດ ນະຄອນຫຼວງວຽງຈັນ.

ໃນໂອກາດດັ່ງກ່າວ ທ່ານ ນາງ ວຽງທອງ ສີພັນດອນ ກໍ່ໄດ້ສະແດງຄວາມຕ້ອນຮັບ ແລະ ຕີລາຄາສູງຕໍ່ການຈັດຝຶກອົບຮົມການ ກວດສອບການເງິນພາຍໃຕ້ຫົວຂໍ້ “ການກວດສອບການເງິນພາຍໃຕ້ ແຜນການຮ່ວມມືຂອງອົງການລິເລີ່ມການພັດທະນາ ອາຊຽນຊາຍໃນລະຫວ່າງວັນທີ 3-7 ທັນວາ 2018 ຊຶ່ງມັນໄດ້ສະແດງອອກພາຍໃຕ້ການພົວພັນຮ່ວມມືລະຫວ່າງບັນດາປະເທດສະ ມາຊິກອາຊຽນເວົ້າລວມ, ເວົ້າສະເພາະກໍ່ຄືການສ້າງຄວາມເຂັ້ມແຂງໃຫ້ກັບວຽກງານກວດສອບພາກລັດຂອງບັນດາປະເທດສະ ມາຊິກອາຊຽນຊາຍທີ່ໄດ້ເຫັນດີເປັນເອກະພາບໃນກອງປະຊຸມທີ່ເມືອງມາລະກາ, ປະເທດມາເລເຊຍ ໃນວັນທີ 26-27 ກໍລະກົດ 2018 ທີ່ຜ່ານມາ, ການຈັດຕັ້ງປະຕິບັດການກວດສອບດ້ານການເງິນບົນພື້ນຖານການນຳໃຊ້ມາດຕະຖານສາກົນ (ISSAI on Financial Audit).

ນອກຈາກນີ້ ກິດຈະກຳການຝຶກອົບຮົມຄັ້ງນີ້ຖືເປັນຂີດໝາຍທີ່ສ່ອງແສງໃຫ້ເຫັນເຈດຈຳນົງ, ຄວາມພະຍາຍາມ, ຄວາມສາມັກຄີ, ຄວາມຕັດສິນໃຈຮ່ວມມືຂອງບັນດາສະຖາບັນກວດສອບສູງສຸດຂອງອາຊຽນຊາຍໃນການຈັດຕັ້ງປະຕິບັດມາດຕະຖານສາກົນ ແລະ ປະຕິບັດຕາມແຜນຍຸດທະສາດຂອງອາຊຽນ 2018-2021 ທີ່ກຳນົດໄວ້. ໃນໂອກາດດຽວກັນນີ້ ທ່ານ ກາມາ ເທັນຊິນ ກໍ່ໄດ້ສະແດງຄວາມຂອບອົກຂອບໃຈຕໍ່ທ່ານນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ທີ່ໄດ້ຕ້ອນຮັບ ຄະນະຝຶກອົບຮົມການກວດສອບການເງິນພາຍໃຕ້ການຮ່ວມມືຂອງອົງການລິເລີ່ມການພັດທະນາອາຊຽນຊາຍ, ຫວັງຢ່າງຍິ່ງວ່າການຝຶກອົບຮົມດັ່ງກ່າວຈະເຮັດໃຫ້ບັນດາອົງການກວດສອບພາກລັດຂອງອາຊຽນຈະໄດ້ພົວພັນຮ່ວມມືກັນໃຫ້ແໜ້ນແຟ້ນຍິ່ງໆຂຶ້ນ.

 

Leave a Reply

Your email address will not be published. Required fields are marked *

Facebook