ຖະແຫລງຂ່າວກອງປະຊຸມ ພົບປະຜູ້ຊົງຄຸນວຸດທິ ບັນດາຊົນເຜົ່າ ທົ່ວປະເທດຄັ້ງທີ III

ໃນວັນທີ 5 ທັນວາ 2018, ຢູ່ສຳນັກງານສູນກາງແນວລາວສ້າງຊາດ ໄດ້ຈັດພິທີຖະ ແຫລງຂ່າວ ກ່ຽວກັບກອງປະຊຸມ ພົບປະຜູ້ຊົງຄຸນ ວຸດທິ ບັນດາຊົນເຜົ່າ ທົ່ວປະເທດ ຄັ້ງທີ III ຊຶ່ງຈະໄດ້ຈັດຂຶ້ນ ໃນວັນທີ 13 ທັນວາ 2018 ທີ່ຫໍປະຊຸມແຫ່ງຊາດ ນະຄອນຫລວງວຽງ ຈັນ, ໃຫ້ກຽດຖະແຫລງຂ່າວໂດຍ ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງ ແນວລາວສ້າງຊາດ, ມີບັນດາສື່ ມວນຊົນ ທຸກພາກສ່ວນ ເຂົ້າຮ່ວມ.

ທ່ານ ນາງ ຄຳຈັນ ພົມແສງສະຫວັນ ກ່າວວ່າ: ທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ປະຊາຊົນ ລາວ ບັນດາເຜົ່າທົ່ວປະເທດ ມີຄວາມເບີກບານມ່ວນຊື່ນ ທີ່ໄດ້ພ້ອມກັນ ຈັດຕັ້ງ ພິທີສະເຫລີມສະຫລອງ ວັນສ້າງຕັ້ງເມືອງວຽງໄຊ ເຂດທີ່ໝັ້ນຂອງການປະຕິວັດ ລາວ ຄົບຮອບ 50 ປີ, ວັນສະຖາປະນາ ສປປ ລາວ ຄົບຮອບ 43 ປີ ແລະ ກະກຽມສ້າງຂະບວນ ການຂໍ່ານັບຮັບຕ້ອນ ວັນຄ້າຍວັນເກີດ ປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກ ຂອງປວງຊົນລາວ ທັງຊາດຄົບ ຮອບ 98 ປີ, ວັນສ້າງຕັ້ງກອງທັບ ປະຊາຊົນລາວ ຄົບຮອບ 70ປີ ຄື ວັນທີ 20 ມັງກອນ 2018 ທີ່ຈະມາເຖິງນີ້, ຄະນະເລຂາທິການສູນ ກາງພັກ ໄດ້ມີມະຕິຕົກລົງ ວ່າດ້ວຍການອະນຸມັດ ຈັດຕັ້ງກອງປະຊຸມ ພົບປະຜູ້ຊົງຄຸນວຸດທິບັນດາຊົນເຜົ່າ ທົ່ວປະເທດຄັ້ງທີ III.  ຕາມແຜນການ ແລະ ໄດ້ມີການແຈ້ງຂ່າວ ໃນເບື້ອງຕົ້ນ ກອງປະຊຸມຈະໄດ້ຈັດຂຶ້ນ ໃນວັນທີ 13ສິງຫາ 2018,ແຕ່ເນື່ອງຈາກສະ ພາບດິນຟ້າອາກາດບໍ່ອຳນວຍ ເຫດການທີ່ບໍ່ເພີ່ງປາຖະໜາ ໄດ້ເກີດຂຶ້ນ ໃນທ້າຍເດືອນກໍລະກົດ 2018 ທີ່ເມືອງສະໜາມໄຊ ແຂວງອັດຕະປື.

ກອງປະຊຸມຈະໄດ້ສະຫລຸບ ຕີລາຄາການຈັດຕັ້ງປະຕິບັດ ຜົນກອງປະຊຸມພົບປະ ຜູ້ຊົງຄຸນວຸດທິບັນດາເຜົ່າທົ່ວປະເທດ ຄັ້ງທີ II (ປີ 2015-2018), ຮັບຟັງບົດປະກອບຄຳເຫັນ ຈາກຕາງໜ້າຂະແໜງ ການຢູ່ຂັ້ນສູນກາງ ແລະ ທ້ອງຖິ່ນ, ບົດຮຽນຕົວແບບດີເດັ່ນ ໃນການພັດທະນາຊົນນະບົດແກ້ໄຂຄວາມທຸກຍາກ, ການຜະລິດສິນຄ້າ, ການພັດທະນາຂອງບາງຊົນເຜົ່າ ແລະ ບົດປະກອບຄຳ ເຫັນ ຂອງຜູ້ຕາງໜ້າ ຄົນເຊື້ອຊາດລາວ ຢູ່ຕ່າງປະເທດ. ກອງປະຊຸມຄັ້ງນີ້, ສະຫາຍ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ຈະໃຫ້ກຽດເຂົ້າຮ່ວມ ແລະ ພົບປະໂອ້ລົມ, ໃຫ້ທິດຊີ້ນໍາກ່ຽວກັບວຽກງານດັ່ງກ່າວ, ຕໍ່ບັນດາທ່ານຜູ້ ແທນກອງປະຊຸມ ເພື່ອສືບຕໍ່ຈັດຕັ້ງປະຕິບັດ ໃນຊຸມປີຕໍ່ໜ້າ.ກອງປະຊຸມຄັ້ງນີ້, ຈະມີຕົວແທນຜູ້ຊົງ ຄຸນວຸດທິບັນດາເຜົ່າ ເຂົ້າຮ່ວມ 49 ຊົນເຜົ່າ ໃນທົ່ວປະເທດ ລວມ 500 ກວ່າທ່ານ, ຊຶ່ງມາຈາກ ບັນດາ ແຂວງ-ນະຄອນຫລວງ, ຈາກກະຊວງອົງການ ອ້ອມຂ້າງສູນກາງ, ຕົວ ແທນຄົນເຊື້ອຊາດລາວ ຢູ່ຕ່າງປະເທດ 34 ທ່ານ ທີ່ມາຈາກ ອາເມລິກາ, ຝຮັ່ງ, ການາດາ, ອົດສະຕາລີ, ຍີ່ປຸ່ນ, ນິວຊີແລນ, ສະວີດເຊີແລນ, ແບນຊິກ, ອັງກິດ ແລະ ໂອຕຣິດ.

ກອງປະຊຸມຈະເຊື້ອເຊີນ ເອົາອາດີດການນຳຈາກຂະແໜງການ ທັງສູນກາງ ແລະ ທ້ອງຖິ່ນ, ກຳມະການສູງກາງແນວລາວສ້າງ ຊາດ,ຄອບຄົວການນຳ, ນັກການທູດອາວຸໂສ, ອົງການສາສະໜາ ແລະ ຕົວແທນຈາກ ສາຂາອາຊີບຕ່າງໆ ເຂົ້າຮ່ວມ 400  ກວ່າທ່ານ, ຊຶ່ງຄາດວ່າ ຈະມີຜູ້ເຂົ້າຮ່ວມກອງປະຊຸມຄັ້ງນີ້ ປະມານ 900 ກວ່າທານ.

 

Leave a Reply

Your email address will not be published. Required fields are marked *

Facebook