ຖະແຫລງການຮ່ວມ ລະຫວ່າງ ສອງລັດຖະບານລາວ-ກຳປູເຈຍ

ໃນວັນທີ 5 ທັນວາ 2018 ພາຍຫລັງສຳເລັດ ການພົບປະສອງຝ່າຍ ລະຫວ່າງ ສອງລັດຖະບານ ລາວ-ກຳປູເຈຍ, ໄດ້ມີຖະແຫລງການ ຮ່ວມລະຫວ່າງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ ນາຍົກລັດຖະມົນຕີ ແຫ່ງ ຣາຊະອານາຈັກກໍາປູເຈຍ, ເຊິ່ງທັງສອງຝ່າຍ ຕ່າງກໍໄດ້ຢືນຢັນຄືນເຖິງຄວາມມຸ້ງໝັ້ນ ໃນການສືບຕໍ່ ເສີມຂະຫຍາຍ ສາຍພົວພັນມິດຕະພາບ, ຄວາມສາມັກຄີ ຊ່ວຍເຫລືອເຊິ່ງກັນ ແລະ ກັນ ທີ່ເປັນມູນເຊື້ອ ແລະ ການຮ່ວມມືທີ່ດີ ທີ່ມີມາແຕ່ດົນນານ ລະຫວ່າງ ສອງປະເທດ ກໍຄືສອງລັດຖະບານ ໃຫ້ນັບມື້ແໜ້ນ ແຟ້ນຍິ່ງໆຂຶ້ນ ບົນພື້ນຖານເຄົາລົບ ອະທິປະໄຕ, ຄວາມສະເໝີພາບ,​ ຕ່າງຝ່າຍຕ່າງມີ ຜົນປະໂຫຍດຮ່ວມກັນ.

ສອງຝ່າຍໄດ້ເຫັນດີ ໃຫ້ບັນດາກະຊວງ ແລະ ຂະແໜງການກ່ຽວຂ້ອງ ສືບຕໍ່ຈັດຕັ້ງປະຕິບັດຕາມເນື້ອໃນສັນຍາ ແລະ ຂໍ້ຕົກລົງຕ່າງໆ ທີ່ສອງຝ່າຍໄດ້ເຊັນກັນຜ່ານມາ ໃຫ້ນັບມື້ແຕກດອກ ອອກຜົນ ຫລາຍຂຶ້ນ, ໂດຍຜ່ານກົນໄກ ການຮ່ວມມືສອງຝ່າຍ ຄື: ຄະນະກໍາມະການຮ່ວມມື ວ່າດ້ວຍການຮ່ວມມືສອງຝ່າຍ ລາວ-ກໍາປູເຈຍ (JC), ກໍຄື ກົນໄກຮ່ວມມືອື່ນໆ.

ພ້ອມນັ້ນ, ຍັງໄດ້ເຫັນດີເປັນເອກະພາບ ຊຸກຍູ້ພາກສ່ວນກ່ຽວຂ້ອງ ຈັດຕັ້ງປະຕິບັດຕາມເນື້ອໃນຈິດໃຈ ຂອງການພົບປະຂອງ ສອງນາຍົກລັດຖະມົນຕີ ລາວ ແລະ ກຳປູເຈຍ 3 ຄັ້ງ ທີ່ຜ່ານມາ ຄື ຄັ້ງທີ 1 ຢູ່ນະຄອນຫລວງວຽງຈັນ; ຄັ້ງທີ 2 ທີ່ພະນົມເປັນ ແລະ ຄັ້ງທີ 3 ໃນວັນທີ 13 ກັນຍາ 2018 ທີ່ນະຄອນຫລວງຮ່າໂນ້ຍ, ໂດຍສອງຝ່າຍ ໄດ້ເປັນເອກະພາບກັນແລ້ວວ່າ ບໍລິເວນແກ້ງຕໍມໍຄອຍ-ຫ້ວຍຕະເງົາ ເປັນລິເວນຄົງຄ້າງ ທີ່ຍັງບໍ່ທັນໄດ້ຮັບການແກ້ໄຂ. ດັ່ງນັ້ນ, ຈຶ່ງໄດ້ເຫັນດີເປັນເອກະພາບກັນ 3 ເງື່ອນໄຂ ຄື: 1. ບໍ່ໃຫ້ມີກໍາລັງທະຫານ ຢູ່ໃນບໍລິເວນນີ້ 2.ບໍ່ໃຫ້ມີປະຊາຊົນອາໄສຢູ່ ຫລື ດຳເນີນທຸລະກິດ ຢູ່ບໍລິເວນດັ່ງກ່າວ ແລະ 3.ໃຫ້ມີການກວດກາຮ່ວມກັນ ທັງທາງບົກ, ທາງນໍ້າ ແລະ ທາງອາກາດ. ການກວດກາຮ່ວມສອງຝ່າຍ ແມ່ນສາມາດກວດກາ ໂດຍການໃຊ້ກຳລັງຄົນ ຫລື ການໃຊ້ເຮືອບິນ ບໍ່ມີຄົນຂັບ (Drone).

ສອງຝ່າຍເຫັນດີ ໃຫ້ຮັກສາສະຖານະພາບເດີມ ໃນບໍລິເວນຊາຍແດນ ທີ່ຍັງຄົງຄ້າງ ໂດຍປາສະຈາກ ສິ່ງປຸກສ້າງຕ່າງໆ ທີ່ພາໃຫ້ມີການປ່ຽນແປງ ສະພາບບໍລິເວນດັ່ງກ່າວ, ຈົນກວ່າສອງຝ່າຍຈະສຳເລັດ ການສຳຫລວດ ແລະ ປັກຫລັກໝາຍຊາຍແດນ.

 

Leave a Reply

Your email address will not be published. Required fields are marked *

Facebook