ລາວ – ກໍາປູເຈຍ ບັນລຸການລົງນາມບົດບັນທຶກການຮ່ວມ 4 ສະບັບ

ລາວ – ກຳປູເຈຍ ໄດ້ຮ່ວມກັນລົງນາມເອກະສານ 4 ສະບັບ ໃນຂົງເຂດວັດທະນະທຳ, ການສຶກສາ, ກະສິກຳ – ປ່າໄມ້ ແລະ ພະລັງງານໄຟຟ້າ ໂດຍສະເພາະບົດບັນທຶກຄວາມເຂົ້າໃຈກ່ຽວກັບສັນຍາຊື້ – ຂາຍໄຟຟ້າແຮງສູງຂະໜາດ 230 kV ແລະ 500 kV.

ໂດຍຕອບສະໜອງຕາມຄຳເຊີນຂອງ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ ນາຍົກລັດຖະມົນຕີ ແຫ່ງຣາຊະອານາຈັກກໍາປູເຈຍ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ  ຢ່າງເປັນທາງການໃນລະຫວ່າງວັນທີ 5 – 6 ທັນວາ 2018.

ພິທີຕ້ອນຮັບ ສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ ພ້ອມດ້ວຍຄະນະຜູ້ແທນຂັ້ນສູງ ແຫ່ງຣາຊະອານາຈັກກຳປູເຈຍ ຢ່າງເປັນທາງການ ໄດ້ຈັດຂຶ້ນຢ່າງສົມກຽດທີ່ສໍານັກງານນາຍົກລັດຖະມົນຕີ ໃນຕອນເຊົ້າຂອງວັນທີ 5 ທັນວາ 2018 ໂດຍມີບັນດາການນຳຂັ້ນສູງຂອງ ສປປ ລາວ ເຂົ້າຮ່ວມຢ່າງພ້ອມພຽງ.

ພະນະທ່ານ ທອງລຸນ ສີສຸລິດ ໄດ້ນຳພາ ສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ ໄປຍັງແທ່ນກຽດຕິຍົດ ເພື່ອເຄົາລົບທຸງຊາດກຳປູເຈຍ, ລາວ ຕາມລຳດັບ. ຕໍ່ຈາກນັ້ນ, ພະນະທ່ານ ທອງລຸນ ສີສຸລິດ ແລະ ສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ ໄດ້ຍ່າງກວດແຖວທະຫານກອງກຽດຕິຍົດກອງທັບປະຊາຊົນລາວ ແລະ ຜູ້ນໍາທັງສອງ ໄດ້ຮັບການແນະນໍາຕໍ່ຄະນະ ຕ້ອນຮັບທາງການຝ່າຍ ສປປ ລາວ ແລະ ຄະນະຜູ້ແທນຂັ້ນສູງຂອງຣາຊະອານາຈັກກຳປູເຈຍ ໃນພິທີດັ່ງກ່າວ. ພາຍຫຼັງສຳເລັດ ພິທີຕ້ອນຮັບທາງການ ທັງສອງນາຍົກໄດ້ນຳພາຄະນະຜູ້ແທນຂັ້ນສູງເຂົ້າຮ່ວມກອງປະຊຸມພົບປະສອງຝ່າຍ.

ພະນະທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ ສົມເດັດນາຍົກລັດຖະມົນຕີ ຮຸນແຊນ ພ້ອມດ້ວຍຄະ ນະຜູ້ແທນຂັ້ນສູງ ແຫ່ງ ຣາຊະອານາຈັກກຳປູເຈຍ ທີ່ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການໃນຄັ້ງນີ້.

ພ້ອມດຽວກັນນີ້, ພະນະທ່ານ ທອງລຸນ ສີສຸລິດ ກໍ່ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດຂອງການເລືອກຕັ້ງ ສະມາຊິກສະພາແຫ່ງຊາດ ຊຸດທີ 6 ຂອງຣາຊະອານາຈັກກຳປູເຈຍ ທີ່ຜ່ານມາ ແລະ ຊົມເຊີຍ ສົມເດັດ ເຕໂຈ ຮຸນແຊນ ທີ່ໄດ້ຖືກແຕ່ງຕັ້ງເປັນນາຍົກລັດຖະມົນຕີອີກຄັ້ງ ເຊິ່ງເປັນການຢືນຢັນເຖິງ ຄວາມປີຊາສາມາດໃນການຊີ້ນຳ – ນຳພາຂອງ ສົມເດັດ ຕະຫຼອດໄລຍະຜ່ານມາ.

ໃນໂອກາດດັ່ງກ່າວ ທັງສອງຝ່າຍຕ່າງກໍ່ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດທີ່ໄດ້ຮັບ ການພັດທະນາ ແລະ ຂະຫຍາຍຕົວດີຂຶ້ນເລື້ອຍໆ ເຊິ່ງເຫັນໄດ້ຈາກການແລກປ່ຽນການຢ້ຽມຢາມຂອງການນໍາຂັ້ນສູງ ລະຫວ່າງສອງປະເທດຢ່າງປົກກະຕິ, ສອງຝ່າຍໄດ້ແຈ້ງໃຫ້ກັນຊາບ ກ່ຽວກັບສະພາບການທີ່ພົ້ນເດັ່ນຂອງສອງປະເທດ ພ້ອມທັງທົບທວນຄືນການຮ່ວມມືສອງຝ່າຍໃນໄລຍະຜ່ານມາ ແລະ ປຶກສາຫາລືທິດທາງການຮ່ວມມືໃນຕໍ່ໜ້າ. ພ້ອມດຽວກັນນັ້ນ, ສອງຝ່າຍຍັງໄດ້ປຶກສາຫາລືກັນດ້ວຍບັນຍາກາດສະໜິດສະໜົມ ກ່ຽວກັບການຮ່ວມມືສອງຝ່າຍໃນດ້ານຕ່າງໆຕື່ມອີກ ເຊັ່ນ: ດ້ານວຽກງານປ້ອງກັນຊາດ – ປ້ອງກັນ ຄວາມສະຫງົບ, ດ້ານກົງສຸນ, ດ້ານໂຍທາທິການ ແລະ ຂົນສົ່ງ, ດ້ານວັດທະນະທໍາ ແລະ ທ່ອງທ່ຽວ, ດ້ານການຄ້າ ແລະ ການລົງທຶນ, ບັນຫາຊາຍແດນ ແລະ ການຮ່ວມມືໃນຂອບວຽກງານດ້ານເສດຖະກິດພູມີພາກ ( ເຂດສາມຫຼ່ຽມເສດຖະກິດ CLV ). ພ້ອມນັ້ນ, ສອງຝ່າຍຍັງໄດ້ແລກປ່ຽນຄໍາຄິດເຫັນຕໍ່ບັນຫາພາກພື້ນ ແລະ ສາກົນ ທີ່ຕ່າງຝ່າຍມີຄວາມສົນໃຈຮ່ວມກັນ.

ພາຍຫຼັງສຳເລັດການພົບປະສອງຝ່າຍ ໄດ້ມີຖະແຫຼງການຮ່ວມ ເຊິ່ງທັງສອງຝ່າຍຕ່າງກໍ່ໄດ້ຢືນຢັນຄືນເຖິງຄວາມມຸ່ງໝັ້ນໃນການ ສືບຕໍ່ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ ທີ່ເປັນມູນເຊື້ອ ແລະ ການຮ່ວມມືທີ່ດີ ທີ່ມີມາແຕ່ດົນນານລະຫວ່າງສອງປະເທດ ກໍ່ຄືສອງລັດຖະບານໃຫ້ນັບມື້ແໜ້ນແຟ້ນຍິ່ງໆຂຶ້ນ ບົນພື້ນຖານເຄົາລົບອະທິປະໄຕ, ຄວາມສະເໝີພາບ, ຕ່າງຝ່າຍຕ່າງມີຜົນປະໂຫຍດຮ່ວມກັນ. ສອງຝ່າຍໄດ້ເຫັນດີໃຫ້ບັນດາກະຊວງ ແລະ ຂະແໜງການກ່ຽວຂ້ອງ ສືບຕໍ່ຈັດຕັ້ງປະຕິບັດຕາມເນື້ອໃນສັນຍາ ແລະ ຂໍ້ຕົກລົງຕ່າງໆທີ່ສອງຝ່າຍໄດ້ເຊັນກັນຜ່ານມາໃຫ້ນັບມື້ແຕກດອກອອກຜົນຫຼາຍ ຂຶ້ນ ໂດຍຜ່ານກົນໄກການຮ່ວມມືສອງຝ່າຍ ຄື: ຄະນະກໍາມະການຮ່ວມມື ວ່າດ້ວຍການຮ່ວມມືສອງຝ່າຍ ລາວ – ກໍາປູເຈຍ  ກໍ່ຄືກົນໄກຮ່ວມມືອື່ນໆ, ສອງຝ່າຍໄດ້ເຫັນດີເປັນເອກະພາບກັນຊຸກຍູ້ພາກສ່ວນກ່ຽວຂ້ອງຈັດຕັ້ງປະຕິບັດຕາມເນື້ອໃນຈິດໃຈຂອງ ການພົບປະຂອງສອງນາຍົກລັດຖະມົນຕີ ລາວ ແລະ ກຳປູເຈຍ 3 ຄັ້ງ ທີ່ຜ່ານມາ ຄື: ຄັ້ງທີ 1 ຢູ່ນະຄອນຫຼວງວຽງຈັນ; ຄັ້ງທີ 2 ທີ່ພະນົມເປັນ ແລະ ຄັ້ງທີ 3 ໃນວັນທີ 13 ກັນຍາ 2018 ທີ່ນະຄອນຫຼວງຮາໂນ້ຍ ໂດຍສອງຝ່າຍໄດ້ເປັນເອກະພາບກັນແລ້ວວ່າບໍລິ ເວນ ແກ້ງຕໍມໍຄອຍ – ຫ້ວຍຕະເງົາ ເປັນບໍລິເວນຄົງຄ້າງທີ່ຍັງບໍ່ທັນໄດ້ຮັບການແກ້ໄຂ. ດັ່ງນັ້ນ, ຈຶ່ງໄດ້ເຫັນດີເປັນເອກະພາບກັນ 3 ເງື່ອນໄຂ ຄື:

1. ບໍ່ໃຫ້ມີກໍາລັງທະຫານຢູ່ໃນບໍລິເວນນີ້;

2. ບໍ່ໃຫ້ມີປະຊາຊົນອາໄສຢູ່ ຫຼື ດໍາເນີນທຸລະກິດຢູ່ບໍລິເວນດັ່ງກ່າວ

3. ໃຫ້ມີການກວດກາຮ່ວມກັນທັງທາງບົກ, ທາງນໍ້າ ແລະ ທາງອາກາດ.

ການກວດກາຮ່ວມສອງຝ່າຍແມ່ນສາມາດກວດກາໂດຍການໃຊ້ກຳລັງຄົນ ຫຼື ການໃຊ້ຍົນບໍ່ມີຄົນຂັບ ( Drone ). ສອງຝ່າຍໄດ້ເຫັນ ດີໃຫ້ຮັກສາສະຖານະພາບເດີມໃນບໍລິເວນຊາຍແດນທີ່ຍັງຄົງຄ້າງ ໂດຍປາສະຈາກສິ່ງປຸກສ້າງຕ່າງໆທີ່ພາໃຫ້ມີການປ່ຽນແປງສະ ພາບບໍລິເວນດັ່ງກ່າວ ຈົນກວ່າສອງຝ່າຍຈະສຳເລັດການສຳຫຼວດ ແລະ ປັກຫຼັກໝາຍຊາຍແດນ.

ສອງນາຍົກລັດຖະມົນຕີ ໄດ້ເຂົ້າຮ່ວມເປັນສັກຂີພິຍານໃນການລົງນາມເອກະສານ ຈໍານວນ 4 ສະບັບ ຄື:

1). ບົດບັນທຶກຄວາມເຂົ້າໃຈລະຫວ່າງ ລັດຖະບານ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະບານ ແຫ່ງຣາຊະອານາຈັກກຳປູເຈຍ ວ່າດ້ວຍການຮ່ວມມືດ້ານວັດທະນະທຳ ແລະ ສິລະປະກຳ ສົກປີ 2019 – 2021;

2). ສັນຍາລະຫວ່າງ ກະຊວງສຶກສາທິການ ແລະ ກີລາ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງສຶກສາ, ຊາວໜຸ່ມ ແລະ ກີລາ ແຫ່ງຣາຊະອານາຈັກກໍາປູເຈຍ ວ່າດ້ວຍການຮ່ວມມືດ້ານການສຶກສາໃນໄລຍະປີ 2019 – 2023;

3). ບົດບັນທຶກຄວາມເຂົ້າໃຈລະຫວ່າງ ກະຊວງກະສິກຳ ແລະ ປ່າໄມ້ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງກະສິກຳ, ປ່າໄມ້ ແລະ ການປະມົງ ຣາຊະອານາຈັກກຳປູເຈຍ ວ່າດ້ວຍການສົ່ງຊ້າງລ້ຽງໄປສະແດງສິລະປະ ແລະ ແລກປ່ຽນວັດທະນະທຳທີ່ສວນສັດຊາຟາຣີ ນະຄອນຫຼວງພະນົມເປັນ ຣາຊະອານາຈັກກຳປູເຈຍ;

4). ບົດບັນທຶກຄວາມເຂົ້າໃຈ ລະຫວ່າງ ລັດວິສາຫະກິດໄຟຟ້າລາວ ແລະ ໄຟຟ້າກຳປູເຈຍ ກ່ຽວກັບສັນຍາຊື້ – ຂາຍໄຟຟ້າແຮງສູງ ຂະໜາດ 230 kV ແລະ 500 kV ຈາກສະຖານີໄຟຟ້າ ບ້ານຫາດ ສປປ ລາວ ຫາ ສະຖານີໄຟຟ້າ ສະຕຣອງ ແຕຣງ ກໍາປູເຈຍ.

ໂອກາດນີ້, ສົມເດັດ ນາຍົກລັດຖະມົນຕີ ຮຸນແຊນ ໄດ້ເຊື້ອເຊີນທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍພັນລະຍາ ແລະ ຄະນະ ເດີນທາງໄປຢ້ຽມຢາມທາງການຢູ່ຣາຊະອານາຈັກກໍາປູເຈຍ ໃນປີ 2019.

 

 

Leave a Reply

Your email address will not be published. Required fields are marked *

Facebook