ຊົນເຜົ່າບຣູ ໄດ້ຖືກຮັບຮອງຈາກສະພາເຂົ້າເປັນຊົນເຜົ່າທີ 50

ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ Vlll ໄດ້ພິຈາລະນາຮັບຮອງຊົນເຜົ່າບຣູ ເຂົ້າເປັນຊົນເຜົ່າທີ 50.

ໃນວັນທີ 5 ທັນວາ 2018, ທ່ານ ຄໍາໝັ້ນ ສູນວິເລີດ ລັດຖະມົນຕີກະຊວງພາຍໃນ ໄດ້ສະເໜີພິຈາລະນາຮັບຮອງເອົາຊົນເຜົ່າບຣູ ຕໍ່ກອງປະຊຸມສະພາແຫ່ງຊາດ ວ່າ: ຜ່ານຂະບວນການຄົ້ນຄວ້າໃດໜຶ່ງກ່ຽວກັບຊົນເຜົ່າໃນລາວຕ້ອງໄດ້ອີງໃສ່ 4 ຫຼັກການ ຄື: ພາສາປາກເວົ້າ, ຜືນແຜ່ນດິນ, ເສດຖະກິດ ແລະ ວັດທະນະທຳ. ແຕ່ອີງໃສ່ສະພາບຈຸດພິເສດຂອງຊົນເຜົ່າຢູ່ໃນລາວ ໄດ້ອີງໃສ່ 3 ຫຼັກການ ຄື: ພາສາປາກເວົ້າ, ປະຫວັດສາດຄວາມເປັນມາຕິດພັນກັບຊື່ເອີ້ນຮີດຄອງປະເພນີ ແລະ ວັດທະນະທຳ. ນອກຈາກນີ້, ນັກວິຊາການຊົນເຜົ່າວິທະຍາຍັງຢຶດໝັ້ນທັດສະນະຂອງພັກ ແລະ ລັດຖະບານ ໂດຍສະເພາະທິດຊີ້ນໍາການຄົ້ນຄວ້າ ແລະ ຮຽນຮູ້ກ່ຽວກັບຊົນເຜົ່າ.

ຜ່ານການສຳຫຼວດເກັບກໍາຂໍ້ມູນການຄົ້ນຄວ້າກ່ຽວກັບການກໍານົດຊື່ເອີ້ນຂອງຈໍານວນຊົນເຜົ່າໃນລາວ ນັບແຕ່ປີ 1985 – 2008 ທ່ານນາຍົກລັດຖະມົນຕີ ໄດ້ສະເໜີຊື່ເອີ້ນ ແລະ ຈຳນວນຊົນເຜົ່າໃນລາວຕໍ່ສະພາແຫ່ງຊາດເພື່ອນໍາພິຈາລະນາຮັບຮອງເອົາຊົນ ເຜົ່າບຣູ ໃນກອງປະຊຸມສະໄໝສາມັນ ເທື່ອທີ 5 ຂອງກອງປະຊຸມສະພາແຫ່ງຊາດ ຊຸດທີ Vl ແຕ່ບໍ່ສາມາດຮັບຮອງໄດ້ຍ້ອນຂໍ້ມູນ ແລະ ຫຼັກຖານຍັງບໍ່ທັນຄົບຖ້ວນ ເຊິ່ງໃນປັດຈຸບັນເຫັນໄດ້ວ່າປະຊາຊົນບັນດາເຜົ່າແມ່ນໄດ້ຮັບການເຂົ້າເຖິງການປິ່ນປົວພະຍາດ ແລະ ການສຶກສາຮໍ່າຮຽນ ເຮັດໃຫ້ຊີວິດການເປັນຢູ່ດີຂຶ້ນຈົນກາຍເປັນພະນັກງານຫຼັກແຫຼ່ງໃນຫຼາຍຂົງເຂດ. ຊົນເຜົ່າບຣູ ຈັດເປັນຊົນເຜົ່າໜຶ່ງທີ່ນອນໃນໝວດພາສາ ມອນ – ຂະແມ ແລະ ອາໄສຢູ່ 5 ເມືອງ ແຂວງສະຫວັນນະເຂດ. ທ່ານ ນາງ ບົວພັນ ລີໄກຢ່າ ປະທານກຳມາທິການບັນດາເຜົ່າ ໄດ້ປະກອບຄໍາເຫັນຕໍ່ກອງປະຊຸມ ວ່າ: ຜ່ານການເກັບກຳຂໍ້ມູນກ່ຽວກັບຊົນເຜົ່າບຣູທີ່ ເປັນລາຍລັກອັກສອນໃນຫຼາຍແຫຼ່ງ ໃນສະໄໝສະພາແຫ່ງຊາດ ຊຸດທີ VII ເຊິ່ງເປັນໄລຍະເວລາເກືອບ 10 ປີ ຄະນະຮັບຜິດຊອບ ໄດ້ນຳມາຄົ້ນ ຄວ້າ, ປຶກສາຫາລື ແລະ ໄດ້ຈັດກອງປະຊຸມໃນຫຼາຍລະດັບ ເພື່ອທາບທາມຄວາມຄິດເຫັນ.

ນັບທັງຢູ່ຂັ້ນທ້ອງຖິ່ນກໍ່ຄືຢູ່ຂັ້ນສູນກາງຢ່າງຕັ້ງໜ້າດ້ວຍຄວາມຮັບຜິດຊອບສູງ ເຫັນວ່າບັນດາຂໍ້ມູນດັ່ງກ່າວແມ່ນຖືກຕ້ອງຕາມ ຄວາມຈິງ ແລະ ສອດຄ່ອງກັບທິດຊີ້ນຳຂອງກົມການເມືອງສູນກາງພັກ ກໍ່ຄືຄວາມເປັນຫ່ວງເປັນໃຍຂອງການນຳພັກ – ລັດ. ສປປ ລາວ ເປັນປະເທດທີ່ປະກອບມີຫຼາຍຊົນຊາດຊົນເຜົ່າທີ່ດຳລົງຊີວິດຢູ່ແຕ່ເໜືອຮອດໃຕ້ ເຊິ່ງແຕ່ລະເຜົ່າໃນວົງຄະນາຍາດແຫ່ງຊາດ ລາວໄດ້ມີຄວາມຜູກພັນຮັກຫອມ, ມີມູນເຊື້ອສາມັກຄີ ແລະ ຮັກແພງກັນເປັນປຶກແຜ່ນໃນການດຳລົງຄົງຕົວພາຍໃຕ້ການ ນຳພາຂອງພັກ.

ພາຍຫຼັງການປະກອບຄຳເຫັນກໍ່ມີການລົງຄະແນນສຽງຮັບຮອງເອົາຊົນເຜົ່າບຣູເຂົ້າໃນວົງຄະນາຍາດແຫ່ງຊາດ ເປັນຊົນເຜົ່າທີ 50 ດ້ວຍຄະແນນ 93%.

 

[ ຂ່າວ: ທິບອຸສາ + ກາວຊົ່ງ ]

Leave a Reply

Your email address will not be published. Required fields are marked *

Facebook