ຜູ້ນໍາຄົນໃຫ່ມຂອງເມັກຊິໂກ ປະກາດຂາຍເຮືອບິນປະຈໍາຕໍາແໜ່ງ ແລະຫຼຸດເງີນເດືອນຕົນເອງລົງ 60%

ສຳນັກຂ່າວຕ່າງປະເທດລາຍງານໃນວັນທີ 3 ທັນວາ 2018 ວ່າ ທ່ານ ອັນເດຣສ ມານູເອລ ໂລເປຊ ໂອບຣາດໍຣ ປະທານາທິບໍດີຄົນ ໃໝ່ຂອງເມັກຊິໂກເຊິ່ງຫາກໍ່ສາບານຕົນເຂົ້າຮັບຕໍາແໜ່ງໄປເມື່ອວັນທີ່ 28 ພະຈິກທີ່ຜ່ານມາ ໄດ້ປະກາດສັ່ງຂາຍເຮືອບິນໂບອິ້ງລຸ້ນ 787 ຄຣີມໄລເນີຣ ເຊິ່ງເປັນເຮືອບິນປະຈໍາຕໍາແໜ່ງລໍາໃໝ່ຂອງຜູ້ນໍາເມັກຊິໂກ ເຊິ່ງຫາກໍ່ຊື້ມາດ້ວຍລາຄາສູງເຖິງ 218 ລ້ານໂດລາສະຫະລັດ ໂດຍທ່ານລະບຸວ່າເປັນການຟຸມເຟືອຍເກີນຄວາມຈໍາເປັນ

ລາຍງານຍັງລະບຸວ່າ ທ່ານ ໂອບຣາດໍຣ ເຊິ່ງເປັນນັກການເມືອງຝ່າຍຊ້າຍ ແລະ ເປັນຜູ້ນໍາຄົນໃໝ່ຂອງເມັກຊິໂກ ໄດ້ເຄີຍໃຫ້ຄໍາໝັ້ນຕໍ່ປະຊາຊົນວ່າຈະສ້າງຄວາມປ່ຽນແປງລວມເຖິງກໍາຈັດຄໍລັບຊັ່ນໃນປະເທດຈົນເຖິງຮາກເຫງົ້າ ລະບຸວ່າ “ຂ້າພະເຈົ້າຈະຂາຍເຮືອບິນ ແລະ ເຮລິຄອບເຕີທຸກລໍາທີ່ບັນດານັກການເມືອງຄໍລັບຊັ່ນໃຊ້” ທ່າມກາງສຽງເຊຍຢ່າງຫຼາຍຂອງຜູ້ສະໜັບສະໜູນ ໂດຍທ່ານຍັງລະບຸອີກວ່າ ພາຫະນາພວກນີ້ຖືກຊື້ມາໂດຍເງິນຄໍລັບຊັ່ນ ມັນຈຶ່ງບໍ່ຕ່າງຈາກສັນຍາລັກຂອງຄໍລັບຊັ່ນ

ນອກຈາກນີ້ ທ່ານ ໂອບຣາດໍຣ ຍັງໄດ້ສ້າງທໍານຽມໃໝ່ໃຫ້ກັບການເມືອງເມັກຊິໂກໂດຍລະບຸວ່າ ທ່ານບໍ່ເຂົ້າໄປອາໄສໃນທໍານຽບ Los Pinos ເຊິ່ງເປັນບ້ານພັກປະຈໍາຕໍາແໜ່ງປະທານາທິບໍດີເມັກຊິໂກ ແຕ່ຈະອາໄສທີ່ບ້ານພັກຂອງຕົນເອງແທນ ອີກທັງຍັງມີແຜນຈະ ປ່ຽນທໍານຽບ Los Pinos ເປັນສູນປະຫວັດສາດ ແລະ ວັດທະນະທໍາແທນອີກນຳ ລວມເຖິງປະກາດຫຼຸດເງີນເດືອນຕົນເອງລົງ 60% ອີກດ້ວຍ

ດ້ານທ່ານ ຄາຣລອສ ອູຣຊົວ ລັດຖະມົນຕີວ່າກະຊວງການເງິນຄົນໃໝ່ຂອງເມັກຊິໂກ ໄດ້ມີການຈັດໃຫ້ບັນດານັກຂ່າວ ເຂົ້າຊົມພາຍໃນເຮືອບິນໂບອິ້ງ 787 ລໍາດັ່ງກ່າວອີກດ້ວຍ ໂດຍພາຍໃນຕົກແຕ່ງຢ່າງຫຼູຫຼາ ມີກາສັນຍາລັກຂອງລັດຖະບານເມັກຊິໂກ ພ້ອມທັງຫ້ອງນອນ ແລະ ຫ້ອງນໍ້າທີ່ຕົກແຕ່ງດ້ວຍຫີນອ່ອນ ເພື່ອສົມຖານະກັບຜູ້ນໍາເມັກຊິໂກໂດຍສະເພາະ

ທັງນີ້ເຮືອບິນລໍາດັ່ງກ່າວ ໄດ້ຮັບການສົ່ງມອບໃນປີ 2016 ເພື່ອໃຊ້ເປັນເຮືອບິນປະຈໍາຕໍາແໜ່ງໃຫ້ກັບປະທານາທິບໍດີເມັກຊິໂກ ໂດຍເຮືອບິນລໍານີ້ໄດ້ປະຕິບັດພາລະກິດສຸດທ້າຍເມື່ອວັນທີ່ 27 ພະຈິກ ທີ່ຜ່ານມາ ໃນການພາທ່ານ ເອັນຣິເກ້ ນິເອໂຕ້ ປິເອນ່າ ອາດີດຜູ້ນໍາເມັກຊິໂກ ເດີນທາງໄປຮ່ວມປະຊຸມ ຈີ 20 ທີ່ນະຄອນບົວໂນສໄອເຣສ ປະເທດອາເຈນຕິນ່າ ແລະ ເຮືອບິນລໍາດັ່ງກ່າວຈະຖືກສົ່ງມອບໃຫ້ເຈົ້າຂອງໃໝ່ທີ່ລັດແຄລິຟໍເນຍຕໍ່ໄປ

 

Leave a Reply

Your email address will not be published. Required fields are marked *

Facebook