ໂຄງການຣີເວີວິວ ເປີດຂາຍຄັ້ງທໍາອິດມີລູກຄ້າຈອງແລ້ວ 30%

ການກໍ່ສ້າງອາພາດເມັນ 8 ຊັ້ນ ພາຍໃຕ້ຊື່ “ ຣີເວີວິວ ” ທີ່ວາງສີລາລືກແຕ່ວັນທີ 11 ກຸມພາ 2018 ດ້ວຍມູນຄ່າການລົງທຶນ 6,6 ລ້ານໂດລາ. ປັດຈຸບັນການກໍ່ສ້າງຄືບໜ້າ 30% ແລະ ໄດ້ເປີດໃຫ້ລູກຄ້າຈອງແລ້ວ.

ທ່ານ ນາງ ຊູມາ ຜູ້ອໍານວຍການພັດທະນາເສດຖະກິດ ກຸ່ມບໍລິສັດ ອານານດີ ໃຫ້ສໍາພາດວ່າ: ໂຄງການ ຣີເວີວິວ ເປັນການລົງທຶນຮ່ວມກັນຂອງກຸ່ມບໍລິສັດ ອານານດີ ແລະ ກຸ່ມບໍລິສັດ ກຣີດ  ໂຄງການດັ່ງກ່າວແມ່ນ ບໍລິສັດ ດີຊາຍເທັກ ເປັນຜູ້ອອກແບບ ແລະ ຮັບເໝົາກໍ່ສ້າງ ພາຍຫຼັງວາງສີລາລືກ ເຊິ່ງເປັນອາຄານ 8 ຊັ້ນ, ມີ 78 ຫ້ອງ; ເປົ້າໝາຍຈະຂາຍແມ່ນຊັ້ນ 4, ຊັ້ນ 6 ແລະ ຊັ້ນ 7 ທີ່ເປັນວິວສວຍງາມຕິດກັບແຄມນໍ້າຂອງ, ສ່ວນຊັ້ນທີ່ເຫຼືອແມ່ນຈະເປັນຫ້ອງການ ແລະ ອື່ນໆ. ສໍາລັບເປີດຂາຍຄັ້ງທໍາອິດໃນວັນທີ 1 ທັນວາ 2018 ຜ່ານມາ ເຫັນວ່າລູກຄ້າທີ່ມາຈອງສ່ວນໃຫຍ່ແມ່ນຄົນຮູ້ຈັກກັນ, ບັນດາບໍລິສັດຕ່າງປະເທດທີ່ລົງທຶນໃນລາວ, ບັນດາສະຖານທູດ, ກຸ່ມຄົນລາວທີ່ມີຄົນຕ່າງປະເທດເຮັດວຽກນຳ, ຜູ້ຊ່ຽວຊານຕ່າງປະເທດ ແລະ ຄົນລາວຊື້ໄວ້ ເພື່ອເກັບຄ່າເຊົ່າເຊິ່ງກວມອັດຕາປະມານ 30% ຂອງຈໍານວນຫ້ອງທັງໝົດ.

ທ່ານກ່າວຕື່ມວ່າ: ສໍາລັບຄວາມຄືບໜ້າຂອງໂຄງການທີ່ໄດ້ຈັດຕັ້ງປະຕິບັດໜ້າວຽກຕົວຈິງແມ່ນສຳເລັດການກໍ່ສ້າງ 30% ຄາດວ່າຈະໃຫ້ແລ້ວໃນທ້າຍປີ 2019 ແລະ ຈະຍ້າຍເຂົ້າພັກໄດ້ໃນຕົ້ນປີ 2020 ເຊິ່ງລາຄາຫ້ອງລະ 120.000 ໂດລາສະຫະລັດ. ໃນນີ້, ຄົນຕ່າງປະເທດແມ່ນອີງໃສ່ກົດໝາຍຂອງລາວເຮົາສາມາດໃຫ້ສິດໃນການເຊົ່າເປັນເວລາ 30 ປີ ແລະ ສາມາດຕໍ່ໄດ້ອີກ 2 ເທື່ອ.

ອາພາດເມັນດັ່ງກ່າວເປັນອາຄານລະດັບ 4 ດາວ ມີເນື້ອທີ່ທັງໝົດ 2.600 ຕາແມັດ. ໃນນີ້, ເນື້ອທີ່ໃນການສ້າງ 1.200 ຕາແມັດ, ມີສະຖານທີ່ຕັ້ງຢູ່ບ້ານຫາຍໂສກ ເມືອງສີສັດຕະນາກ ນະຄອນຫຼວງວຽງຈັນ ໂດຍໄດ້ຮັບການສະໜັບສະໜູນທຶນຈາກອົງການ ການເງິນສາກົນ ( IFC ) ປະຈໍາລາວ ໄດ້ປ່ອຍເງິນກູ້ ຈໍານວນ 2 ລ້ານໂດລາສະຫະລັດ.

 

[ ຂ່າວ – ຮູບ: ສົມສະຫວິນ ]

Leave a Reply

Your email address will not be published. Required fields are marked *

Facebook