ເອັສຊີຈີ ລົງຢ້ຽມຢາມນັກຮຽນຜູ້ທີ່ຈະໄດ້ຮັບທຶນການສຶກສາ ປີ 2018

ໃນລະຫວ່າງວັນທີ 12 – 22 ພະຈິກ 2018 ນີ້ ເອັສຊີຈີ ຮ່ວມກັບ Action with Lao Children ( ALC ) ນຳພາໂດຍ ທ່ານ ໄຊທັດ ຕົງສາລີ Senior Associate Director Enterprise Brand Communication – Asean ພ້ອມດ້ວຍຄະນະ ຈະໄດ້ລົງພື້ນທີ່ຢ້ຽມຢາມນັກຮຽນເຖິງເຮືອນຂອງແຕ່ລະຄົນ ເພື່ອເບິ່ງຊີວິດຄວາມເປັນຢູ່ ແລະ ການດຳລົງຊີວິດໃນແຕ່ລະວັນ ພ້ອມສຳພາດໂອ້ລົມກັບນ້ອງນັກຮຽນ ແລະ ພໍ່ແມ່ຜູ້ປົກຄອງຢ່າງໃກ້ຊິດ ເພື່ອໃຫ້ເຂົ້າໃຈເຖິງອຸປະສັກຂອງນ້ອງໆໃນການສຶກສາຂອງແຕ່ລະຄອບຄົວ.

ທ່ານ ວິໂຣດ ລັດຕະນະໄຊສິດ ອຳນວຍການ ບໍລິສັດ ເອັສຊີຈີ ໃນ ສປປ ລາວ ( Country Director ) ໃຫ້ຮູ້ວ່າ: ຈາກການດຳເນີນໂຄງການມາຕະຫຼອດໄລຍະ 7 ປີ ເຮັດໃຫ້ເຮົາເຫັນນ້ອງນັກຮຽນຫຼາກຫຼາຍທີ່ມີຄວາມຝັນ ແລະ ມຸ່ງໝັ້ນຢາກປະສົບຄວາມສຳເລັດໃນການສຶກສາເພື່ອນຳຄວາມຮູ້ໄປໃຊ້ໃນການປະກອບອາຊີບ ແລະ ຍົກລະດັບຄຸນນະພາບຊີວິດ ເອັສຊີຈີ ເຫັນວ່າການສຶກສາຄືຮາກຖານສຳຄັນທີ່ຈະພັດທະນາໃຫ້ເດັກເຫຼົ່ານີ້ທີ່ມີຄວາມພ້ອມ ແລະ ເປັນຮາກຖານໃນການພັດທະນາປະເທດຊາດຕໍ່ໄປ ຕາມວິໄສທັດຂອງເຮົາໃນການຮ່ວມສ້າງຄຸນນະພາບຊີວິດທີ່ດີຂຶ້ນຂອງສັງຄົມ ສປປ ລາວ ເອັສຊີຈີ ຈະຍັງຄົງດຳເນີນໂຄງການ SCG Sharing the Dream ຕໍ່ໄປອີກໃນອະນາຄົດ.

ເອັສຊີຈີ ຫວັງເປັນຢ່າງຍິ່ງວ່າ: ໂຄງການມອບທຶນການສຶກສາ SCG Sharing the Dream ຈະເປັນການມອບໂອກາດທີ່ດີໃຫ້ກັບນ້ອງເຍົາວະຊົນທຸກຄົນທີ່ມີຄວາມມຸ່ງໝັ້ນຕັ້ງໃຈໃນການສຶກສາຮ່ຳຮຽນ ສາມາດສ້າງສັນຜົນງານທີ່ມີຄຸນຄ່າເປັນປະໂຫຍດໃຫ້ແກ່ຕົນເອງ ແລະ ສັງຄົມປະເທດຊາດຕໍ່ໄປ.

ຂະນະທີ່ ນາງ ຕາດຳ ວົງພັກດີ ຮຽນຊັ້ນ ມ 7 ທີ່ ມ.ປາຍ ໂນນສະຫວ່າງ ເຊິ່ງເປັນນັກຮຽນຜູ້ໜຶ່ງທີ່ຖືກຄັດເລືອກໄດ້ຮັບທຶນຈາກໂຄງການ SCG Sharing the Dream 2018 ໃຫ້ສຳພາດວ່າ: ປັດຈຸບັນນີ້ຄອບຄົວນ້ອງຢູ່ບ້ານໂນນສະຫວັນ ເມືອງໄຊເສດຖາ ນະຄອນຫຼວງວຽງຈັນ ເຊິ່ງອາໄສຢູ່ກັບນ້ອງ 3 ຄົນ, ສ່ວນຜູ້ເປັນພໍ່ເສຍຊີວິດຕັ້ງແຕ່ຕອນນ້ອງຮຽນຢູ່ຊັ້ນ ມ 3 ແລະ ປີຕໍ່ມາຜູ້ເປັນແມ່ໄດ້ໄປສ້າງຄອບຄົວໃໝ່ ເຊິ່ງເຮັດໃຫ້ຄອບຄົວມີຄວາມຫຍຸ້ງຍາກຫຼາຍ ແລະ ນ້ອງເອງໄດ້ດີ້ນຮົນຫາເຊົ້າກິນຄ່ຳເພື່ອລ້ຽງນ້ອງ ຈົນມາຮອດປັດຈຸບັນນີ້ນ້ອງບໍ່ສາມາດລ້ຽງນ້ອງໄດ້ຈຶ່ງໄດ້ເອົານ້ອງ 2 ຄົນ ໄປໃຫ້ແມ່ຕູ້ລ້ຽງຊ່ວຍ, ສ່ວນນ້ອງອີກຄົນໜຶ່ງນ້ອງຈະເປັນຄົນລ້ຽງເອງ.

ແຕ່ລະມື້ນ້ອງທັງຮຽນ ແລະ ເຮັດວຽກໄປນຳຫາເຊົ້າກິນຄ່ຳເພື່ອລ້ຽງຕົນເອງກັບນ້ອງ ເຊັ່ນ: ຂາຍເຄື່ອງອອນໄລ ແລະ ຫຍິບເຄື່ອງເລັກໜ້ອຍທີ່ຕົນເອງເຮັດໄດ້, ບາງໄລຍະນ້ອງໄດ້ປູກຜັກຂາຍນຳ ເຊິ່ງບາງມື້ສາມາດຫາໄດ້ 10 ພັນກີບ, ບາງມື້ໄດ້ 20 ພັນກີບ ນ້ອງໄດ້ທ້ອນໂຮມໄວ້ເພື່ອສົ່ງເສີມຕົນເອງກັບນ້ອງໃຫ້ມີຢູ່ມີກິນ, ໃຫ້ໄດ້ສຶກສາຮ່ຳຮຽນຄືຄົນອື່ນ ແລະ ມາຮອດປັດຈຸບັນນີ້ນ້ອງເອງຖືກຄັດເລືອກໃຫ້ໄດ້ຮັບທຶນການສຶກສາຈາກ ເອັສຊີຈີ ໃນໂຄງການມອບທຶນການສຶກສາ SCG Sharing the Dream 2018 ນ້ອງຮູ້ສຶກດີໃຈຫຼາຍທີ່ໄດ້ຮັບທຶນການສຶກສາຈາກ ເອັສຊີຈີ ໃນຄັ້ງນີ້, ຖືວ່າເປັນຂອງຂວັນທີ່ຍິ່ງໃຫຍ່ເພື່ອມາສານຝັນໃຫ້ນ້ອງໄດ້ສຶກສາຮ່ຳຮຽນຄືຄົນອື່ນໆ, ນ້ອງສັນຍາກັບຕົວເອງວ່າຈະຕັ້ງໃຈສຶກສາຮ່ຳຮຽນໃຫ້ເປັນນັກຮຽນດີ – ຮຽນເກັ່ງ, ເປັນແບບຢ່າງທີ່ດີໃຫ້ແກ່ໝູ່ເພື່ອນ ແລະ ນ້ອງໆພາຍໃນໂຮງຮຽນ ແລະ ຈະນຳເອົາຄວາມຮູ້ທີ່ໄດ້ຮຽນໄປພັດທະນາປະເທດຊາດໃນອະນາຄົດ.

 

ແຫຼ່ງຂ່າວ: ເສດຖະກິດ-ການຄ້າ

 

Leave a Reply

Your email address will not be published. Required fields are marked *

Facebook