ສູນພາສາຫວຽດນາມ ຢູ່ແຂວງສາລະວັນ ຈະເລີ່ມລົງມືກໍ່ສ້າງທ້າຍເດືອນນີ້

ແຂວງສາລະວັນ ກັບ ນະຄອນດານັງ ເຫັນດີສ້າງສູນພາສາຫວຽດນາມ ຢູ່ ແຂວງສາລະວັນ ໃນເນື້ອທີ່ 626,64 ຕາແມັດ ສູນດັ່ງກ່າວຈະໃຊ້ງົບປະມານ 7 ຕື້ກວ່າດົງ ຄາດຈະເລີ່ມລົງມືກໍ່ສ້າງໃນທ້າຍເດືອນພະຈິກ 2018 ນີ້.

ວັນທີ 7 ພະຈິກ 2018 ທີ່ຫ້ອງຮັບຮອງພະແນກສຶກສາທິການ ແລະ ກີລາ ແຂວງສາລະວັນ ໄດ້ຈັດກອງປະຊຸມປຶກສາຫາລືຮ່ວມກັບ ຄະນະສູນການພົວພັນຮ່ວມມືການລົງທຶນ ແລະ ຄຸ້ມຄອງໂຄງການຢູ່ລາວ ໂດຍການເຂົ້າຮ່ວມຂອງ ທ່ານ ສີລິສັກ ຖະໜອມຮັກ ຫົວໜ້າພະແນກສຶກສາທິການ ແລະ ກີລາແຂວງ, ທ່ານ ເລວັນຮຸ່ງ ຫົວໜ້າສູນການພົວພັນຮ່ວມມືການລົງທຶນ ແລະ ຄຸ້ມຄອງບັນດາໂຄງການຢູ່ລາວ ພ້ອມດ້ວຍສະຖາປະນິກສູນຮ່ວມມື ລາວ – ດານັງ, ໜ່ວຍງານກໍ່ສ້າງ, ທີ່ປຶກສາອອກແບບ ແລະ ຕິດຕາມກວດກາ, ມີບັນດາການນຳພະແນກການ, ຂະແໜງການທີ່ກ່ຽວຂ້ອງອ້ອມຂ້າງ   ແຂວງເຂົ້າຮ່ວມ.

ການເຮັດວຽກຮ່ວມກັນໃນຄັ້ງນີ້ແມ່ນໄດ້ປຶກສາຫາລື ແລະ ແລກປ່ຽນຄຳຄິດເຫັນເພື່ອຄວາມເປັນເອກະພາບໃນການປຸກສ້າງສູນພາສາຫວຽດນາມຢູ່ແຂວງສາລະວັນ, ທີ່ອໍານາດການປົກຄອງນະຄອນດານັງ ເຫັນດີອະນຸມັດໂຄງການກໍ່ສ້າງ ແລະ ລົງກວດກາເນື້ອທີ່ ແລະ ສະຖານທີ່ປຸກສ້າງຕົວຈິງ ເພື່ອນຳສະເໜີຫາອຳນາດການປົກຄອງແຂວງສາລະວັນ ເຊິ່ງມີເນື້ອທີ່ໃນການປຸກສ້າງທັງໝົດ 626,64 ຕາແມັດ, ປະກອບມີ 5 ຫ້ອງຮຽນ, ມີຫ້ອງການຄູ 1 ຫ້ອງ, ຫ້ອງພັກຄູ 2 ຫ້ອງ, ຫ້ອງອ່ານໜັງສື 1 ຫ້ອງ, ຫ້ອງປະຊຸມ ແລະ ເຮັດກິດຈະກໍາ 1 ຫ້ອງ, ຫ້ອງຄົວ 1 ຫ້ອງ, ມີຫ້ອງນໍ້າ ແລະ ເຟີນີເຈີຄົບຊຸດ ເຊິ່ງມີມູນຄ່າທັງໝົດ 7,1 ຕື້ດົງ ເຊິ່ງຄາດວ່າຈະໄດ້ເລີ່ມລົງມືກໍ່ສ້າງໃນທ້າຍເດືອນພະຈິກ 2018 ນີ້.

ພ້ອມດຽວກັນນັ້ນ, ທັງສອງຝ່າຍກໍ່ໄດ້ປະກອບຄຳຄິດເຫັນຮ່ວມກັນໃນການກໍ່ສ້າງສູນພາສາຫວຽດນາມ ຢູ່ແຂວງສາລະວັນ ໃຫ້ໄດ້ຮັບການຈັດຕັ້ງປະຕິບັດ ແລະ ໄດ້ນຳໃຊ້ໃນຕໍ່ໜ້ານີ້ ເພື່ອອໍານວຍຄວາມສະດວກ ແລະ ສ້າງເງື່ອນໄຂອຳນວຍຄວາມສະດວກໃນການຮຽນຮູ້.

 

ແຫຼ່ງຂ່າວ: ເສດຖະກິດ-ການຄ້າ

 

 

Leave a Reply

Your email address will not be published. Required fields are marked *

Facebook